(Pavysam klusi, namonami)

RAUG OTKON KRISTUS TICEIGAJIM
jau Adventa laiks atnōcis:
tys myusu sirdīs, myusu dzeivē
ir jaunu ritmu īnesis.

Pi oltorim dzīd Roratmises
un reita krāslā sveces mirdz:
te lelī, mozī Dīva Mōti
nōk sveicynōt nu bārna sirds.

Nu sovom myužeigajom mōjom
īt Pesteitōjs pi cylvākim.
Jis atpesteit gryb myus nu grāka
un ceļt par debess mantnīkim.

Kungs, myusu Radeitōjs un Glōbējs,
mes lyudzam Tevi, nōci pi mums,
dūd vysim sovu žēlesteibu,
kam vīn pēc Tevis sirdis skumst.

Kungs, pījem tū, kū Tovam gūdam
nas sovōs sirdīs ticeigī:
tei mīlas pylna pateiceiba
nu myusu dzeives laiceigōs.