Чи́нъ Бл҃гослове́нїю Пивни́цы.
І҆ере́й начина́етъ.
Благослове́нъ Бг҃ъ на́шъ:
Посе́мъ Е҆кте́нїа вели́каѧ. По Е҆кте́нїи.
Гдⷭ҇ꙋ помо́лимсѧ. Ли́къ: Гдⷭ҇и поми́лꙋй.
Гдⷭ҇и Бж҃е, Ѻ҆́ч҃е Всемогі́й, всѣ́хъ сті́хїй ᲂу҆станови́телю, и҆ Тво́рче всѣ́хъ требова́нїй ро́да члв҃ческагѡ, и҆́же Моѷсе́омъ рабо́мъ твои́мъ рекі́й: А҆́ще послꙋша́еши гла́са Гдⷭ҇а Бг҃а твоегѡ̀ ниспосле́тъ Гдⷭ҇ь бл҃гослове́нїе на вїнѧ́рнѧ твоѧ̀, и҆ на всѧ̀ дѣла̀ рꙋ́къ твои́хъ. Ми́лисѧ тебѣ̀ дѣ́емъ, да ᲂу҆слыша́вше молє́нїѧ на́ша, храни́лницꙋ сїю̀ всѧ́кагѡ пи́тїѧ, и҆ всѧ̑ ꙗ҆̀же въ не́й сꙋ́ть, ми́лости твоеѧ̀ воззрѣ́нїемъ благослови́ти ✠ и҆зволи́ши: ѡ҆ є҆́же ѿ не́ѧ всѣ́хъ дꙋ́хѡвъ нечи́стыхъ наи́тїю ѿстꙋпи́ти, да ѿ не́ѧ ничто́же нача́лникъ всѧ́кїѧ ѕло́бы дерзне́тъ воспрїѧ́ти, и҆ нѝ кое́гѡ ѕла̀ въ не́й твори́тъ, и҆ ко́йждо въ сїѐ храни́лище входѧ́й, и҆ всѐ є҆́же въ не́й положе́нно бꙋ́детъ благода́тїю сегѡ̀ твоегѡ̀ бл҃гослове́нїѧ ✠ сохране́нно ѡ҆брѧще́тсѧ, всѧ̑ же ѕла̑ твое́ю по́мощїю ѿ сеѧ̀ храни́лницы дале́че да и҆збѣ́гнꙋтъ. Ꙗ҆́кѡ ты̀ є҆сѝ благословлѧ́й, и҆ ѡ҆сщ҃а́ѧй всѧ́чєскаѧ Хрⷭ҇тѐ Бж҃е на́шъ, и҆ тебѣ̀ сла́вꙋ возсыла́емъ Ѻ҆ц҃ꙋ̀, и҆ Сн҃ꙋ, и҆ ст҃о́мꙋ Дх҃ꙋ: ны́нѣ и҆ при́снѡ и҆ во вѣ́ки вѣкѡ́въ. А҆ми́нь.
Та́же Ѱало́мъ а҃.
Бл҃женъ мꙋ́жъ, и҆́же не и҆де́тъ на совѣ́тъ нечести́выхъ и҆ на пꙋ́ти грѣ́шныхъ неста̀: и҆ на сѣда́лищи гꙋби́тєль несѣдѐ: Но въ за́конѣ Гдⷭ҇ни во́лѧ є҆гѡ̀ поꙋчи́тсѧ де́нь и҆ но́щь. И҆ бꙋ́детъ ꙗ҆́кѡ дре́во сажде́нно при и҆схо́дищихъ во́дъ: є҆́же пло́дъ сво́й да́стъ въ вре́мѧ своѐ. И҆ ли́стъ є҆гѡ̀ не ѿпа́детъ: и҆ всѧ̑ є҆ли̑ка а҆́ще тво́ритъ, ᲂу҆спѣ́етъ. Не та́кѡ нечести́вїи, не та́кѡ, но ꙗ҆́кѡ пра́хъ є҆го́же возмѣта́етъ вѣ́тръ ѿ лица̀ землѝ. Сегѡ̀ ра́ди не воскре́снꙋтъ нечести́вїи на сꙋ́дъ: ни грѣ́шницы въ совѣ́тъ пра́ведныхъ и҆ пꙋ́т̾ нечести́выхъ поги́бнетъ.
Сла́ва: И҆ ны́нѣ:
Е҆ѵⷢ҇лїе ѿ Лꙋкѝ. За́ч: к҃а.
Во вре́мѧ ѻ҆́но⁖ Пристꙋпи́вше къ І҆и҃сꙋ Фарїсе́є, рѣ́ша къ не́мꙋ, почто̀ ᲂу҆́ченицы І҆ѡа́нновы постѧ́тсѧ ча́сто, и҆ моли́твы творѧ́тъ та́кожде и҆ Фарїсе́йстїи, а҆ твоѝ ꙗ҆дѧ́тъ и҆ пїю́тъ. Ѻ҆́нъ же речѐ къ ни́мъ: є҆да̀ мо́жете сы́ны бра́чныѧ, донде́же жени́хъ съ ни́ми є҆́сть, сотвори́ти по́ститисѧ, прі́йдꙋтъ же дні́е, є҆гда̀ ѿѧ́тъ бꙋ́детъ ѿ ни́хъ жени́хъ, и҆ тогда̀ по́стѧтсѧ въ ты́ѧ днѝ. Гл҃а́шеже и҆ при́чтꙋ къ ни́мъ, ꙗ҆́кѡ никто́же приставле́нїѧ ри́зы но́вы приставлѧ́етъ на ри́зꙋ ве́тхꙋ: а҆́щеже нѝ, и҆ но́вꙋю раздира́етъ, и҆ ве́тсѣй не согласꙋ́етъ є҆́же ѿ нова́гѡ. И҆ никто́же влива́етъ вїна̀ но́ва въ мѣ́хи ве́тхи: а҆́щеже нѝ, расто́ргнетъ но́вое вїно̀ мѣ́хи и҆ само̀ и҆злїе́тсѧ, и҆ мѣ́си поги́бнꙋтъ: но вїно̀ ново́е въ мѣ́хи но́вы влива́ти досто́итъ: и҆ ѻ҆бо́ѧ соблюдꙋ́тсѧ. И҆ никто́же пи́въ ве́тхое, а҆́бїе хо́щетъ но́вагѡ: гл҃етъ бо: ве́тхое лꙋ́чшее є҆́сть.
Гдⷭ҇ꙋ помо́лимсѧ. Ли́къ: Гдⷭ҇и поми́лꙋй.
Влⷣко І҆и҃се Хрⷭ҇тѐ, и҆́же въ Ка́нѣ Галїле́йстѣй во́дꙋ въ вїно̀ претвори́вый, ᲂу҆множѝ на ны̀ млⷭ҇рдїе твоѐ и҆ благословѝ ✠ и҆ ѡ҆ст҃ѝ ✠ сїе созда́нїе пи́тїѧ: да всѧ́къ ѿ негѡ̀ прїемлѧ́й, твоегѡ̀ Бж҃їѧ бл҃гослове́нїѧ ✠ бога́тства и҆сполни́тсѧ, тѣлесѝ здра́вїе, и҆ дш҃и храни́ло полꙋ́читъ. Ꙗ҆́кѡ подоба́етъ тебѣ̀ всѧ́каѧ сла́ва, че́сть, и҆ поклоне́нїе Ѻ҆ц҃ꙋ̀, и҆ Сн҃ꙋ, и҆ ст҃о́мꙋ Дх҃ꙋ: ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.
Кро́питъ водо́ю сщ҃е́нною.
Збережено орфографію оригіналу
