Чи́нъ Бл҃гослове́нїѧ кꙋ́пели ры́бныѧ и҆ ры́бъ.

Гдⷭ҇ꙋ помо́лимсѧ. Ли́къ: Гдⷭ҇и поми́лꙋй.

Всемогі́й, предвѣ́чный Бж҃е, Ѻ҆́ч҃е Гдⷭ҇а на́шегѡ І҆и҃са Хрⷭ҇та̀, Ѻ҆́ч҃е милосе́рдїѧ, и҆зволи́вый въ рѣка́хъ и҆ мо́ри расти́тисѧ и҆ мно́житисѧ ры́бамъ: пода́ждь мо́лимтисѧ, да сїѧ̀ малы́ѧ ры̑бицы, въ сїю̀ кꙋ́пель всажде́нныѧ, блгⷣтїю твое́ю ᲂу҆множи́ти, и҆ растѝ и҆̀мъ и҆зволи́ши. Ꙗ҆́кѡ ты̀ є҆сѝ Бг҃ъ на́шъ, и҆ тебѣ̀ сла́вꙋ возсыла́емъ: Ѻ҆ц҃ꙋ̀, и҆ Сн҃ꙋ, и҆ ст҃о́мꙋ Дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Та́же блгⷭ҇влѧ́етъ кꙋ́пель, глаго́лѧ.

Расти́те и҆ множи́тисѧ вы̀ малы́ѧ ры̑бицы, и҆ и҆сполнѧ́йте сїю̀ кꙋ́пель: въ И҆́мѧ Ѻ҆ц҃а̀, ✠, и҆ Сн҃а, ✠ и҆ ст҃а́гѡ Дх҃а. ✠ Гдⷭ҇ь, да да́сть ва́мъ своѐ благослове́нїе. ✠ А҆ми́нь.

Гдⷭ҇ꙋ помо́лимсѧ. Ѿвѣ́тъ: Гдⷭ҇и поми́лꙋй.

Бж҃е всемогі́й, семꙋ̀ созда́нїю ры́бъ, въ нача́тцехъ мі́ра, ѿ волне́нїй во́дныхъ произы́йти повелѣ́вый, є҆́же меⷤдꙋ про́чїими боре́н̾ми ᲂу҆сты̀ свои́ми Бжⷭ҇тве́нными и҆зволи́лъ є҆сѝ блгⷭ҇ви́ти: и҆ ѿ є҆гѡ́же по се́мъ є҆диноро́дный Сн҃ъ тво́й, пре́дъ Оу҆́ченики свои́ми пече́ныѧ ѻ҆гне́мъ ꙗ҆́сти восхотѣ̀, въ є҆́же и҆зобрази́ти на́мъ бо́лѣзни своеѧ̀ Стра̑сти: бл҃гословѝ ✠ та́кожде пи́щꙋ сїю̀ ры́бъ, и҆ пода́ждь на́мъ, да и҆́же ѿ Стра́сти Гдⷭ҇а на́шегѡ, І҆и҃са Хрⷭ҇та̀, и҆ пла́мене бо́лѣзнїй и҆спече́ни є҆смы̀, ѿ неизрече́ннагѡ є҆гѡ Воскресе́нїѧ ѡ҆хла́жде́ни, хлѣ́бомъ весели́мсѧ нбⷭ҇нымъ. Ꙗ҆́кѡ твоѐ є҆сть Црⷭ҇тво, и҆ си́ла, и҆ сла́ва: Ѻ҆ц҃а̀, и҆ Сн҃а, и҆ ст҃а́гѡ Дх҃а: ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Кро́питъ водо́ю сщ҃е́нною.