Моли́тва ѡ҆ є҆́же во ст҃о́мъ соедине́нїи непоколеби́мо ста́ти.

Гдⷭ҇и І҆и҃се Хрⷭ҇тѐ Бж҃е на́шъ! бл҃годари́мъ тѧ̀, ꙗ҆́кѡ спасе́нїѧ на́шегѡ ра́ди Цр҃ковь твою̀ ст҃ꙋ́ю прече́стною Кро́вїю твое́ю и҆скꙋпле́ннꙋю на ѡ҆снованїи А҆пⷭ҇тѡлъ твои́хъ созда́ти, корми́ло є҆ѧ̀ первѣ́йшемꙋ ѿ ни́хъ, А҆пⷭ҇лꙋ Петрꙋ̀ ввѣ́рити и҆ до не́й всѣ́хъ хотѧ́щихъ спасти́сѧ зва́ти бл҃говоли́лъ є҆сѝ, да та́кѡ бꙋ́детъ є҆ди́но ста́до и҆ є҆ди́нъ па́стырь. Къ тебѣ́ ᲂу҆бѡ припада́емъ, ᲂу҆слы́ши Гдⷭ҇и моле́нїѧ на́ша, и҆ спасѝ Вселе́н̾скаго А҆рхїере́ѧ Ри́мскагѡ (и҆́мⷬ҇къ), є҆го́же и҆́стиннымъ А҆по́столомъ Петра̀ преемни́комъ бы́ти, и҆ ѡ҆ все́й Це́ркви твое́й попече́нїе и҆мѣ́ти сподо́билъ є҆сѝ. Сохранѝ є҆го̀ въ ми́рѣ, цѣ́ла, че́стна, здра́ва, долгоде́н̾ствꙋюща, и҆ правопра́вѧща сло́во твоеѧ̀ и҆́стины. Помѧни́же Гдⷭ҇и и҆ бг҃олюби́выѧ Е҆пⷭ҇пы и҆ презвѵ́теры, и҆̀хже посла́лъ є҆сѝ наꙋча́ти ве́сь мі́ръ заповѣ́демъ твои́мъ, и҆ соверша́ти та̑йны ст҃ы́ѧ, пребꙋ́ди ᲂу҆бѡ съ ни́ми во всѧ̀ днѝ до сконча́нїѧ вѣ́ка. Заблꙋ́ждшїѧ ѿ правовѣ́рїѧ къ позна́нїю и҆́стинны призовѝ, и҆ є҆ди́ной твое́й Це́рквѣ присовокꙋпѝ, на́съ же всѣ́хъ въ соеди́ненїи тоѧ́жде Це́ркве благода́тїю твое́ю ᲂу҆твердѝ и҆ помножествꙋ̀ милосе́рдїѧ твоегѡ̀ да́же до сконча́нїѧ жи́тїѧ на́шегѡ сохранѝ. Моли́твами Пречи́стыѧ твоеѧ̀ Ма́тере при́снѡ Дѣ́вы Ма́рїи и҆ всѣ́хъ Ст҃ы́хъ. А҆ми́нь.

Збережено орфографію оригіналу