Тропарь, глас 4: Небесных воинств архистратизи, молим вас присно мы недостойнии, да вашими молитвами оградите нас кровом крил невещественныя вашея славы, сохраняюще ны припадающыя прилежно, и вопиющыя: от бед избавите ны, яко чиноначальницы вышних сил.

Богородичен, глас 4: Воспитавшейся во храме во святая святых, одеянней верою и премудростию, и безмерным девством, архистратиг Гавриил принесе с небесе целование, и еже радуйся: радуйся благословенная, радуйся препрославленная, Господь с тобою.

Кондак, глас 2: Архистратизи божии, служителие божественныя славы, ангелов начальницы и человеков наставницы, полезное нам просите и велию милость, яко безплотных архистратизи.

Тропарь, глас 2: Память праведнаго с похвалами, тебе же довлеет свидетельство господне, предтече: показал бо ся еси воистинну и пророков честнейший, яко и в струях крестити сподобился еси проповеданнаго. Темже за истину пострадав радуйся, благовестил еси и сущым во аде Бог явльшагося плотию, вземлющаго грех мира, и подающаго нам велию милость.

Богородичен, глас тойже: Божественнаго быхом общницы естества тобою, Богородице приснодево: Бога бо нам воплотившагося родила еси. Темже по долгу тя вси благочестно величаем.

Кондак, глас 3: Пророче божий, и предтече благодати, главу твою яко шипок священнейший от земли обретше, исцеления всегда приемлем: ибо паки, якоже прежде, в мире проповедуеши покаяние.

Тропарь, глас 1: Спаси Господи люди Твоя, и благослови достояние Твое, победы благоверным царем на сопротивныя даруя, и Твое сохраняя крестом Твоим жительство.

Крестобогородичен: Твое предстательство имуще, пречистая, и твоими молитвами лютых избавляеми, крестом сына твоего везде соблюдаеми, по долгу тя вси благочестно величаем.

Кондак, глас 4: Вознесыйся на крест волею, тезоименитому Твоему новому жительству щедроты Твоя даруй, Христе Боже: возвесели силою Твоею благоверных царей, победы дая им на супостаты, пособие имущым Твое оружие мира, непобедимую победу.

Тропарь, глас 3: Апостоли святии, молите милостиваго Бога, да прегрешений оставление подаст душам нашым.

Иный, святаго Николаа, глас 4: Правило веры и образ кротости, воздержания учителя, яви тя стаду твоему, яже вещей истина. Сего ради стяжал еси смирением высокая, нищетою богатая: отче священноначальниче Николае, моли Христа Бога, спастися душам нашым.

Богородичен, глас 4: Слово отчее, Христа Бога нашего, от тебе воплотившагося познахом, Богородице дево, едина чистая, едина благословенная: тем непрестанно тя воспевающе величаем.

Кондак апостолом, глас 2: Твердыя и боговещанныя проповедатели, верх ученик Твоих, Господи, приял еси в наслаждение благих Твоих и покой: болезни бо онех, и смерть приял еси паче всякаго всеплодия, едине сведый сердечная.

Иный, святаго Николаа, глас 3: В Мирех, святе, священнодействитель показался еси: христово бо, проеподобне, евангелие исполнив, положил еси душу твою о людех твоих, и спасл еси неповинныя от смерти. Сего ради освятился еси, яко великий таинник божия благодати.

Тропарь, глас 1: Спаси Господи люди Твоя, и благослови достояние Твое, победы благоверным царем на сопротивная даруя, и Твое сохраняя крестом Твоим жительство.

Крестобогородичен: Твое предстательство имуще, пречистая, и твоими молитвами лютых избавляеми, крестом сына твоего везде соблюдаеми, по долгу тя вси благочестно величаем.

Кондак, глас 4: Вознесыйся на крест волею, тезоименитому Твоему новому жительству щедроты Твоя даруй, Христе Боже: возвесели силою Твоею благоверных царей, победы дая им на супостаты, пособие имущым Твое оружие мира, непобедимую победу.

Тропарь, глас 2: Апостоли, мученицы и пророцы, святителие, преподобнии и праведнии, добре подвиг совершивший и веру соблюдшии, дерзновение имуще ко Спасу, о нас того яко блага молите спастися, молимся, душам нашым.

Другий за упокой, глас тойже: Помяни, Господи, яко благ, рабы Твоя, и елика в житии согрешиша, прости: никтоже бо безгрешен, токмо Ты, могий и преставленным дати покой.

Богородичен: Мати святая неизреченнаго света, ангельскими тя песньми почитающе, благочестно величаем.

Слава: Со святыми упокой, Христе, душы раб Твоих, идеже несть болезнь, ни печаль, ни воздыхание, но жизнь безконечная.

И ныне: Яко начатки естества, насадителю твари, вселенная приносит Ти, Господи, богоносныя мученики: тех молитвами в мире глубоце церковь Твою, жительство Твое, Богородицею соблюди, многомилостиве.