БОГОРОДИЧНЫ
В неделю вечера: Богородичен, глас 1:
Чудо чудес, благодатная, к тебе зрящи тварь радуется: зачала бо еси безсеменно, и родила еси неизреченно, егоже чиноначалия ангелов видети не могут: того моли о душах наших.Во вторник и четверток вечера:
Крестобогородичен, глас 1:
Твое предстательство имуще, пречистая, и твоими молитвами лютых избавляеми, крестом сына твоего везде соблюдаеми, по долгу тя вси благочестно величаем.Богородичен, глас 2:
Благоутробия сущи источник, милости сподоби нас, Богородице, призри на люди согрешившыя, яви яко присно силу твою: на тя бо уповающе, радуйся, вопием ти, якоже иногда Гавриил, безплотных архистратиг.Крестобогородичен, глас 2:
Препрославлена еси, Богородице дево, поем тя: кресто бо сына твоего низложися ад, и смерть умертвися, умерщвленнии востахом, и живота сподобихомся, рай восприяхом древнее наслаждение. Тем благодаряще славословим, яко державнаго Христа Бога нашего, и единаго многомилостиваго.Богородичен, глас 3:
Красоте девства твоего, и пресветлой чистоте твоей Гавриил удивися, вопияше ти, Богородице: кую ти похвалу принесу достойную; что же возъименую тя; недоумеваю и ужасаюся. Темже яко повелен бых, вопию ти: радуйся, благодатная.Крестобогородичен, глас 3:
Жезл силы стяжавшии, крест сына твоего, Богородице, тем низлагаем врагов шатания, любовию тя непрестанно величающе.Богородичен, глас 4:
Воспитавшейся во храме во святая святых, одеянней верою и премудростию, и безмерным девством, архистратиг Гавриил принесе с небесе целование, и еже радуйся: радуйся благословенная, радуйся препрославленная, Господь с тобою.Крестобогородичен, глас 4:
Дево пренепорочная, Мати Христа Бога, оружие пройде твою пресвятую душу, егда распинаема видела еси волею сына и Бога твоего: егоже благословенная молящи не престай, прощение прегрешений нам даровати.Богородичен, глас 5:
Со ангелы небесная, с человеки земная, гласом радования, Богородице, вопием ти: радуйся, врата небес ширшая. Радуйся, едина земнородных спасение. Радуйся, чистая благодатная, рождшая Бога воплотившагося.Крестобогородичен, глас 5:
Крестом сына твоего, богоблагодатная, идольская прелесть вся упразднися, и демонская крепость попрася: сего ради вернии по долгу тя присно поем и благословим, и Богородицу воистинну исповедающе тя величаем.Богородичен, глас 6:
Начало спасения гавриилово провещание к деве бысть: слыша бо, еже радуйся, и не убеже целования. Не усумнеся яко Сарра в сени, но сице глаголаше: се раба господня, буди мне по глаголу Твоему.Крестобогородичен, глас 6:
Богородице дево, моли сына твоего, волею пригвоздившагося на кресте, и мир от прелести свобождшаго, Христа Бога нашего, помиловати души нашя.Богородичен, глас 7:
Богородице нескверная, сына твоего моли с горними силами, прощению прегрешений нам прежде конца дароватися, верно тя славящым.Крестобогородичен, глас 7:
Распеншагося за ны Христа Бога, и разрушившаго смерти державу, непрестанно моли, Богородице дево, да спасет душы нашя.Богородичен, глас 8:
Радуйся, ангелом радость мира приемшая. Радуйся, рождшая творца твоего и Господа. Радуйся, сподобльшаяся быти Мати божия.Крестобогородичен, глас 8:
Агнца и пастыря, и Спаса мира на кресте зрящи рождшая Тя, глаголаше слезящи: мир убо радуется, приемля избавление, утроба же моя горит, зрящи Твое распятие, еже за всех терпиши, сыне и Боже мой.
