Священник, совершив каждение и став перед святым престолом, начертает крест кадильницею, возглашая: Слава Святей, и Единосущней, и Животворящей, и Нераздельней Троице всегда, ныне и присно и во веки веков.

Лик: Аминь.

Священнослужители в алтаре: Приидите, поклонимся Цареви нашему Богу.
Приидите, поклонимся и припадем Христу Цареви нашему Богу.
Приидите, поклонимся и припадем Самому Христу, Цареви и Богу нашему.
Приидите, поклонимся и припадем к Нему.

Благослови, душе моя, Господа. [Благословен еси, Господи.] Господи Боже мой, возвеличился еси зело [Благословен еси, Господи], во исповедание и велелепоту облекся еси. Одеяйся светом, яко ризою, простирай небо, яко кожу. Покрываяй водами превыспренняя Своя, полагаяй облаки на восхождение Свое, ходяй на крилу ветреню.
Творяй ангелы Своя духи, и слуги Своя пламень огненный. Основаяй землю на тверди ея, не преклонится в век века. Бездна, яко риза, одеяние ея; на горах станут воды. [Дивна дела Твоя, Господи.] От запрещения Твоего побегнут, от Гласа грома Твоего убоятся.
Восходят горы, и низходят поля в место, еже основал еси им. Предел положил еси, его же не перейдут, ниже обратятся покрыти землю. Посылаяй источники в дебрех, посреде гор пройдут воды. Напаяют вся звери сельныя, ждут онагри в жажду свою. На тых птиц небесныя привитают, от среды камения дадят глас.
Напаяяй горы от превыспренних Своих; от плода дел Твоих насытится земля. Прозябай траву скотом, и злак на службу человеком, извести хлеб от земли. И вино веселит сердце человека, умастити лице елеем, и хлеб сердце человека укрепит. Насытятся древа польская, кедри ливанстии, ихже еси насадил. Тамо птицы вогнездятся, еродиево жилище предводительствует ими. Горы высокия еленем, камень прибежище заяцем. Сотворил еси луну во времена, солнце позна запад свой. Положил еси тьму, и бысть нощь, в нейже пройдут вси зврие дубравнии; скимни рыкающии восхитити и взыскати от Бога пищу себе. Возсия солнце, и собрашася и влодках своих лягут. Изыдет человек на дело свое, и на делание свое до вечера.
Яко возвеличишася дела Твоя, Господи, вся премудростию сотворил еси: исполнися земля твари Твоея.
Сие море великое и пространное, тамо гади, ихже несть числа, животная малая с великими. Тамо корабли преплавают, змий сей, егоже создал еси ругатися ему. Вся к Тебе чают, дати пищу им во благо время. Давшу Тебе им соберут; отверзшу Тебе руку, всяческая исполнятся благости. Отвращу же Тебе лице, возмутятся; отымеши дух их и исчезнут, и в персть свою возвратятся. Послеши Духа Твоего, и созиждутся, и обновиши лице земли. Буди слава Господня во веки: возвеселится Господь о делех Своих. Призираяй на землю, и творяй ю трястися, прикасайся горам, и дымятся. Воспою Господеви в животе моем, пою Богу моему, дондеже есмь. Да усладится ему беседа моя; аз же возвеселюса о Господе. Да исчезнут грешницы от земли, и беззаконницы, якоже не быти им. Благослови, душе моя, Господа. [Слава Ти, Господи, сотворившему вся]

Слава Отцу и Сыну и Святому Духу, и ныне и присно и во веки веков. Аминь.
Аллилуиа, аллилуиа, аллилуиа, слава Тебе, Боже. (Трижды)

Господи, да не яростию Твоею обличиши нас, ниже гневом Твоим накажеши нас, но сотвори с нами по милости Твоей, Врачу и Исцелителю душ наших; настави нас ко пристанищу хотения Твоего, просвети очи сердец наших в познание Твоея истины: и даруй нам прочее настоящего дне мирное и безгрешное, и все время живота нашего, молитвами Святыя Богородицы и всех святых.
Яко Твоя держава, и Твое есть Царство, и сила, и слава, Отца и Сына и Духа Святаго, ныне и присно и во веки веков. Аминь.

Д.: Миром Господу помолимся.
Л.: Господи, помилуй. (На каждое прошение.)
О свышнем мире и спасении душ наших, Господу помолимся.
О мире всего мира, благостоянии святых Божиих Церквей и соединении всех, Господу помолимся.
О святем храме сем, и с верою, благоговением и страхом входящим в онь, Господу помолимся.
О великом Господине нашем Святейшем Вселенстем Архиерее (имя рек) Папе Римстем, и о Святейших Патриарсех Православных, и о Господине нашем Митрополите (или Архиепископе, или Епископе) нашем (имя рек), честнем пресвитерстве, во Христе диаконстве, о всем причте и людех, Господу помолимся.
О предержащих властех наших и о всем воинстве, Господу помолимся.
О граде сем (или о веси сей, или о святей обители сей), всяком граде, стране и верою живущих в них, Господу помолимся.
О благорастворении воздухов, о изобилии плодов земных и временех мирных, Господу помолимся.
О плавающих, путешествующих, недугующих, страждущих, плененных, и о спасении их, Господу помолимся.
О избавитися нам от всякия скорби, гнева и нужды, Господу помолимся.
Заступи, спаси, помилуй и сохрани нас, Боже, Твоею благодатию.
Пресвятую, пречистую, преблагословенную, славную Владычицу нашу Богородицу и Приснодеву Марию, со всеми святыми помянувше, сами себе, и друг друга, и весь живот наш Христу Богу предадим.
Л.: Тебе, Господи.
Св.: Яко подобает Тебе всякая слава, честь и поклонение, Отцу и Сыну и Святому Духу, ныне и присно и во веки веков.
Л.: Аминь.

Блажен муж, иже не иде на совет нечестивых. Аллилуиа (3).
Яко весть Господь путь праведных, и путь нечестивых погибнет. Аллилуиа (3).
Работайте Господеви со страхом и радуйтеся Ему с трепетом. Аллилуиа (3).
Воскресни, Господи, спаси мя, Боже мой. Аллилуиа (3).
Господне есть спасение и на людех Твоих благословение Твое. Аллилуиа (3).
Слава, и ныне. Аллилуиа (3).
Аллилуиа (3). Слава Тебе Боже. (трижды).

Д.: Паки и паки миром Господу помолимся.
Л.: Господи, помилуй.
Д.: Заступи, спаси, помилуй и сохрани нас, Боже, Твоею благодатию.
Л.: Господи, помилуй.
Д.: Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе, и друг друга, и весь живот наш Христу Богу предадим.
Л.: Тебе, Господи.
Св.: Яко Твоя держава, и Твое есть Царство, и сила, и слава, Отца и Сына и Святаго Духа, ныне и присно и во веки веков.
Л.: Аминь.

1-й лик: Господи, воззвах к Тебе, услыши мя; услыши мя, Господи. Господи, воззвах к Тебе, услыши мя; вонми гласу моления моего. Внегда воззвати ми к Тебе: услыши мя, Господи.
2-й лик: Да исправится молитва моя, яко кадило пред Тобою, воздеяние руку моею, жертва вечерняя. Услыши мя, Господи.

И по чину стихи: Положи Господи, хранение устом моим, и дверь ограждения о устнах моих.
Не уклони сердце мое в словеса лукавствия, непщевати вины о гресех.
С человеки делающими беззаконие, и не сочтуся со избранными их.
Накажет мя праведник милостию, и обличит мя: елей же грешнаго да не намастит главы моея.
Яко еще и молитва моя во благоволениих их, пожертвы быша при камени судии их.
Услышатся глаголи мой, яко возмогоша: яко толща земли проседеся на земли, расточиша кости их при аде.
Яко к тебе, Господи, Господи, очи мои, на тя уповах, не отъими душу мою.
Сохрани мя от сети, юже составиша ми, и от соблазн делающи беззаконие.
Падут во мрежу свою грешницы, един есмь аз, дондеже прейду.

Псалом 141. Гласом моим ко Господу воззвах, гласом моим ко Господу помолихся.
Пролию пред ним моление мое, печаль мою пред ним возвещу.
Внегда исчезати от мене духу моему, и ты познал еси стези моя.
На пути сем, по немуже хождах, скрыша сеть мне.
Смотрях одесную и возглядах, и не бе знаяй мене.
Погиве бегство от мене, и несть взыскаяй душу мою.
Воззвах к тебе, Господи, рех: ты еси упование мое, часть моя еси на земли живых.
Вонми молению моему, яко смирихся зело.
Избави мя от гонящих мя, яко укрепишася паче мене.

На 10 стихов (стихир): Изведи из темницы душу мою, исповедатися Имени Твоему.
Мене ждут праведницы, дондеже воздаси мне.
На 8: Из глубины воззвах к Тебе, Господи, Господи, услыши глас мой.
Да будут уши Твои внемлюще гласу моления моего.
На 6: Аще беззакония назриши, Господи, Господи, кто постоит? Яко у Тебе очищение есть.
Имене ради Твоего потерпех Тя, Господи, потерпе душа моя в слово Твое, упова душа моя на Господа.
На 4: От стражи утренния до нощи, от стражи утренния, да уповает Израиль на Господа.
Яко у Господа милость, и многое у Него избавление: и Той избавит Израиля от всех беззаконий его.

Псалом 116: Хвалите Господа все языцы, похвалите Его вси людие.
Яко утвердися милость Его на нас, и истина Господня пребывает во век.

Слава, и ныне. Догматик или стихира.

Д.: Господу помолимся.
Св.: Вечер, и заутра, и полудне, хвалим, благословим, благодарим и молимся Тебе, Владыко всех: исправи молитву нашу, яко кадило пред Тобою, и не уклони сердец наших в словеса, или в помышления лукавствия, но избави нас от всех ловящих душы нашя, яко к Тебе, Господи, Господи, очи наши, и на Тя уповахом, да не посрамиши нас, Боже наш.
Яко подобает Тебе всякая слава, честь и поклонение, Отцу и Сыну и Святому Духу, ныне и присно и во веки веков. Аминь.
Д.: Благослови, владыко, святый вход.
Св. (благословляя): Благословен вход святых Твоих, всегда ныне и присно и во веки веков.

Д.: Премудрость, прости.

Лик: Свете Тихий святыя славы Безсмертнаго Отца Небеснаго, Святаго, Блаженнаго, Иисусе Христе. Пришедше на запад солнца, видевше свет вечерний, поем Отца, Сына и Святаго Духа, Бога. Достоин еси во вся времена пет быти гласы преподобными, Сыне Божий, живот даяй: темже мир Тя славит.

Д.: Вонмем.
Св.: Мир всем.
Л.: И духови твоему.
Д.: Премудрость, вонмем.

Господь воцарися, в лепоту облечеся.
Л.: Господь воцарися, в лепоту облечеся. (на каждый стих).
Стих 1. Облечеся Господь в силу, и перепоясася.
Стих 2. Ибо утверди вселенную, яже не подвижится.
Стих 3. Дому Твоему подобает святыня, Господи, в долготу дний.
Д.: Господь воцарися.
Л.: В лепоту облечеся.

Се ныне благословите Господа вси раби Господни.
Стих. Стоящи во храме Господни, во дворех дому Бога нашего.

Милость Твоя, Господи, поженет мя вси дни живота моего.
Стих. Господь пасет мя, и ничтоже мя лишит: на месте злачне, тамо всели мя.

Боже, во Имя Твое спаси мя, и в силе Твоей суди ми.
Стих. Боже, услыши молитву мою, внуши глаголы уст моих.

Помощь моя от Господа, сотворшаго небо и землю.
Стих. Возведох очи мои в горы, отнюдуже приидет помощь моя.

Боже, Заступник мой еси Ты, и милость Твоя предварит мя.
Стих. Изми мя от враг моих, Боже, и от востающих на мя избави мя.

Д.: Рцем вси от всея души, и от всего помышления нашего рцем.
Л.: Господи, помилуй.
Д.: Господи, Вседержителю, Боже отец наших, молим Ти ся, услыши и помилуй.
Л.: Господи, помилуй.
Д.: Помилуй нас, Боже, по велицей милости Твоей, молим Ти ся, услыши и помилуй.
Л.: Господи, помилуй (Трижды, на каждое прошение).
Еще молимся о господине нашем святейшем вселенстем Архиерее (имя рек) Папе Римстем, и о господине нашем Митрополите (или Архиепископе, или Епископе нашем) (имя рек), и всей во Христе братии нашей.
Еще молимся о предержащих властех наших, и о всем воинстве.
Еще молимся о блаженных и приснопамятных создателех святаго храма сего (если в монастыре: святыя обители сея), и о всех преждепочивших отцех и братиях, зде лежащих и повсюду, православных.
Еще молимся о милости, жизни, мире, здравии, спасении, посещении, прощении и оставлении грехов рабов божиих братии святаго храма сего (если в монастыре: святыя обители сея).
Еще молимся о плодоносящих и добродеющих во всятем и всечестнем храме сем, труждающихся, поющих и предстоящих людех, ожидающих от Тебе великия и богатыя милости.
Св.: Яко милостив и человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков.
Л.: Аминь.

Д.: Исполним вечернюю молитву нашу Господеви.
Л.: Господи, помилуй.
Д.: Заступи, спаси, помилуй и сохрани нас, Боже, Твоею благодатию.
Л.: Господи, помилуй.
Д.: Вечера всего совершенна, свята, мирна и безгрешна у Господа просим.
Л.: Подай, Господи. (на каждое прошение).
Ангела мирна, верна наставника, хранителя душ и телес наших, у Господа просим.
Прощения и оставления грехов и прегрешений наших, у Господа просим.
Добрых и полезных душам нашим и мира мирови, у Господа просим.
Прочее время живота нашего в мире и покаянии скончати, у Господа просим.
Христианския кончины живота нашего, безболезнены, непостыдны, мирны, и добраго ответа на страшнем судищи Христове, просим.
Д.: Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе, и друг друга, и весь живот наш Христу Богу предадим.
Л.: Тебе, Господи.
Св.: Яко Благ и Человеколюбец Бог еси, и Тебе славу возсылаем, Отцу и Сыну и Святому Духу, ныне и присно и во веки веков.
Л.: Аминь.

Св.: Мир всем.
Л.: И духови твоему.
Д.: Главы ваша Господеви приклоним.
Л.: Тебе, Господи.

Св.: Господи Боже наш, приклонивый небеса и сошедый на спасение рода человеческаго, призри на рабы Твоя и на достояние Твое, Тебе бо Страшному и Человеколюбцу Судии Твои раби подклониша главы, своя же покориша выя, не от человек ожидающе помощи, но Твоея ожидающе милости и Твоего чающе спасения: яже сохрани на всякое время, и по настоящем вечере, и в приходящую нощь, от всякаго врага, от всякаго противнаго действа диавольскаго, и от помышлений суетных, и воспоминаний лукавых.
Возглас: Буди держава Царствия Твоего благословена и препрославлена, Отца и Сына и Святаго Духа, ныне и присно и во веки веков.
Л.: Аминь.

Д.: Спаси, Боже, люди Твоя и благослови достояние Твое, посети мир Твой милостию и щедротами, возвыси рог христиан православных и низпосли на ны милости Твоя богатыя; молитвами Всепречистыя Владычицы нашея Богородицы и Приснодеы Марии; силою честнаго и животворящаго Креста; предстательствы Честных Небесных Сил Безплотных: Честнаго Славнаго Пророка, Предтечи и Крестителя Иоанна; святых славных и всехвальных Апостол; (или святаго апостола и евангелиста имя рек, и прочиих святых славных и всехвальных Апостол), иже во святых отец наших и вселенских учителей и святителей, Василия Великаго, Григория Богослова и Иоанна Златоустаго; иже во святых отца нашего Николая, архиепископа Мирликийскаго, Чудотворца; святых равноапостольных Мефодия и Кирилла, учителей Словенских, святаго благовернаго и равноапостольнаго великаго князя Владимира, святых славных и добропобедных мучеников; святыя великомученицы Варвары; преподобных и богоносных отец наших Антониа и Феодосиа Печерских, и святаго, (имя рек, егоже есть храм, и егоже есть день), святых и праведных Богоотец Иоакима и Анны, и всех святых; молим Тя, многомилостиве Господи, услыши нас грешных молящихся Тебе, и помилуй нас.
Л.: Господи, помилуй (40 раз).
Д.: Еще молимся о господине нашем святейшем вселенстем Архиерее (имя рек) Папе Римстем, и о господине нашем Митрополите (или Архиепископе или Епископе нашем) (имя рек) [и о Архимандрите или Игумене нашем (имя рек)]; и о всем во Христе братстве нашем, и о всякой души христианстей, скорбящей же и озлобленней, милости божия и помощи требующей; о покровении града сего и живущих в нем (или веси сея и живущих в ней, или святыя обители сея и живущих в ней): о мире и состоянии всего мира; о благостоянии святых божиих церквей; о спасении и помощи со тщаянием и страхом божиим труждающихся, и служащих отец и братий наших; о оставльшихся и во отшествии сущих; о исцелении в немощех лежащих; о успении, ослабе, блаженней памяти и оставлении грехов всех прежде отшедших отец и братий наших, зде лежащих и повсюду православных; о избавлении плененных, и о братиях наших в службах сущих, и о всех служащих и служивших во святем храме сем (аще во обители: во святей обители сей), рцем вси.
Лик: Господи, помилуй. (50 раз)
Д.: Еще молимся о еже сохранитися граду сему (или веси сей), и святому храму сему (аще во обители: святей обители сей), и всякому граду и стране, от глада, губительства, труса, потопа, огня, меча, нашествия иноплеменников и междоусобныя брани: о еже милостиву и благоуветливу быти благому Богу нашему, отвратити всякий гнев на ны движимый, и избавити ны от належащаго и праведнаго своего прещения, и помиловати ны.
Л.: Господи, помилуй. (трижды)
Д.: Еще молимся о еже услышати Господу Богу глас моления нас грешных, и помиловати нас.
Л.: Господи, помилуй (трижды).
Св.: Услыши ны, Боже, Спасителю наш, Упование всех концев земли и сущих в мори далече; и милостив, милостив буди, Владыко, о гресех наших, и помилуй ны. Милостив бо и человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков.
Л.: Аминь.
Св.: Мир всем.
Л.: И духови твоему.
Д.: Главы наша Господеви приклоним.
Л.: Тебе, Господи.

И всем приклоньшим главы молится священник велегласно:
Владыко Многомилостиве, Господи Иисусе Христе Боже наш, молитвами Всепречистыя Владычицы нашея Богородицы и Приснодеы Марии; силою честнаго и животворящаго Креста; предстательствы Честных Небесных Сил Безплотных: Честнаго Славнаго Пророка, Предтечи и Крестителя Иоанна; святых славных и всехвальных Апостол; (или святаго апостола и евангелиста имя рек, и прочиих святых славных и всехвальных Апостол), иже во святых отец наших и вселенских учителей и святителей, Василия Великаго, Григория Богослова и Иоанна Златоустаго; иже во святых отца нашего Николаа, архиепископа Мирликийскаго, Чудотворца; святых равноапостольных Мефодия и Кирилла, учителей Словенских, святаго благовернаго и равноапостольнаго великаго князя Владимира, святых славных и добропобедных мучеников; святыя великомученицы Варвары; преподобных и богоносных отец наших Антониа и Феодосиа Печерских, и святаго, (имя рек, егоже есть храм, и егоже есть день), святых и праведных Богоотец Иоакима и Анны, и всех святых; благоприятну сотвори молитву нашу, даруй нам оставление прегрешений наших, покрый нас кровом крилу Твоею, отжени от нас всякаго врага и супостата: умири нашу жизнь, Господи, помилуй нас и мир Твой; и спаси душы нашя, яко благ и человеколюбец.
Л.: Аминь.

Если нет литии, то по возгласе: “Буди держава” поем стихиры стиховны.

Стих 1. Господь воцарися, в лепоту облечеся.
Стих 2. Ибо утверди вселенную, яже не подвижится.
Стих 3. Дому Твоему подобает святыня, Господи, в долготу дний

Стих 1. К Тебе возведох очи мои, живущему на небеси. Се, яко очи раб в руку господий своих, яко очи рабыни в руку госпожи своея: тако очи наши ко Господу Богу нашему, дондеже ущедрит ны.
Стих 2. Помилуй нас, Господи, помилуй нас, яко по многу исполнихомся уничижения: наипаче наполнися душа наша поношения гобзующих, и уничиженя гордых.

Чтец: Святый Боже, Святый Крепкий, Святый Безсмертный, помилуй нас. (Трижды).
Слава Отцу и Сыну и Святому Духу, ныне и присно и во веки веков. Аминь.
Пресвятая Троице помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, Имене Твоего ради.
Господи, помилуй. (3). Слава, и ныне.

Отче наш, Иже еси на небесех. Да святится Имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь, и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Св.: Яко Твое есть Царство, и сила, и слава, Отца, и Сына, и Святаго Духа, ныне и присно, и во веки веков.
Л.: Аминь.

Если пост, то по Отче наш поем стихиры:
Богородице Дево, радуйся (и поклон).
Слава: Крестителю Христов, всех нас помяни, да избавимся от беззаконий наших, Тебе бо дадеся благодать молитися за ны. (и поклон).
И ныне: Молите за ны, святии Апостоли, святии вси, да избавимся от бед и скорбей; вас бо теплыя предстатели ко Спасу стяжахом. (и поклон).
Под Твое благоутробие прибегаем, Богородице, моления наша не презри во обстоянии, но от бед избави ны, едина Чистая, едина Благословенная (без поклона).

Если бдение под воскресение: Богородице Дево, радуйся, Благодатная Марие, Господь с Тобою: благословенна Ты в женах и благословен Плод чрева Твоего, яко Спаса родила еси душ наших. (Трижды).

Если под воскресенье есть празднуемый святой, то: Богородице Дево… (дважды) и тропарь святому.

Св.: Господи Иисусе Христе Боже наш, благословивый пять хлебов и пять тысящ насытивый, Сам благослови и хлебы сия, пшеницу, вино и елей; и умножи сия во граде сем (или: в веси сей, или: во святей обители сей) и во всем мире Твоем; и вкушающыя от них верныя освяти. Яко Ты еси благословляяй и освящаяй всяческая, Христе Боже наш, и Тебе славу возсылаем, со Безначальным Твоим Отцем, и Всесвятым, и Благим, и Животворящим Твоим Духом, ныне и присно и во веки веков.]

Лик.: Аминь. Буде Имя Господне благословенно от ныне и до века. (Трижды).

Благословлю Господа на всякое время, выну хвала Его во устех моих. О Господе похвалится душа моя, да услышат кротцыи, и возвеселятся. Возвеличите Господа со мною, и вознесем имя его вкупе. Взысках Господа, и услыша мя, и от всех скорбей моих избави мя. Приступите к нему и просветитеся, и лица ваша не постыдятся. Сей нищий воззва, и Господь услыша и, и от всех скорбей его спасе и. Ополчится ангел господень окрест боящихся его, и избавит их. Вкусите и видите, яко благ Господь: блажен муж, иже уповает нань. Бойтеся Господа вси святии его, яко несть лишения боящымся его. Богатии обнищаша и взалкаша: взыскающии же Господа, не лишатся всякаго блага.

Св.: Благословение Господне на вас, Того благодатию и человеколюбием, всегда, ныне и присно и во веки веков.
Л.: Аминь.

Когда утреня бывает отдельно и не соединяется с вечерней, она обычно начинается возгласом “Благословен Бог наш”. Следуют псалмы, во время коих бывает каждение; затем краткая ектения: “Помилуй нас Боже”. После – “аминь” - лик поет: “Именем Господним благослови отче”. Священник (с кадилом в руках) возглашает: “Слава Святей и Единосущней…”.

Чтец: Слава в вышних Богу, и на земли мир, в человецех благоволение. (Трижды).
Господи, устне мои отверзеши, и уста моя возвестят хвалу Твою. (Дважды).

Господи, да не яростию Твоею обличиши мене, ниже гневом Твоим накажеши мене. Яко стрелы Твоя унзоша во мне, и утвердил еси на мне руку Твою. Несть исцеления в плоти моей от лица гнева Твоего, несть мира в костех моих от лица грех моих. Яко беззакония моя превзыдоша главу мою, яко бремя тяжкое отяготеша на мне. Возсмердеша и согниша раны моя от лица безумия моего. Пострадах и слякохся до конца, весь день сетуя хождах. Яко лядвия моя наполнишася поруганий, и несть исцеления в плоти моей. Озлоблен бых и смирихся до зела, рыках от воздыхания сердца моего. Господи, пред Тобою все желание мое, и воздыхание мое от Тебе не утаися. Сердце мое смятеся, остави мя сила моя и свет очию моею, и той несть со мною. Друзи мои, и искреннии мои прямо мне прибаижишася и сташа: И ближнии мои отдалече мене сташа, и нуждахуся имущии душу мою: и ищущии злая мне, глаголаху суетная, и льстивным весь день поучахся. Аз же яко глух не слышах, и яко нем не отверзаяй уст своих. И бых яко человек не слышай, и не имый во устех своих обличения. Яко на тя, Господи, уповах, ты услышиши, Господи Боже мой. Яко рех: да не когда порадуютмися врази мои: и внегда подвижатися ногам моим, на мя велеречеваша. Яко аз на раны готов, и болезнь моя предо мною есть выну. Яко беззаконие мое аз возвещу, и попекуся о гресе моем. Врази же мои живут, и укрепишася паче мене, и умножишася ненавидящии мя без правды. Воздающии ми злая возблагая, оболгаху мя, зане гонях благостыню. Не остави мене, Господи Боже мой, не отступи от мене. Вонми в помощь мою, Господи спасения моего.
Не остави мене, Господи Боже мой, не отступи от мене.
Вонми в помощь мою, Господи спасения моего.

Боже, Боже мой, к тебе утреннюю, возжада тебе душа моя, коль множицею тебе плоть моя, в земли пусте и непроходне и безводне. Тако со святем явихся тебе, видети силу твою и славу твою. Яко лучши милость твоя паче живот, устне мои похвалите тя. Тако благословлю тя в животе моем, о имени твоем воздежу руце мои. Яко от тука и масти да исполнится душа моя, и устнама радости восхвалят тя уста моя. Аще поминах тя на постели моей, на утренних поучахся в тя: Яко был еси помощник мой, и в крове крилу твоею возрадуюся. Прильпе душа моя по тебе, мене же прият десница твоя. Тии же всуе искаша душу мою, внидут в преисподняя земли. Предадятся в руки оружия, части лисовом будут. Царь же возвеселится о Бозе: похвалится всяк кленыйся им, яко заградишася уста глаголющих неправедная.
На утренних поучахся в тя, яко был еси помощник мой, и в крове крилу твоею возрадуюся.
Прильпе душа моя по тебе, мене же прият десница твоя.

Слава, и ныне.
Аллилуиа (3), слава Тебе, Боже (трижды).
Господи, помилуй. (Трижды). Слава, и ныне.

Господи, услыши молитву мою, внуши моление мое во истине Твоей, услыши мя в правде Твоей. И не вниди в суд с рабом Твоим, яко не оправдится пред Тобою всяк живый. Яко погна враг душу мою, смирил есть в землю живот мой: посадил мя есть в темных, яко мертвыя века. И уны во мне дух мой, во мне смятеся сердце мое. Помянух дни древния, поучихся во всех делех Твоих, в творении руку Твоею поучахся. Воздех к Тебе руце мои: душа моя яко земля безводная Тебе. Скоро услыши мя, Господи, исчезе дух мой: не отврати лица Твоего от мене, и уоподоблюся низходящим в ров. Слышану сотвори мне заутра милость Твою, яко на Тя уповах. Скажи мне, Господи, путь, воньже пойду, яко к Тебе взях душу мою. Изми мя от враг моих, Господи, к Тебе прибегох. Научи мя творити волю Твою, яко Ты еси Бог мой. Дух Твой благий наставит мя на землю праву. Имене Твоего ради, Господи, живиши мя, правдою Твоею изведеши от печали душу мою; и милостию Твоею потребиши враги моя, и погубиши вся стужающия души моей, яко аз раб Твой есмь.
Услыши мя, Господи, в правде Твоей, и не вниди в суд с радом Твоим. Услыши мя, Господи, в правде Твоей, и не вниди в суд с рабом Твоим. Дух Твой Благий наставит мя на землю праву.
Слава, и ныне. Аллилуиа, аллилуиа, аллилуиа, слава Тебе, Боже. (Трижды).

Св.: Благодарим Тя, Господи Боже наш, возставившаго нас от ложей наших и вложившаго во уста наша слово хваления, еже покланятися и призывати Имя Твое святое; и молимся Твоим щедротам, яже всегда употреблял еси о нашей жизни: и ныне посли помощь Твою на предстоящыя пред лицем святыя Славы Твоея и ожидающыя от Тебе богатыя милости; и даждь им, со страхом и любовию внегда Тебе служащым, хвалити неисповедимую Твою Благость.
Яко подобает Тебе всякая слава, честь и поклонение, Отцу и Сыну и Святому Духу, ныне и присно и во веки веков. Аминь.

Владыко Боже, Святый и Непостижимый, рекий из тьмы свету возсияти, упокоивый нас в нощнем сне, и возставывий ко славословию и мольбе Твоея благости; умоляем от Своего Ти благоутробия, приими нас и ныне покланяющихся Тебе и по силе благодарящих Тя, и даруй нам вся, яже ко спасению прошения. Покажи ны сыны света и дне и наследники вечных Твоих благ. Помяни, Господи, во множестве щедрот Твоих, и вся люди Твоя, сущыя и молящыяся с нами, и всю братию нашу, яже на земли, на мори, на всяком месте владычествия Твоего, требующих Твоего человеколюбия и помощи, и всем подай великую Твою милость; да спасени душею же и телом всегда пребывающе, со дерзновением славим чудное и благословенное Имя Твое.
Яко Бог милости, щедрот и человеколюбия еси, и Тебе славу возсылаем, Отцу и Сыну и Святому Духу, ныне и присно и во веки веков. Аминь.

Благодарим Тя, Господи Боже спасений наших, яко вся твориши во благодетельство жизни нашея, да всегда к Тебе взираем, Спасу и Благодетелю душ наших; яко препокоил еси нас в мимошедшее нощи число, и воздвигл еси ны от лож наших, и поставил еси в поклонение честнаго Имене Твоего. Темже молим Тя, Господи: даждь нам благодать и силу, да сподобимся пети Тебе разумно и молитися непрестанно, во страсе и трепете свое спасение соделовающе заступлением Христа Твоего; помяни, Господи, и в нощи к Тебе вопиющыя, услыши я и помилуй, и сокруши под нозе их невидимыя и борительныя враги.
Ты бо еси Царь мира и Спас душ наших, и Тебе славу возсылаем, Отцу и Сыну и Святому Духу, ныне и присно и во веки веков. Аминь.

Боже и Отче Господа нашего Иисуса Христа, возставивый ны от ложей наших и собиравый ны в час молитвы, даждь нам благодать во отверзение душ наших, и приими наша по силе благодарения, и научи ны оправданием Твоим: зане помолитеся, якоже подобает, не вемы, аще не Ты, Господи, Святым Твоим Духом наставиши ны. Темже молимся Тебе: аще что согрешихом даже до настоящаго часа, словом, или делом, или помышлением, волею, или неволею, ослаби, остави, прости; аще бо беззакония назриши, Господи, Господи, кто постоит? Яко у Тебе избавление есть: Ты един святый, помощник державный, защититель жизни нашея, и о Тебе пение наше всегда.
Буди держава царствия Твоего благословена и препрославлена, Отца и Сына и Святаго Духа, ныне и присно и во веки веков. Аминь.

Возсияй в сердцах наших, Человеколюбче Владыко, Твоего богоразумия нетленный свет, и мысленныя наши отверзи очи во евангельских Твоих проповеданий разумение; вложи в нас и страх блаженных Твоих заповедий, да плотския похоти вся поправше, духовное жительство пройдем, вся, яже ко благоугождению Твоему, и мудрствующе и деюще.
Ты бо еси освящение и просвещение душ и телес наших, Христе Боже, и Тебе славу возсылаем, со Безначальным Твоим Отцем, и Всесвятым, и Благим, и Животворящим Твоим Духом, ныне и присно и во веки веков. Аминь.

Боже, Боже наш, умныя и словесныя составивый Силы Твоею волею, Тя молим и Тебе мили деемся: прииме наше по силе славословие, со всеми создании Твоими, и богатыми Твоея благости воздаждь дарованьми; яко Тебе преклоняется всякое колено небесных, и земных, и преисподних и всякое дыхание и создание поет непостижимую Твою Славу, Един бо еси Бог Истинный и Многомилостивый.
Яко Тя хвалят вся Силы Небесныя, и Тебе славу возсылаем, Отцу и Сыну и Святому Духу, ныне и присно и во веки веков. Аминь.

Д.: Миром Господу помолимся.
Л.: Господи, помилуй. (На каждое прошение.)
О свышнем мире и спасении душ наших, Господу помолимся.
О мире всего мира, благостоянии святых Божиих Церквей и соединении всех, Господу помолимся.
О святем храме сем, и с верою, благоговением и страхом входящим в онь, Господу помолимся.
О великом Господине нашем Святейшем Вселенстем Архиерее (имя рек) Папе Римстем, и о Святейших Патриарсех Православных, и о Господине нашем Митрополите (или Архиепископе, или Епископе) нашем (имя рек), честнем пресвитерстве, во Христе диаконстве, о всем причте и людех, Господу помолимся.
О предержащих властех наших и о всем воинстве, Господу помолимся.
О граде сем (или о веси сей, или о святей обители сей), всяком граде, стране и верою живущих в них, Господу помолимся.
О благорастворении воздухов, о изобилии плодов земных и временех мирных, Господу помолимся.
О плавающих, путешествующих, недугующих, страждущих, плененных, и о спасении их, Господу помолимся.
О избавитися нам от всякия скорби, гнева и нужды, Господу помолимся.
Заступи, спаси, помилуй и сохрани нас, Боже, Твоею благодатию.
Пресвятую, пречистую, преблагословенную, славную Владычицу нашу Богородицу и Приснодеву Марию, со всеми святыми помянувше, сами себе, и друг друга, и весь живот наш Христу Богу предадим.
Л.: Тебе, Господи.
Св.: Яко подобает Тебе всякая слава, честь и поклонение, Отцу и Сыну и Святому Духу, ныне и присно и во веки веков.
Л.: Аминь.

Д.: Бог Господь, и явися нам, благословен Грядый во Имя Господне.
Л.: Бог Господь и явися нам, благословен Грядый во Имя Господне. (И далее на каждый стих).
Стих 1: Исповедайтеся Господеви, яко благ, яко в век милость Его.
Стих 2: Обыдеше обыдоша мя, и Именем Господним противляхся им.
Стих 3: Не умру, но жив буду, и повем дела Господня.
Стих 4: Камень, Егоже небрегоша зиждущии, Сей бысть во главу угла, от Господа бысть Сей, и есть дивен во очесех наших.

И поем тропарь гласа или праздника. Когда поется аллилуиа и в великую четыредесятницу, по великой ектении не поем “Бог Господь”, и тропарь, но “аллилуиа” и троичны.

Л.: Хвалите Имя Господне, хвалите, раби Господа. Аллилуиа (трижды).
Благословен Господь от Сиона, живый во Иерусалиме. Аллилуиа (трижды).
Исповедайтеся Господеви, яко Благ, яко в век милость Его. Аллилуиа (трижды).
Исповедайтеся Богу Небесному, яко в век милость Его. Аллилуиа (трижды).

Л.: Благословен еси, Господи, научи мя оправданием Твоим.
Ангельский собор удивися, зря Тебе в мертвых вменившася, смертную же, Спасе, крепость разоривша, и с Собою Адама воздвигша, и от ада вся свободиша.
Благословен еси, Господи, научи мя оправданием Твоим.
Почто мира с милостивыми слезами, о ученицы, растворяете, блистайся во гробе ангел мироносицам вещаше: видите вы гроб и уразумейте: Спас бо воскресе от гроба.
Благословен еси, Господи, научи мя оправданием Твоим.
Зело рано мироносицы течаху ко гробу Твоему рыдающия, но предста к ним ангел и рече: рыдания время преста, не плачите, воскресение же апостолом рцыте.
Благословен еси, Господи, научи мя оправданием Твоим.
Мироносицы жены с миры пришедшия ко гробу Твоему, Спасе, рыдаху, ангел же к ним рече глаголя: что с мертвыми живаго помышляете, яко Бог бо воскресе от гроба.
Слава: Поклонимся Отцу, и Его Сынови, и Святому Духу, Святей Троице во единем существе, с серафимы зовуще: свят, свят, свят еси, Господи.
И ныне: Жизнодавца рождши, греха, Дево, Адама избавила еси, радость же Еве в печали место подала еси, падшия же от жизни, к сей направи, из Тебе воплотивыйся Бог и человек.
Аллилуиа (3), слава Тебе, Боже. (трижды).

Д.: Паки и паки миром Господу помолимся.
Л.: Господи, помилуй.
Д.: Заступи, спаси, помилуй и сохрани нас, Боже, Твоею благодатию.
Л.: Господи, помилуй.
Д.: Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе, и друг друга, и весь живот наш Христу Богу предадим.
Л.: Тебе, Господи.
Св.: Яко благословися Имя Твое, и прославися царство Твое, Отца и Сына и Святаго Духа, ныне и присно, и во веки веков.
Л.: Аминь.

Л.: От юности моея мнози борют мя страсти, но Сам мя заступи и спаси, Спасе мой.
Слава: Ненавидящии Сиона, посрамитеся от Господа, яко трава бо огнем будете изсохше.
И ныне: Святым Духом всяка душа живится, и чистотою возвышается, светлеется Троическим единством, священнотайне.

Глас 1: Ныне воскресну, глаголет Господь, положуся во спасение, не обинюся о нем.
Глас 2: Востани, Господи Боже мой, повелением, имже заповедал еси, и сонм людей обыдет Тя.
Глас 3: Рцыте во языцех, яко Господь воцарися, ибо исправи вселенную, яже не подвижется.
Глас 4: Воскресни, Господи, и помози нам, и избави нас Имене Твоего ради.
Глас 5: Воскресни, Господи Боже мой, да вознесется рука Твоя, яко Ты царствуеши во веки.
Глас 6: Господи, воздвигни силу Твою и прииди во еже спасти нас.
Глас 7: Воскресни, Господи Боже мой, да вознесется рука Твоя, не забуди убогих Твоих до конца.
Глас 8: Воцарится Господь во век, Бог Твой, Сионе, в род и род.

Д.: Господу помолимся.
Л.: Господи, помилуй.
Св.: Яко свят еси, Боже наш, и во святых почиваеши, и Тебе славу возсылаем, Отцу, и Сыну, и Святому Духу, ныне и присно и во веки веков.
Л.: Аминь.
Д.: Всякое дыхание да хвалит Господа.
Л.: Всякое дыхание да хвалит Господа.
Стих: Хвалите Бога во Святых Его, хвалите Его во утверждении силы Его.
Посем возглашает диакон: И о сподобитися нам слышанию св. Евангелия, Господа Бога молим.
Л.: Господи, помилуй (трижды).
Д.: Премудрость, прости. Услышим святаго Евангелия.
Св.: Мир всем.
Л.: И духови твоему.
Д.: От (имя рек) святаго Евангелия чтение.
Л.: Слава Тебе, Господи, слава Тебе.
Д.: Вонмем.

Л.: Слава Тебе, Господи, слава Тебе.

Л.: Воскресение Христово видевше, поклонимся Святому Господу Иисусу, единому безгрешному. Кресту Твоему покланяемся, Христе, и Святое Воскресение Твое поем и славим: Ты бо еси Бог наш, разве Тебе иного не знаем, имя Твое именуем. Приидите вси вернии, поклонимся святому Христову воскресению: се бо прииде Крестом радость всему миру, всегда благословяще Господа, поем воскресение Его: распятие бо претерпев, смертию смерть разруши.

Помилуй мя, Боже, по велицей милости Твоей, и по множеству щедрот Твоих, очисти беззаконие мое. Наипаче омый мя от беззакония моего, и от греха моего очисти мя. Яко беззаконие мое аз знаю, и грех мой предо мною есть выну. Тебе единому согреших и лукавое пред Тобою сотворих: яко да оправдишися во словесех Твоих и победиши внегда судити ти. Се бо в беззакониих зачат есмь и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом и очищуся; омыеши мя, и паче снега убелюся. Слуху моему даси радость и веселие: и возрадуются кости смиренные. Отврати лице Твое от грех моих, и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего, и Духа Твоего Святаго не отъими от мене. Воздаждь ми радость спасения Твоего, и Духом владычным утверди мя. Научу беззаконныя путем Твоим, и нечестивии к Тебе обратятся. Избави мя от кровей, Боже, Боже спасения моего, возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу – дух сокрушен: сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношение и всесожигаемая: тогда возложат на олтарь Твой тельцы.

Л.: Слава: Молитвами апостолов, Милостиве, очисти множества согрешений наших.
И ныне: Молитвами Богородицы, Милостиве, очисти множества согрешений наших.
Помилуй мя, Боже, по велицей милости Твоей, и по множеству щедрот Твоих очисти беззаконие мое.

Слава: Покаяния отверзи ми двери, Жизнодавче, утренюет бо дух мой ко храму святому Твоему; храм носяй телесный весь осквернен: но яко щедр, очисти благоутробною Твоею милостию.
И ныне: На спасения стези настави мя, Богородице, студными бо окалях душу грехми, и в ленности все житие мое иждих.
Помилуй мя, Боже, по велицей милости Твоей, и по множеству щедрот Твоих очисти беззаконие мое.
Множества содеянных мною лютых, помышляя окаянный, трепещу страшнаго дне суднаго: но надеяся на милость благоутробия Твоего, яко Давид вопию Ти: помилуй мя, Боже, по велицей милости Твоей.

Д.: Спаси, Боже, люди Твоя и благослови достояние Твое, посети мир Твой милостию и щедротами, возвыси рог христиан православных и низпосли на ны милости Твоя богатыя; молитвами Всепречистыя Владычицы нашея Богородицы и Приснодеы Марии; силою честнаго и животворящаго Креста; предстательствы Честных Небесных Сил Безплотных: Честнаго Славнаго Пророка, Предтечи и Крестителя Иоанна; святых славных и всехвальных Апостол; (или святаго апостола и евангелиста имя рек, и прочиих святых славных и всехвальных Апостол), иже во святых отец наших и вселенских учителей и святителей, Василия Великаго, Григория Богослова и Иоанна Златоустаго; иже во святых отца нашего Николая, архиепископа Мирликийскаго, Чудотворца; святых равноапостольных Мефодия и Кирилла, учителей Словенских, святаго благовернаго и равноапостольнаго великаго князя Владимира, святых славных и добропобедных мучеников; святыя великомученицы Варвары; преподобных и богоносных отец наших Антониа и Феодосиа Печерских, и святаго, (имя рек, егоже есть храм, и егоже есть день), святых и праведных Богоотец Иоакима и Анны, и всех святых; молим Тя, многомилостиве Господи, услыши нас грешных молящихся Тебе, и помилуй нас.
Л.: Господи, помилуй (12 раз)
Св.: Милостию и щедротами и человеколюбием Единороднаго Твоего Сына, с Ним же благословен еси, со пресвятым и благим и животворящим Твоим Духом ныне, и присно и во веки веков.
Л.: Аминь.

На воскресной утрени поют большей частью катавасию “Отверзу уста моя” – ирмосы из канона Богородице, глас 4.

Песнь 1. Отверзу уста моя, и наполнятся духа, и слово отрыгну царице Матери, и явлюся светло торжествуя, и воспою радуяся Тоя чудеса.
Песнь 3. Твоя песнословцы, Богородице, живый и ненавистный источниче, лик себе совокупльшия духовно утверди в Божественней Твоей славе, венцев славы сподоби.
Песнь 4. Седяй в славе на Престоле Божества, во облаце легце, прииде Иисус Пребожественный, нетленною дланию и спасе зовущия: слава Христе, силе Твоей.
Песнь 5. Ужасошася всяческая о Божественней славе Твоей: Ты бо неискусобрачная Дево, имела еси во утробе над всеми Бога, и родила еси Безлетнаго Сына, всем воспевающим Тя мир подавающая.
Песнь 6. Божественное сие и всечестное совершающе праздненство, богомудрии, Богоматере, приидите руками восплещим, от Нея рождшагося Бога славим.
Песнь 7. Не послужиша твари богомудрии паче Создавшаго, но огненное прещение мужески поправше, радовахуся поюще: препетый отцев Господь и Бог, благословен еси.
После чтения тропарей восьмой песни канона, перед катавасией, поем:
Хвалим, благословим, покланяемся Господеви, пюще и превозносяще во вся веки.
Песнь 8. Отроки благочестивыя в пещи рождество Богородичо спасло есть: тогда убо образуемое, ныне же действуемое, вселенную всю воздвизает пети Тебе: Господа пойте дела, и превозносите Его во вся веки.
Д.: Богородицу и Матерь Света в песнех возвеличим.

1. Величит душа моя Господа, и возрадовася дух мой о Бозе, Спасе моем.
Честнейшую херувим и славнейшую без сравнения серафим, без истления Бога Слова рождшую, сущую Богородицу Тя величаем.
2. Яко призре на смирение рабы Своея: се бо отныне ублажат мя вси роди.
Честнейшую…
3. Яко сотвори мне величие Сильный, и свято имя Его, и милость Его в роды родов боящимся Его.
Честнейшую…
4. Сотвори державу мышцею Своею, расточи гордыя мыслию сердца их.
Честнейшую…
5. Низложи сильныя со престол, и вознесе смиренныя, алчущия исполни благ и богатящияся отпусти тщи.
Честнейшую…
6. Восприят Израиля отрока Своего, помянути милости, якоже глагола ко отцем нашим, Аврааму и семени его, даже до века.
Честнейшую…

Песнь 9. Всяк земнородный да взяграется, духом посещаемь, да торжествует же безплотных умов естество, почитающее священное торжество Богоматере, и да вопиет: радуйся, Всеблаженная, Богородице Чистая Приснодево.

Д.: Паки и паки миром Господу помолимся.
Л.: Господи, помилуй.
Д.: Заступи, спаси, помилуй и сохрани нас, Боже, Твоею благодатию.
Л.: Господи, помилуй.
Д.: Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе, и друг друга, и весь живот наш Христу Богу предадим.
Л.: Тебе, Господи.
Св.: Яко Тя хвалят вся силы небесныя, и Тебе славу возсылаем, Отцу, и Сыну, и Святому Духу, ныне и присно, и во веки веков.
Л.: Аминь.

(“Свят Господь Бог” поется на глас недели, в обычные воскресные дни. Если в воскресенье случится праздник Господень, то вместо “Свят Господь Бог” поется светилен праздника).

Д.: Свят Господь Бог наш.
Л.: Свят Господь Бог наш.
Д.: Яко Свят Господь Бог наш.
Л.: Свят Господь Бог наш.
Д.: Над всеми людьми Бог наш.
Л.: Свят Господь Бог наш.

1: Всякое дыхание да хвалит Господа. Хвалите Господа с небес, хвалите Его в вышних. Тебе подобает песнь Богу.
2: Хвалите Его вси ангели Его, хвалите Его вся силы Его. Тебе подобает песнь Богу.

1: Сотворити в них суд написан; слава сия будет всем преподобным Его.
2: Хвалите Бога во святых Его, хвалите Его во утверждении силы Его

1: Хвалите Его на силах Его, хвалите Его по множеству величестивя Его.
2: Хвалите Его во гласе трубнем, хвалите Его во псалтири и гуслех.
1: Хвалите Его в тимпане и лице, хвалите Его во струнах и органе.
2: Хвалите Его в кимвалех доброгласных, хвалите Его в кимвалех восклицания. Всякое дыхание да хвалит Господа.

1: Воскресни, Господи Боже мой, да вознесется рука Твоя, не забуди убогих Твоих до конца.
2: Исповемся Тебе, Господи, всем сердцем моим, повем вся чудеса Твоя.

Слава: Стихира евангельская, или празднику, или святому.
И ныне: Богородичен, в воскресенье же (глас 4): Преблагословенна еси, Богородице Дево, Воплощшим бо ся из Тебе ад пленися, Адам воззвася, клятва потребися, Ева свободися, смерть умертвися, и мы ожихом. Тем воспевающе вопием: благословен Христос Бог, благоволивый тако, слава Тебе.

Св.: Слава Тебе, показавшему нам свет.

Л.: Слава в вышних Богу, и на земли мир, в человецех благоволение. Хвалим Тя, благословим Тя, кланяем Ти ся, славословим Тя, благодарим Тя, великия ради славы Твоея. Господи Царю Небесный, Боже Отче вседержителю, Господи, Сыне Единородный, Иисусе Христе и Святый Душе. Господи Боже, Агнче Божий, Сыне Отечь, вземляй грех мира, помилуй нас; вземляй грехи мира, приими молитву нашу; седяй одесную Отца, помилуй нас. Яко Ты еси един Свят, Ты еси един Господь, Иисус Христос, в славу Бога Отца, аминь.
На всяк день благословлю Тя, и восхвалю Имя Твое во веки, и в век века.
Сподоби, Господи в день сей без греха сохранитися нам. Благословен еси, Господи, Боже Отец наших, и хвально и прославлено Имя Твое во веки, аминь.
Буди, Господи, милость Твоя на нас, якоже уповахом на Тя.
Благословен еси, Господи, научи мя оправданием Твоим. (трижды).
Господи, прибежище был еси нам в род и род. Аз рех: Господи, помилуй мя, исцели душу мою, яко согреших Тебе.
Господи, к Тебе прибегох, научи мя творити волю Твою, яко Ты еси Бог мой: яко у Тебе источник живота, во свете Твоем узрим свет. Пробави милость Твою ведущим Тя.
Святый Боже, Святый Крепкий, Святый Безсмертный, помилуй нас. (Трижды).
Слава, и ныне. Святый Безсмертный, помилуй нас.
Святый Боже, Святый Крепкий, Святый Безсмертный, помилуй нас.

1, 3, 5, 7 гласа: Днесь спасение миру бысть, поем Воскресшему из гроба, и начальнику жизни нашея: разрушив бо смертию смерть, победу даде нам и велию милость.

2, 4, 6, 8 гласа: Воскрес из гроба, и узы растерзал еси ада, разрушил еси осуждение смерти, Господи, вся от сетей врага избавивый: явивый же Себе апостолом Твоим, послал еси я на проповедь, и теми мир Твой подал еси вселенней, едине многомилостиве.

Д.: Рцем вси от всея души, и от всего помышления нашего рцем.
Л.: Господи, помилуй.
Д.: Господи, Вседержителю, Боже отец наших, молим Ти ся, услыши и помилуй.
Л.: Господи, помилуй.
Д.: Помилуй нас, Боже, по велицей милости Твоей, молим Ти ся, услыши и помилуй.
Л.: Господи, помилуй (Трижды, на каждое прошение).
Еще молимся о господине нашем святейшем вселенстем Архиерее (имя рек) Папе Римстем, и о господине нашем Митрополите (или Архиепископе, или Епископе нашем) (имя рек), и всей во Христе братии нашей.
Еще молимся о предержащих властех наших, и о всем воинстве.
Еще молимся о блаженных и приснопамятных создателех святаго храма сего (если в монастыре: святыя обители сея), и о всех преждепочивших отцех и братиях, зде лежащих и повсюду, православных.
Еще молимся о милости, жизни, мире, здравии, спасении, посещении, прощении и оставлении грехов рабов божиих братии святаго храма сего (если в монастыре: святыя обители сея).
Еще молимся о плодоносящих и добродеющих во всятем и всечестнем храме сем, труждающихся, поющих и предстоящих людех, ожидающих от Тебе великия и богатыя милости.
Св.: Яко милостив и человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков.
Л.: Аминь.

Д.: Исполним утреннюю молитву нашу Господеви.
Л.: Господи, помилуй.
Д.: Заступи, спаси, помилуй и сохрани нас, Боже, Твоею благодатию.
Л.: Господи, помилуй.
Д.: Вечера всего совершенна, свята, мирна и безгрешна у Господа просим.
Л.: Подай, Господи. (на каждое прошение).
Ангела мирна, верна наставника, хранителя душ и телес наших, у Господа просим.
Прощения и оставления грехов и прегрешений наших, у Господа просим.
Добрых и полезных душам нашим и мира мирови, у Господа просим.
Прочее время живота нашего в мире и покаянии скончати, у Господа просим.
Христианския кончины живота нашего, безболезнены, непостыдны, мирны, и добраго ответа на страшнем судищи Христове, просим.
Д.: Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе, и друг друга, и весь живот наш Христу Богу предадим.
Л.: Тебе, Господи.
Св.: Яко Бог милости и щедрот и человеколюбия еси, и Тебе славу возсылаем, Отцу и Сыну и Святому Духу, ныне и присно и во веки веков.
Л.: Аминь.

Св.: Мир всем.
Л.: И духови твоему.
Д.: Главы ваша Господеви приклоним.
Л.: Тебе, Господи.

Иерей произносит тихо молитву: Господи святый, в вышних живый и на смиренныя призираяй, и всевидищям оком Твоим призираяй на всю тварь; Тебе приклонихом выю сердца и телесе, и молимся Тебе, простри руку Твою невидимую от святаго жилища Твоего и благослови вся ны: аще что согрешихом, волею или неволею, яко благ и Человеколюбец Бог прости, даруя нам мирная и премирная благая Твоя.

Возглас: Твое бо есть, еже миловати и спасати ны, Боже наш, и Тебе славу возсылаем, Отцу и Сыну и Святому Духу, ныне и присно и во веки веков.
Л.: Аминь.

Д.: Премудрость.
Л.: Благослови.
Св.: Сый благословен Христос Бог наш, всегда, ныне и присно и во веки веков.
Л.: Аминь. Утверди, Боже, святую православную веру, православных христиан во век века.
Св.: Пресвятая Богородице, спаси нас.
Л.: Честнейшую Херувим и Славнейшую без сравнения Серафим, без истления Бога Слова рождшую, сущую Богородицу, Тя величаем.
Св.: Слава Тебе, Христе Боже, Упование наше, слава Тебе.
Л.: Слава, и ныне. Господи, помилуй (3). Благослови.
Священник творит отпуст (в воскресенье): Воскресый из мертвых, Христос Истинный Бог наш, молитвами Пречистыя Своея Матере, святых славных и всехвальных апостол, и святаго, егоже есть храм, и святаго, егоже есть день, святых и праведных богоотец Иоакима и Анны и всех святых, помилует и спасет нас, яко благ и человеколюбец.

Великаго Господина нашего Святейшаго Вселенскаго Архиерея (имя рек), Папу Римскаго, Святейшия Патриархи Православныя, и Господина нашего Преосвященнейшаго Митрополита (или Архиепископа, или Епископа) (имя рек) (егоже есть область), братию святаго храма сего и вся православныя христианы, Господи, сохрани их на многая лета.

(В обычные седмичные дни, кроме празднества, предпразднества и суббот – по кафизмах ектеньи не бывает, а сразу – 50 псалом и каноны. По хвалитных Славословие малое, ектения, “Исполним утреннюю молитву нашу…”, стихиры на стиховне, Трисвятое, и по тропарях ектения “Помилуй нас…”).