Благослове́нїе и҆́дꙋщимъ на̀ ловле́нїе ры́бъ.
Блгⷭ҇ве́нъ Бг҃ъ нш҃ъ: Трⷭ҇то́е: по̀ Ѻ҆́ч҃е нш҃ъ: Ꙗ҆́кѡ твоѐ є҆́ст̾ Цртⷭ҇во: Гдⷭ҇и пом҃лꙋй, Сла́ва: И҆́ нн҃ѣ:
Прїйдѣ́те поклонѣ́м̾сѧ, гⷤ.
Та́же, Ѱало́мъ и҃.
Гдⷭ҇и, Гдⷭ҇и нш҃ъ, ко́ль чꙋ́дно И҆́мѧ твоѐ по̀ все́й землѝ; Ꙗ҆́кѡ взѧ́тсѧ велелѣпота̀ твоѧ̀ превы́шше Нб҃съ. И҆́зъ ᲂу҆́стъ млⷣнєцъ и҆ с̾сꙋщих̾ соверши́лъ є҆сѝ хва́лꙋ вра́гъ твои́хъ ра́ди: да̀ раздрꙋши́ши врага̀ и҆ ме́стника. Ꙗ҆́кѡ ᲂу҆зрю̀ Нб҃са̀, дѣ́ла рꙋ́къ твои́хъ: Лꙋнꙋ̀ и҆ звѣ́зды, ꙗ҆́же ты̀ ѡ҆снова́лъ є҆сѝ. Что̀ є҆́ст̾ члв҃къ, ꙗ҆́кѡ помни́ши є҆го̀; и҆лѝ сы́нъ члв҃чъ, ꙗ҆́кѡ посѣща́еши є҆го̀; Оу҆мали́лъ є҆сѝ є҆го̀ малы́мъ чи́мъ ѿ А҆́гг҃лъ, сла́вою и҆ че́стїю вѣнча́лъ є҆сѝ є҆го̀: и҆ поста́вилъ є҆сѝ є҆го̀ наⷣ дѣ́лы рꙋ́кꙋ твое́ю. Всѧ̀ покориⷧ҇ є҆сѝ поⷣ но́зѣ є҆гѡ̀, о҆́вцѧ и҆ волы̀ всѧ̀, є҆щеже и҆ ско́ты полевы́ѧ. Пти́цѧ Нбⷭ҇ныѧ, и҆ Ры́бы мо́рскїѧ, преходѧ́щїѧ стезѧ̀ мо́рскїѧ. Гдⷭ҇и Гдⷭ҇и на́шъ, ꙗ҆́кѡ ч◌ꙋ́дно И҆́мѧ твоѐ по̀ все́й землѝ.
Сла́ва: И҆́ нн҃ѣ:
Гдⷭ҇ꙋ пом҃ли́мсѧ. ѿвѣⷮ. Гдⷭ҇и пом҃лꙋй.
Возвели́чи, мл҃им̾тисѧ ✠ Влкⷣо и҆ Бж҃е, млрⷭ҇дїе твоѐ на̀ ны̀, и҆ ꙗ҆́коже ᲂу҆множи́лъ є҆сѝ хлѣ́бы, и҆ двѣ̀ ры́бы въ пꙋсты́ни, и҆́миже напита́лъ є҆сѝ пѧ́ть ти́сѧщъ люде́й; та́кѡ и҆ нн҃ѣ, всемогꙋ́щимъ и҆ прозри́тел̾нымъ блгⷭ҇ве́нїемъ твои́мъ ✠ и҆зволѝ ᲂу҆множи́ти, къ требова́нїю члв҃ческомꙋ всѧ̀ ры́бы ѿ се́ѧ воды̀ рожде́нныѧ: да̀ твое́ю нѐ ѡ҆скꙋ́дною десни́цею наслажде́ни, тебѐ блгⷣри́ти, и҆ И҆́мѧ твоѐ все́гда славослови́ти возмо́жемъ, Гдⷭ҇емъ на́шиⷨ І҆с҃ Хс҃мъ: є҆мꙋ́же подоба́етъ всѧ́каѧ сла́ва, че́сть, и҆ поклоне́нїе, съ безнача́лнымъ Ѻ҆́ц҃емъ, и҆ Прест҃ы́мъ бл҃ги́мъ и҆ животворѧ́щим̾ Дх҃омъ:
Е҆́ѵⷢ҇лїе ѿ І҆ѡа́нна. Заⷱ҇: ѯ҃ѕ.
Въ вре́мѧ о҆́но: Ꙗ҆ви́сѧ І҆с҃ ᲂу҆́ченикѡмъ свои́мъ воста́въ ѿ ме́ртвыхъ, на̀ мо́ри тиверїа́д̾стѣмъ: ꙗ҆ви́жесѧ си́це. Бѣ́хꙋ вкꙋ́пѣ Сі́монъ Пе́тръ, и҆ Ѳома̀ нарица́емый близне́цъ, и҆ Наѳанаи́лъ, и҆́же бѣ̀ ѿ Ка́ны Галїле́йскїѧ, и҆ сн҃а Зеведе́ева, и҆ и҆́на ѿ ᲂу҆́чениикъ є҆гѡ̀ два̀. Гл҃а̀ и҆́мъ Сі́монъ Пе́тръ, и҆дꙋ̀ ры́бы лови́ти. Гл҃а́ша є҆мꙋ̀, и҆де́мъ и҆ мы̀ с̾ тобо́ю: и҆зыйдошаже и҆ всѣдо́ша а҆́бїе в̾ Кора́бль: и҆ в̾ тꙋ̀ но́щъ нѐ ꙗ҆́ша ничесо́же. Оу҆́трꙋже бы́вшꙋ, ста̀ І҆с҃ прѝ бре́зѣ, нѐ позна́шаже ᲂу҆́ченици ꙗ҆́кѡ І҆с҃ є҆́сть. Гл҃а́же и҆́мъ І҆съ, дѣ́ти, є҆да̀ что̀ снѣ́дно и҆́мате; ѿвѣща́ша є҆мꙋ̀ нѝ: ѻ҆́н̾же речѐ и҆́мъ, воверзѣ́те мре́жꙋ о҆де́снꙋю стра́ны кораблѧ̀ и҆ ѡ҆брѧ́щете. Воверго́шаже, и҆ ктомꙋ̀ неможа́хꙋ привлещѝ ю̑ ѿ множества̀ ры́бъ. Гл҃а́же ᲂу҆́ченикъ то́й, є̑го́же люблѧ́ше І҆с҃, Петро́ви, Гдⷭ҇ь є҆́сть: Сі́мѡнъже Пе́тръ слы́шавъ, ꙗ҆́кѡ Гдⷭ҇ь є҆́сть, Є҆́пендѵ́томъ препоѧса́сѧ, (бѣ̀ бо на́гъ,) и҆ в̾верже́сѧ в̾ мо́ре, а҆ дрꙋгі́и ᲂу҆́ченици корабл̾це́мъ прїйдо́ша, (нѐ бѣ́ша бо̀ дале́че ѿ землѧ̀, но̀ ꙗ҆́кѡ двѣстѣ̀ ла́ктїй) влекꙋ́ще мре́жꙋ ры́бъ. Ꙗ҆́коже и҆зидо́ша на̀ землю̀, ви́дѣша о҆́гнь лежа́щъ, и҆ ры́бꙋ на̀ не́мъ лежа́щꙋ, и҆ хлѣ́бъ. И҆ гл҃а̀ и҆́мъ І҆с҃, принесѣ́те ѿ ры́бъ ꙗ҆́же ꙗ҆́сте нн҃ѣ. Взи́деже Сі́монъ Пе́тръ, и҆ и҆звлечѐ мре́жꙋ на̀ землю̀, по́лнꙋ вели́кихъ ры́бъ, сто̀ пѧⷮдесѧ́тъ и҆ трѝ: и҆ толи́ким̾ сꙋ́щимъ, нѐ проторже́сѧ мре́жа. Гл҃а̀ и҆́мъ І҆с҃, прїйдѣ́те, ѡ҆бѣ́дꙋйте: нѝ є҆ди́нъже смѣѧ́ше ѿ ᲂу҆́ченикъ и҆стѧза́ти є҆го̀, ты̀ кто̀ є҆сѝ; вѣ́дѧще ꙗ҆́кѡ Гдⷭ҇ь є҆́сть. Прі́йдеже І҆с҃, и҆ приѧ́ть хлѣ́бъ, и҆ дадѐ и҆́мъ: и҆ ры́бꙋ та́кожде. Сѐ ᲂу҆жѐ тре́тїе ꙗ҆ви́сѧ І҆с҃ ᲂу҆́ченикѡмъ свои́мъ, воста́въ ѿ ме́ртвыхъ.
Та́же Ѱало́мъ рм҃и.
Хвали́те Гдⷭ҇а съ нб҃съ: хвали́те є҆го̀ въ вы́шнихъ. Хвали́те є҆го̀ всѝ А҆́гг҃ли є҆гѡ̀: хвали́те є҆го̀ всѧ̀ си́лы є҆гѡ̀. Хвали́те є҆го̀ сл҃нце и҆ лꙋна̀: хвали́те є҆го̀ всѧ̀ звѣ́зды и҆ свѣ́т̾. Хвали́те є҆го̀ Нб҃са̀ нб҃съ: и҆ вода̀ ꙗ҆́же превы́шше нб҃съ, да̀ восхва́лѧтъ И҆́мѧ Гдⷭ҇не. Ꙗ҆́кѡ то́й речѐ, и҆ бы́ша: то́й повелѣ̀, и҆ созда́шасѧ. Поста́ви въ вѣ́къ, и҆ въ вѣ́къ вѣ́ка: повелѣ́нїе положѝ, и҆ нѐ ми́мѡ и҆де́т̾. Хвали́те Гдⷭ҇а ѿ землѧ̀ змі́еве: и҆ всѧ̀ бе́здны. Ѻ҆́гнь, гра́дъ, снѣ́гъ, го́лоть, дꙋ́хъ бꙋ́рень, творѧ́щаѧ сло́во є҆гѡ̀. Гѡ́ры, и҆ всѝ хо́лми: дре́ва плодосно́снаѧ, и҆ всѝ Ке́дры. Звѣ́рїе, и҆ всѝ ско́ты: га́ды, и҆ пти́цѧ перна́ты. Ца́рїе зе́мстїи, и҆ всѝ лю́дїе: кнѧ́зи, и̑ всѝ сꙋ́дїе зе́мстїи. Ю҆но́ша и҆ дв҃ы, ста́рци съ ю҆́нотами, да̀ восхвалѧ́тъ И҆́мѧ Гдⷭ҇не: ꙗ҆́кѡ вознесе́сѧ И҆́мѧ тогѡ̀ є҆ди́нагѡ. И҆́сповѣда́нїе є҆гѡ̀ на̀ землѝ и҆ на̀ Нб҃сѝ: и҆ вознесе́тъ ро́гъ люді́й свои́хъ. Пѣ́снь всѣ́мъ преподо́бнымъ є҆гѡ̀: сн҃ѡ́мъ І҆и҃левымъ, людє́мъ приближа́ющиⷨсѧ є҆мꙋ҃.
Сла́ва: И҆́ нн҃ѣ:
Гдⷭ҇ꙋ пом҃ли́мсѧ. ѿвѣⷮ. Гдⷭ҇и пом҃лꙋй.
Бж҃е, є҆гѡ́же прозрѣ́нїе непрел̾ща́ет꙽сѧ, ѿ не́гѡже всѧ̀ бл҃га́ѧ прои҆схо́дѧт꙽, без̾ не́гѡже ничто́же быва́етъ: тебѐ ᲂу҆се́рднѡ про́симъ, да̀ бл҃гословлѧ́ѧ бл҃гослови́ши, ✠ Росо́ю твое́ѧ блгⷣти Нбⷭ҇ныѧ во́дꙋ сі́ю, ѡ҆ є҆́же вѣ́рнымъ твои́мъ бл҃гоꙋгоⷣнѡ мно́жество ры́бъ, ѿ не́ѧ и҆звлача́щимъ: тебѐ высоча́йшаго прави́телѧ позна́ти, люби́ти, и҆ славослови́ти. Мо́лимъ та́кожде Влкⷣо, нѐ презрѝ дѣ́ла рꙋ́къ рабѡ́въ твои́хъ, но̀ прест҃ы́мъ твои́м̾ блгⷭ҇ве́нїем̾, ✠ ѿженѝ ѿ ни́хъ всѧ́каѧ врежде́нїѧ: и҆ всѧ̀ и҆́м̾ бл҃га́ѧ да́́ти и҆зволѝ. Ꙗ҆́кѡ ты̀ є҆сѝ Цр҃ъ ми́рꙋ, и҆ тебѣ̀ сла́вꙋ возсыла́емъ: Ѻц҃ꙋ, и҆ Сн҃ꙋ, и҆ ст҃о́мꙋ Дх҃у нн҃ѣ и҆ прⷭ҇нѡ, и҆ въ вѣ́ки вѣкѡ́въ. А҆ми́нь.
Ми́ръ всѣ́м̾. Гла́вы ва́шѧ Гдⷭ҇ви преклонѣ́те.
Бж҃е, и҆́же дво́ръ Дв҃ическїй Преблгⷭ҇ве́нныѧ Мрїѧ, ѡ҆ є҆́же въ не́мъ ѡ҆бѣтати, и҆збра́ти и҆зволи́вый: пода́ждъ мо́лим̾тисѧ, да̀ твои́мъ ны̀ воѻрꙋже́нны храни́ломъ, сотвори́ти достойны блгⷣти твое́й. Ꙗ҆́кѡ подоба́етъ тѝ всѧ́каѧ сла́ва, че́сть, и҆ поклоне҆нїе: Ѻц҃ꙋ, и Сн҃ꙋ, и҆ ст҃о́мꙋ Дх҃ꙋ: нн҃ѣ и҆ прⷭ҇нѡ, и҆ въ вѣ́ки вѣкѡ́въ. А҆ми́нь.
Блгⷭ҇ве́нїе Бг҃а, Всемогꙋ́щаго Ѻ҆́ц҃а, ✠ и҆ Сн҃а, ✠ и҆ сⷮ: Дх҃а: ✠ да̀ сні́йдеⷮ на̀ водꙋ сі́ю, на̀ мре́жѧ сі́ѧ, и҆ на̀ всѣ́хъ ва́съ, и҆ пребыва́етъ все́гда. А҆ми́нь.
Кро́питъ водо́ю сщ҃енною люде́й, и во́дꙋ, и мре́жѧ.
Збережено орфографію оригіналу
