Богородице тропарь, глас 4: К Богородице прилежно ныне притецем, грешнии и смиреннии, и припадем в покаянии, зовуще из глубины души: Владычице, помози, на ны милосердовавши: потщися, погибаем от множества прегрешений, не отврати твоя рабы тщы: тя бо и едину надежду имамы.

Таже: Не умолчим никогда, Богородице, силы твоя глаголати недостойнии: аще бо ты не бы предстояла молящи, кто бы нас избавил о толиких бед; кто же бы сохранил до ныне свободны; не отступим, Владычице, от тебе: твоя бо рабы спасаеши присно от всяких лютых.

Кондак, глас 6: Не имамы иныя помощи, не имамы иныя надежды, разве тебе, Владычице: ты нам помози, на тебе надеемся, и тобою хвалимся: твои бо есмы раби, да не постыдимся.

Безплотным тропарь, глас 4: Небесных воинств архистратизи, молим вас присно мы недостойнии, да вашими молитвами оградите нас кровом крил невещественныя вашея славы, сохраняюще ны припадающыя прилежно, и вопиющыя: от бед избавите ны, яко чиноначальницы вышних сил.

Кондак, глас 2: Архистратизи божии, служителие божественныя славы, ангелов начальницы и человеков наставницы, полезное нам просите и велию милость, яко безплотных архистратизи.

Пророком тропарь, глас 2: Пророка твоего, имя рек, память, Господи, празднующе, тем тя молим: спаси душы нашя.

Кондак, глас 4: Просветившееся духом чистое твое сердце, пророчества бысть светлейшаго приятелище: зриши бо яко настоящая далече сущая, сего ради тя почитаем, пророче блаженне, имя рек, славне.

Апостолу тропарь глас 3: Апостоле святый имя рек, моли милостиваго Бога, да прегрешений оставление подаст душам нашым.

Кондак, глас 4: Яко звезду пресветлую церковь всегда стяжа тя, апостоле, имя рек, чудес твоих многоподаванием просвещаема. Темже зовем Христу: спаси чтущих верою память Твоего апостола, многомилостиве.

Апостолом тропарь, глас 3: Апостоли святии, молите милостиваго Бога, да прегрешений оставление подаст душам нашым.

Кондак, глас 4: Лозие явистеся христова винограда, мудрии, гроздие приносяще в добродетелех, вино нам спасения источающе: егоже приемлем веселия исполняющеся, празднуем честную вашу память, в нюже молите дароватися нам велицей милости, и отпущению грехов, господни апостоли.

Святителю тропарь, глас 4: Правило веры, и образ кротости, воздержания учителя, яви тя стаду твоему, яже вещей истина: сего ради стяжал еси смирением высокая, нищетою богатая, отче священноначальниче имя рек моли Христа Бога, спастися душам нашым.

Кондак, глас 2: Божественный гром, труба духовная, веры насадителю, и отсекателю ересей, Троицы угодниче, великий святителю имя рек, со ангела предстоя присно, моли непрестанно о всех нас.

Святителем тропарь, глас 4: Боже отец наших, творяй присно с нами по Твоей кротости, не отстави милость Твою от нас: но молитвами их в мире управи живот наш.

Кондак, глас 8: Яко добродетелей учителие, и иерархов украшение, церковь поющи вас славит: молитвами вашими подайте чтущым вас любовию, добродетелей исправление, и соблазнов избавление, яко непобедимии.

Преподобному тропарь, глас 8: В тебе, отче, известно спасеся, еже по образу: приим бо крест последовал еси Христу, и дея учил еси презирати убо плоть, преходит бо: прилежати же о души вещи безсмертней. Темже и со ангелы срадуется, преподобне имя рек, дух твой.

Кондак, глас 2: Чистотою душевною божественно вооружився, и непрестанныя молитвы, яко копие вручив крепко, пробол еси бесовская ополчения, имя рек, отче наш, моли непрестанно о всех нас.

Преподобным тропарь, глас 4: Боже отец наших, творяй присно с нами по Твоей кротости, не отстави милость Твою от нас: но молитвами их в мире управи живот наш.

Кондак, глас 2: Волнений множество неблажно проходяще, безплотныя враги струями слез ваших крепко погрузили есте, богомудрии и преподобнии: и чедус дар приимше, молите непрестанно о всех нас.

Мученику тропарь, глас 4: Мученик Твой, Господи, имя рек, во страдании своем венец прият нетленный от Тебе Бога нашего: имеяй бо крепость Твою, мучителей низложи, сокруши и демонов немощныя дерзости. Того молитвами спаси душы нашя.

Кондак, глас 2: Звезда светлая явилася еси, непрелестная мирови, солнце Христа возвещающи, зарями твоими, страстотерпче имя рек, и прелесть погасил еси всю: нам же подаеши свет, моляся непрестанно о всех нас.

Мучеником тропарь, глас 4: Мученицы Твои, Господи, во страданиих своих венцы прияша нетленныя от Тебе Бога нашего: имуще бо крепость Твою, мучителей низложиша, сокрушиша и демонов немощныя дерзости. Тех молитвами спаси душы нашя.

Или сей, глас 1: Болезньми святых, имиже о тебе пострадаша, умолен буди, Господи, и вся нашя болезни исцели, человеколюбче, молимся.

Кондак, глас 2: Светильницы светлии явльшеся, божественнии мученицы, тварь всю светлостию чудес озаряете, недуги разрешающе, и глубокую тьму всегда отгоняюще, Христу Богу молящеся непрестанно о всех нас.

Священномученику тропарь, глас 4: И нравом причастник, и престолом наместник апостолом быв, деяние обрел еси, богодуховенне, в видения восход: сего ради слово истины исправляя, и веры ради пострадал еси даже до крове, священномучениче, имя рек, моли Христа Бога, спастися душам нашым.

Кондак, глас 4: Во святителех благочестно пожив, и мучения путь прошед, идольския угасил еси жертвы, и поборник быв твоему стаду, богомудре. Темже тя почитающе, тайно вопием ти: от бед избави ны присно твоими мольбами, отче наш имя рек.

Священномучеником тропарь, глас 4: Боже отцев наших, творяй присно с нами по Твоей кротости, не отстави милость Твою от нас: но молитвами их в мире управи живот наш.

Кондак, глас 3: Яко светильницы незаходимии разумнаго солнца, сошедшеся днесь восхвалим песньми, возсияли бо есте сущым во тьме неразумия, всех созывающе к высоте благочестия, священномученицы. Тем вопием вам: радуйтеся, постников всех основание.

Преподобномученику тропарь, глас 8: В тебе, отче, известно спасеся, еже по образу: приим бо крест последовал еси Христу, и дея учил еси презирати убо плоть, преходит бо прилежати же о души вещи безсмертней. Темже и со ангелы срадуется, преподобне имя рек, дух твой.

Кондак, глас 2: Яко постника благочестна, и искусна, и страдальца произволением честна, и пустыни жителя сообразна, в песнех достойно восхвалим имя рек, приснохвальнаго: той бо змия попрал есть.

Преподобномученником тропарь, глас 4: Боже отец наших, творяй присно с нами по Твоей кротости, не отстави милость Твою от нас: но молитвами их в мире управи живот наш.

Кондак, глас 2: Волнений множество невлажно проходяще, безплотныя враги струями слез ваших крепко погрузили есте, богомудрии и преподобнии мученицы: и чудес дар приимше, молите непрестанно о всех нас.

Мученице тропарь, глас 4: Агница Твоя, Иисусе, имя рек, зовет велиим гласом: Тебе, женише мой, люблю, и Тебе ищущи страдальчествую, и сраспинаюся, и спогребаюся крещению Твоему, и стражду Тебе ради, яко да царствую в Тебе, и умираю за Тя, да и живу с Тобою: но яко жертву непорочную приими мя с любовию пожершуюся Тебе. Тоя молитвами, яко милостив, спаси душы нашя.

Кондак мученице, глас 2: Храм твой всечестный, яко цельбу душевную обрятше вси вернии, велегласно вопием ти, дево мученице имя рек, великоименитая: Христа Бога моли непрестанно о всех нас.

Преподобномученице тропарь, глас 4: Агница твоя:

Кондак, глас 4: Божественная память твоя, имя рек, днесь возсиявши явися мирови яко солнце, сказующи житие твое: ты бо воздержанием плотская двизания разориши, и страдания кровию уневестилася еси Христови. Темже хвалящыя тя избави от всяких зол, да зовем ти: радуйся, мати преподобная.

Мученицам тропарь, глас 1: Агницы словесныя, агнцу и приведостеся мучением ко Христу, течение скончавше, и веру соблюдше: темже днесь радостною душею совершаем, досточуднии, святую вашу память, Христа величающе.

Кондак, глас 4: Страстотерпиц христовых память празднуим, и верою просяще помощи, избавитися всем от всякия скорби, зовуще: Бог наш с нами, иже сих прославивый якоже изволи.

Преподобней жене тропарь, глас 8: В тебе, мати, известно спасеся, еже по образу, приимши бо крест, последовала еси Христу, и деющи учила еси презирати убо плоть, преходит бо: прилежати же о души вещи безсмертней. Темже и со ангелы срадуется, преподобная имя рек, дух твой.

Кондак, глас 2: За любовь господню, преподобная, покоя желание возненавидела еси, пощением дух твой просветивши, крепко бо звери победила еси: но молитвами твоими противных шатание разори.

Преподобным женам тропарь, глас 2: Истинному желанию уневестившеся, христославнии, и временнаго обручника отвергшеся совокупления, и добродетельными подвиги возрастше, на высоту востекосте нетления, краснодушнии и многобогатнии, столпи монашествующих жен и правило: темже о нас молите непрестанно, любовию вашу память празднующих.

Кондак, глас 2: Телеса своя постом изнуривше, и неусыпными молитвами моляще зиждителя о гресех своих, яко да приимете совершенное прощение, и приясте божественное оставление и царствие небесное: молите Христа Бога о всех нас.

Исповедником тропарь, глас 8: Православия наставниче, благочестия учителю и чистоты, вселенныя светильниче, архиереев (монашествующих) богодуховенное удобрение, имя рек, премудре, ученьми твоими вся просветил еси, цевнице духовная: моли Христа Бога, спастися душам нашым.

Кондак, глас 2: Насладився, богомудре, воздержания, и желания плотская ты успил еси, явився верою возвещаемь, и яко животадрево райское процвел еси, имя рек, отче священный.

Безмездников тропарь, глас 8: Святии безсребреницы и чудотворцы, посетите немощи нашя: туне дадите нам.

Кондак, глас 2: Благодать приимше исцелений, простираете здравие сущым в нуждах, врачеве, чудотворцы преславнии: но вашим посещением ратников дерзости низложите, мир исцеляюще чудесы.