LITANIJA UZ DĪVU SVĀTŪ GORU
Kyrie, eleison!
Christe, eleison!
Kyrie, eleison!
Kristu, klausi myus!
Kristu, uzklausi myus!
- Dīvs Tāvs nu dabasim,
- apsažāloj par mums!
- Dīvs Dāls, pasauļa Pesteitōjs,
- apsažāloj par mums!
- Dīvs Svātais Gors,
- apsažāloj par mums!
- Svātō Trejadeiba, vīns Dīvs,
- apsažāloj par mums!
- Dīvs Svātais Gors, kurs nu Tāva un Dāla izīt,
- apsažāloj par mums!
- Dīvs Svātais Gors, pravīšu gaismōtōjs,
- apsažāloj par mums!
- Dīvs Svātais Gors, padūma un drūsmes devējs,
- apsažāloj par mums!
- Dīvs Svātais Gors, dīvbejeibas un sapratnes devējs,
- apsažāloj par mums!
- Dīvs Svātais Gors, žēlesteibu daleitōjs,
- apsažāloj par mums!
- Dīvs Svātais Gors, Dīva bejeibas īdvēsējs,
- apsažāloj par mums!
- Dīvs Svātais Gors, svātuma olūts,
- apsažāloj par mums!
- Dīvs Svātais Gors, ticeibas, mīra un mīlesteibas styprynōtōjs,
- apsažāloj par mums!
- Dīvs Svātais Gors, žāļsirdeibas mūdynōtōjs,
- apsažāloj par mums!
- Dīvs Svātais Gors, žāluma par grākim mūdynōtōjs,
- apsažāloj par mums!
- Dīvs Svātais Gors, myusu siržu daiļōtōjs,
- apsažāloj par mums!
- Dīvs Svātais Gors, myusu dūmu zynōtōjs.
- apsažāloj par mums!
- Esi mums žēleigs!
- Atlaid mums Kungs un Dīvs!
- Esi mums žēleigs!
- Uzklausi myus, Kungs un Dīvs!
- Nu vysa ļauna,
- atpestej myus, Kungs un Dīvs!
- Nu ikvīna grāka,
- atpestej myus, Kungs un Dīvs!
- Nu kārdynōjumim un ļaunō gora viļteibas,
- atpestej myus, Kungs un Dīvs!
- Nu pretōšonōs atzeitom patīseibom,
- atpestej myus, Kungs un Dīvs!
- Nu Dīva žēlesteibu skausšonas tyvōkajam,
- atpestej myus, Kungs un Dīvs!
- Nu nūcītynōšonōs ļaunā,
- atpestej myus, Kungs un Dīvs!
- Nu ikvīnas dvēseles un mīsas naškeisteibas,
- atpestej myus, Kungs un Dīvs!
- Nu dusmes, īnaida un nasadareibas gora,
- atpestej myus, Kungs un Dīvs!
- Nu kecereibom un vysaidim moldim ticeibā,
- atpestej myus, Kungs un Dīvs!
- Nu ļaunō gora,
- atpestej myus, Kungs un Dīvs!
- Caur tovu myužeigu izaceļšonu nu Tāva un Dāla,
- atpestej myus, Kungs un Dīvs!
- Caur tovu atnōkšonu vērs Jezus bolūža veidā,
- atpestej myus, Kungs un Dīvs!
- Caur tovu atnōkšonu vērs apostolim Vosorvātkūs,
- Tovas tīsas dīnā,
- atpestej myus, Kungs un Dīvs!
Mes, grēcinīki, tevi lyudzam, uzklausi myus, Kungs un Dīvs!
Myusu grākus žēleigi atlaid, tevi lyudzam,
Uzklausi myus, Kungs un Dīvs!
Ticeibā, cereibā un mīlesteibā uzticeibu dūdi mums,
Tevi lyudzam, uzklausi myus, Kungs un Dīvs!
- Dīva Jārs, kas nūceļ pasauļa grākus,
- atlaid mums, Kungs un Dīvs!
- Dīva Jārs, kas nūceļ pasauļa grākus,
- uzklausi myus, Kungs un Dīvs!
- Dīva Jārs, kas nūceļ pasauļa grākus,
- apsažāloj par mums!
Kyrie, eleison!
Christe, eleison!
Kyrie, eleison!
Tāvs myusu,...
Esi sveicynōta,...
Gūds lai ir Tāvam...
- Dīvs, dori manī teiru sirdi!
- Un patīseibas goru atjaunoj manī!
- Kungs, uzklausi munu lyugšonu!
- Muns saucīņs lai nūnōk pi Tevis!
Lyugsimēs:
Dīvs, kas ticeigū sirdis mōci un apgaismoj ar Svātō Gora gaismu, paleidzi mums Tovu patīseibu pareizi saprast un prīcōtīs vysod, sajamūt Svātō Gora žēlesteibas. Caur Jezu Kristu, myusu Kungu. Amen.
LYUGŠONAS UZ DĪVU SVĀTŪ GORU
Dīvs Svātais Gors, myusu mōceitōjs un vodūņs, vodi myus, lai mes nanūītu nu pesteišonas ceļa. Tu esi eistais īprīcynōtōjs nūskumšonōs un šōs dzeives vōrgūs. Tu īdvēs svātas dūmas, gribēšonas un dūd spāku jōs piļdeit. Laimeigs ir tys, pi kō Tu pīmōjoj. Ari muna sirds lai ir Tev mōjūklis. Es atdūdu Tev, Kungs, vysu, kas manī ir un korsti Tevi lyudzu, lai Tu mani styprynōtu ticeibā, aizdadzynōtu ar svātu mīlesteibu, pacaltu nu grākim, dūtu iztureibu gondareišonā un pīaugšonu tykumūs.
Dīvs Svātais Gors! Dūd maņ nalaimē pacīteibu, laimē pazemeibu, kārdynōšonōs uzvaru, nūskumšonas prīcu, dorbā styprynōjumu, apspīšonā spērdzynōjumu, sōpēs un vōjumūs pasateikšonu Dīvam. Caur myusu Kungu Jezu Kristu, kas vīneibā ar Tevi un Dīvu Tāvu dzeivoj un volda myužeigi myužam. Amen.
Dīvs Svātais Gors, kas esi tykumiskōs piļneibas olūts, uzklausi munas pazemeigōs lyugšonas un apdōvynoj mani ar sovom dōvonom. Dūd maņ Tovu prīcu, lai laimē es byutu pazemeigs un prīcōtūs Tevī, bet nūskumšonā pi Tevim atrostu remdēšonu. Dūd maņ Tovu mīru, lai vysōs dzeives gryuteibōs es mōcātu byut dzidrs prōtā un dvēselē un napasadūtu nivīnai jyutai, kura mani uztrauktu, nu Dīva attōlynōtu voi ar cylvākim vastu nasaticeibā. Dori, lai es byutu pacīteigs nūskumšonā un sōpeigūs pōrbaudejumūs, lai jymūs, kai škeistejūšā gunī, es tyktu nūryudeits, napakrystu un natyktu salauzts. Dūd maņ labsirdeibu, lai es labprōt kolpōtu tyvōkam un, cik maņ ir spāka, nastu prīcu; dori, lai es byutu laipns un sirsneigs sadzeivē ar cylvākim un byutu izprateigs jū vōjumūs.
Dūd maņ prōta dōvonu, lai es nikō naapdūmeigi narunōtu un nadareitu, un apbruņoj mani ar stypru ticeibu, lai es nikod nasašaubeitu par Tovu patīseibu; dūd arī uzticeibu ļaudim, lai es, pat pīdzeivōjis viļšonūs, nasašaubeitu par vysu ļaužu krītnumu un taisneigumu. Dūd maņ kauneibu dūmōs un vysā izaturēšonā, lai es byutu pīmārs cytim, lai es mōcātu īgrūžōt munas kōreibas un byutu pīticeigs vysōs munōs vajadzeibōs. Dūd škeisteibu vysai munai byuteibai, lai es nikod nasazīstu dvēseles navaineibu un taidā veidā nūpeļneitu redzēt Tevi, munu Dīvu, laimeigā myužeibā. Amen.
SVĀTŌ GORA GAISMĀ...
Kungs Jezu, mes gribim un asam gotovi sludynōt pasaulē Tovu Evangeliju – pasaulē, kurā mums ir lamts dzeivōt pēc Tova mīlesteibas pylnō plāna.
Kungs, lyudz Tāvu, kai esi tū mums sūlējis, lai Jys syuta mums Svātū Goru – patīseibas, centeibas un mīrinōjuma Goru, lai Tys dareitu myusu līceibas skaidras un īdarbeigas.
Kungs, mes Tevi lyudzam, palīc vysod ar mums, apvīnoj myusus vysus Sevī un dori myusus spējeigus nest pasaulē tōlōk Tovu mīru un pesteišonu.
(pēc Pōvula VI)
Dīvs Svātais Gors,atver munas ausis, lai es varu dzērdēt Tovu vēsti; atver munas acis, lai es varu redzēt Tovas radeibas skaistumu; atver munu goru, lai es varu ticēt Tovam vōrdam.
Dīvs Svātais Gors, atver munu muti, lai es varu līcynōt par Tevi; atver munas rūkas, lai es varu sajimt Tovu paleidzeibu; atver munas jyutas, lai es mīļōtu Tovu tyvumu, atver munu sirdi, lai es sajustu Tovu mīlesteibu.
(Gustave Martelet)
