Асноўныя малітвы на працягу дня

Знак Святога Крыжа
У імя Айца і Сына, і Духа Святога. Амэн.

Праслаўленне Найсвяцейшай Тройцы
Хвала Айцу і Сыну, і Духу Святому. Як была спрадвеку, цяпер і заўсёды, і на вякі вечныя. Амэн.
 

Малітва Панская
Ойча наш, каторы ёсць у небе. Свяціся iмя Тваё. Прый-дзi валадарства Тваё. Будзь воля Твая, як у небе, так i на зямлi. Хлеба нашага штодзённага дай нам сёння. І адпусцi нам грахi нашыя, як i мы адпускаем вiнаватым нашым. I не ўводзь нас у спакусу, але збаў нас ад злога. Амэн.

Анёльскае прывітанне 
Вітай, Марыя, поўная ласкі, Пан з Табою, благаславёная Ты між жанчынамі і благаславёны плод улоння Твайго, Езус. 
Святая Марыя, Маці Божая, маліся за нас, грэшных, цяпер і ў хвіліну смерці нашай. Амэн.

Апостальскі Сімвал веры
Веру ў Бога Айца Усемагутнага, Стварыцеля неба і зямлі. І ў Езуса Хрыста, Сына Яго Адзінага, Пана нашага, які быў па-чаты ад  Духа Святога, нарадзіўся з Дзевы Марыі, замучаны пры Понцкім Пілаце, укры-жаваны, памёр і быў пахаваны; зышоў да адхлані, трэцяга дня ўваскрос, узышоў на неба, сядзіць праваруч Бога Айца Усемагутнага, адтуль прыйдзе ў хвале судзіць жывых і памерлых.
Веру ў Духа Святога, святы Касцёл каталіцкі, еднасць святых, адпушчэнне грахоў, уваскрашэнне цела, жыццё вечнае. Амэн.
 

Анёл Панскі
Тройчы на працягу дня – раніцай, апоўдні і вечарам – звычайна ў  касцёлах б’юць званы, заклікаючы вернікаў да праслаўлення Бога ў таямніцы ўцелаўлення, да ўшанавання Найсвяцейшай Панне Марыі словамі гэтай малітвы, якая чытаецца стоячы.

Анёл Панскі звеставаў Панне Марыі
і зачала ад Духа Святога.
Вітай, Марыя...

Вось я, слуга Панская,
няхай мне станецца паводле 
Твайго слова.
Вітай, Марыя...

А Слова сталася Целам
і пасялілася між намі.
Вітай, Марыя...

Маліся за нас, Святая Маці Божая,
каб сталіся мы годнымі 
абяцанняў Хрыстовых.

Молімся:
Усемагутны Божа, просім Цябе, улі ў нашыя сэрцы Тваю ласку, каб мы, пазнаўшы праз анёльскае звеставанне ўцелаўленне Хрыста, Твайго Сына, праз муку Яго і крыж, дзякуючы заступніцтву Найсвяцейшай Панны Марыі, былі даведзеныя да хвалы змёртвыхпаўстання. Праз Пана нашага Езуса Хрыста, Твайго Сына,  які з Табою жыве і валадарыць у еднасці Духа Святога, Бог, праз усе вякі вечныя.

Калі Анёл Панскі ахвяруецца за памерлых, тады дадаецца:
 Вечны адпачынак дай ім, Пане, а святло вечнае няхай ім свеціць. Няхай адпачываюць у супакоі вечным. Амэн.

У Велікодны перыяд замест малітвы Анёл Панскі чытаецца малітва Каралева неба.
Каралева неба, радуйся, аллелюя,
бо Той, Каго Ты заслужыла насіць, 
аллелюя,
змёртвыхпаўстаў, як і сказаў, 
аллелюя.
Малі за нас Бога, аллелюя.

Весяліся і радуйся, Панна Марыя, 
аллелюя,
бо ўваскрос Пан наш, аллелюя.

Молімся:
Божа, які праз уваскрэсенне Сына Твайго, Пана нашага Езуса Хрыста, узвесяліць свет меў ласку, дай, просім, каб праз Ягоную Маці Панну Марыю мы дасягнулі радасці жыцця вечнага. Праз таго ж Хрыста, Пана нашага. Амэн.
 

Акт веры
Веру ў Цябе, Божа вечны,
у Тройцы адзіны, спрадвечны.
Веру ў тое, што аб’явіў Ты, Божа,
Тваё Слова памыляцца не можа.

Акт надзеі
Давяраю, бо Ты  верны,
Усемагутны і міласэрны.
Дай грахоў мне адпушчэнне,
Ласку й вечнае збаўленне.

Акт любові
Божа, хоць Цябе не разумею,
Ды найбольш любіць умею,
За ўсё, што створана Табою,
Тваёй бязмежнай дабрынёю.

Акт жалю
Шкадую за злосць маю,
Бо цаню любоў Тваю.
Май літасць да грэшнага мяне
Бліжнім прабачаю дзеля Цябе.

Штодзённае ахвяраванне
Божае Сэрца Езуса, ахвярую Табе праз Беззаганнае Сэрца Марыі ўсе малітвы, справы, працу і крыж сённяшняга дня, як перапрашэнне за грахі мае. Далучаю іх да ўсіх тых інтэнцый, з якімі Ты за нас ахвяраваўся на Крыжы і пастаянна ахвяруеш Сябе на алтары. Ахвярую Табе іх за святы Касцёл, за Айца Святога і ў інтэнцыях сённяшняга дня, а таксама ў інтэнцыях нашай парафіі, сям’і, святароў і маіх родных – жывых і памерлых. Прагну таксама атрымаць усе магчымыя адпусты і ахвярую іх за душы ў чысцы. Амэн.

Малітва перад ежай
Паблагаславі, Пане Божа, нас, паблагаславі гэтыя дары, якія будзем спажываць з Тваёй святой дабрыні і міласэрнасці, і навучы нас дзяліцца хлебам і радасцю з тымі, хто іх не мае. Праз Хрыста, Пана нашага. Амэн.

Малітва пасля ежы
Дзякуем Табе, Пане Божа, за гэтыя дары, якія з Тваёй святой дабрыні і міласэрнасці мы спажывалі. Праз Хрыста, Пана нашага. Амэн.

Малітва да Анёла Апекуна 
Анёле Божы, дружа мой,
Ты заўсёды будзь са мной.
Рана, увечар і ўначы
Будзь ласкаў мне памагчы
Змагаць духа злога,
Верна служыць Богу.
Душу, цела сцеражы,
Да жыцця вечнага давядзі. Амэн.

Ранішняя малітва
Пане і Божа мой, у глыбокай пакоры станаўлюся перад Табою на калені і аддаю Табе паклон, пашану і хвалу. Будзь праслаўлёна Найсвяцейшая Тройца! Божа Ойча, які  мяне стварыў, Божа Сыне, які мяне адкупіў, Божа Духу Святы, які мяне асвяціў! Усемагутны вечны Божа, шчыра дзякую Табе за тое, што Ты мяне ў гэтую ноч ласкава аберагаў і захаваў ад раптоўнай смерці. Ахвярую Табе, о Божа, усе думкі, словы і ўчынкі мае, каб яны паслужылі для яшчэ большай хвалы Тваёй. Прымі мяне і ўсіх маіх родных, сяброў і дабрадзеяў пад сваю святую апеку і ўчыні, каб тут, на зямлі, мы верна Табе служылі, а пасля смерці дасягнулі шчасця вечнага. Амэн.
 

Вячэрняя малітва
Усемагутны вечны Божа, дзякую Табе за ўсе ласкі і дабрадзейнасці сённяшняга дня; за радасць і смутак, за дасягненні і няўдачы. Прымі ўсё на хвалу Тваю. Хачу таксама за ўсё Цябе перапрасіць.

Зрабі кароткі рахунак сумлення, прыгадай, што нядобрае ўчыніў, сказаў альбо падумаў на працягу дня. Якія абавязкі занядбаў?
Ці быў ты сёння лепшы, чым учора? За добрае падзякуй Богу, за грахі – перапрасі. 

Божа, Ойча найлепшы, шкадую і перажываю ўсім сваім сэрцам, што Ця--
бе – Найвышэйшае Дабро – грахамі абразіў і засмуціў. Адчуваю сорам і агіду да ўсіх сваіх грахоў і цвёрда пастанаўляю выправіцца з дапамогаю Тваёй ласкі, аб якой пакорна прашу Цябе. Божа, будзь літасцівы да мяне, грэшнага!
О мой Езу, будзь для мяне не Суддзёю, але Збаўцам!

Цяпер, о Божа, вазьмі мяне ў сваю святую апеку. Захавай мяне ад усялякага няшчасця і небяспекі, а таксама захавай маіх родных і ўсіх, за каго я павінен маліцца. Праз заслугі мукі, смерці і змёртвыхпаўстання Твайго Сына, Пана нашага, Езуса Хрыста, захавай нас у гэтую ноч ад раптоўнай і неспадзяванай смерці. Спашлі нам Анёла Апекуна, каб ён ахоўваў нас ад подступаў шатана. Дай нам спакойны і моцны сон, каб заўтра абудзіліся здаровымі для працы на хвалу і пашану Імя Твайго. Просім Цябе праз Хрыста, Пана нашага. Амэн.

Кароткія ўскліканні
Езус, Марыя, святы Юзэфе, вам аддаю сэрца і душу маю.
Езус, Марыя, святы Юзэфе, будзьце са мною пры кананні.
Езус, Марыя, святы Юзэфе, няхай пры вас у спакоі аддам духа майго. Амэн.

Кладучыся спаць, зрабі знак крыжа асвячонай вадою і скажы:
Езу Хрыстэ, у імя Тваё спаць кла-дуся, З душою і целам у апеку 
Табе аддаюся. Амэн.

Ойча наш... Вітай, Марыя... Веру ў Бога Айца... Анёл Панскі...
 

Малітвы  ў розных патрэбах 

Да Божага Провіду
О вечны Божа, Ты глядзіш на нас вачыма свайго Провіду. Дай нам, калі на тое воля Твая, святую ласку сваю, каб мы былі паслухмяныя ўсім наказам Тваім у часе нашай зямной пілі-грым-кі і праз гэта дасягнулі нябесных дабротаў.
Божа, Твой Провід не памыляецца ў сваіх наказах, пакорна просім Цябе, каб усё шкоднае Ты ад нас аддаліў, а ўсё карыснае даў нам.
Усемагутны вечны Божа, Ты ў сваёй  шчодрай дабрыні пераўзыходзіш заслугі і просьбы тых, хто Цябе про-сіць. Акажы нам сваю міласэрнасць, прабач нам усё тое, што мучыць нашае сумленне, і дай нам тое, што просьбаю выказаць не можам. Праз Хрыста, Пана нашага. Амэн.

Аб любові да Бога
Божа Сусвету, ад Цябе паходзіць усялякая дасканаласць. Укарані ў сэрцах нашых любоў да Твайго святога Імені і дай нам ласку ўзрастаць у пабожнасці; умацуй у нас усё добрае і клапатліва беражы ўмацаванае Табою.
Адары нас, Пане, пастаяннаю бояззю і любоўю да святога Імені Твайго, бо Ты ніколі не адмаўляеш у апецы тым, каго ўмацоўваеш у сваёй любові.
Божа, Ты для тых, хто Цябе любіць, падрыхтаваў нябачныя даброты, таму ўлі ў нашы сэрцы гарачую любоў да Цябе, каб мы, мілуючы Цябе ва ўсім і больш за ўсё атрымалі абяцаную спадчыну, якая пераўзыходзіць усялякія жаданні.
Усемагутны вечны Божа, памнож у нас веру, надзею і любоў і дай нам палюбіць Твае запаведзі, каб мы маглі атрымаць абяцаную ўзнагароду і вечна Цябе хвалілі. Праз Хрыста, Пана нашага. Амэн.

Адданне сябе Богу
Мой Пане і мой Божа, вазьмі ўсё, што мяне ад Цябе аддаляе.
Мой Пане і мой Божа, дай усё, што мяне да Цябе набліжае.
Мой Пане і мой Божа, вазьмі мяне ў поўную ўласнасць сваю. Амэн.

* * *
Адвечнае Слова, Адзінародны Сыне Божы, навучы мяне сапраўднай велікадушнасці. Навучы мяне годна служыць Табе, даваць бескарыс-на, змагацца, не зважаючы на боль, працаваць аддана, дапамагаць, не чакаючы падзякі, з усведамленнем, што я выконваю Тваю святую волю. Амэн.

* * *
Вазьмі, Пане, усю маю свабоду, прымі маю памяць, розум і волю. Усё, што я маю і чым валодаю, Ты мне падараваў, а я аддаю і вяртаю Табе ўсё, каб Ты мною кіраваў паводле волі Тваёй. Дай  мне толькі Тваю любоў і ласку, і буду я дастаткова багаты і нічога больш шукаць не буду. 

Малітва да Духа Святога
Уладару Нябесны, Суцяшальнік, Духу праўды! Ты ўсюды прысутны і ўсё напаўняеш, скарбніца дабра і Даўца жыцця, прыйдзі і пасяліся ў нас і ачысці нас ад усяго благога, і асвяці душы нашыя.

Малітва да ўкрыжаванага Хрыста
Збавіцель наш, Езу Хрыстэ! Бачу Цябе, прыбітага да крыжа дзеля Тваёй вялікай любові да роду людскога. Галаву маеш нахіленую, бо хочаш пачуць усе нашыя малітвы; сэрца маеш адкрытае, бо хочаш даць усім ласку Тваю; рукі маеш распасцёртыя, бо хочаш усіх нас да сябе прыгарнуць; ногі маеш прыбітыя цвікамі, бо хочаш быць заўсёды з грэшнікамі. Малю Цябе сёння, дзеля твае горкае смерці і пачэснага крыжа пачуй малітвы мае, пашлі мне ласку Тваю, прыгарні мяне да сябе і будзь са мною ў хвіліну смерці маёй. Амэн. 

Малітва да Святой Тройцы
Найсвяцейшая Тройца, злітуйся над намі; Пане, ачысці грахі нашыя; Уладару, прабач правіны нашыя; Святы, наведай і аздараві слабасці нашыя дзеля Твайго iмя. 

Малітва за Касцёл
Езу Хрыстэ, Касцёл святы – гэта Твая Божая справа. Учыні, каб паводле Тваёй волі, быў ён а-дзіны, святы, паўсюдны і цалкам скіраваны да тае дасканаласці, да якой Ты яго паклікаў.
Дай Касцёлу пастаянную жыцця-здольнасць і заўсёды чуйную ўвагу да знакаў часу, каб ён умеў усё спазнаць і ўсё добрае захаваць у кожным часе і ва ўсіх абставінах.
Учыні, каб сярод хрысціянаў любоў была галоўным прынцыпам, міласэрнасць – асаб-лі-ваю рысаю, справядлівасць – хлебам штодзённым, мужнасць у справах – вернасцю, малітва – адпачынкам, радасць – узнагародаю.
Просім Цябе, каб Тваё Валадарства праўды і жыцця, святла і ласкі, справядлівасці, любові і спакою пашыралася і ўмацоўвалася з кожным днём. Амэн.

Малітва за Святога Айца
Усемагутны Божа, Ты ўстанавіў Святога Айца бачнаю галавою святога Касцёла. Заўсёды атуляй наступніка святога Пятра сваёю ласкаю і благаславеннем. Адары яго ласкаю доўгага жыцця, добрага здароўя, суцеш у цярпеннях і ўчыні,  каб яго апостальская праца прынесла як мага большы плён для ўсяго хрысціянства. Змілуйся, Божа, над ім праз заступніцтва Найсвяцейшай Панны Марыі і ўсіх святых, а таксама дазволь, Ойча Нябесны, каб ён усіх нас давёў да жыцця вечнага. Амэн.
Ойча наш... Вітай, Марыя... Хвала Айцу...

Малітва за святароў
Ойча Нябесны, Тваёй апецы давяраем нашых душпастыраў, якія падаюць нам хлеб слова Божага і Хлеб Эўхарыстычны. Дай ім сілу для працы і айцоўскае сэрца, каб мы праз іх паслугу маглі дайсці да збаўлення вечнага. Амэн.

Малітва за памерлых святароў
Божа, Ты паклікаў святароў да сваёй службы і ўчыніў іх пастырамі нашых душаў. Аддаю Табе ў апеку ўсіх памерлых святароў, якія пры жыцці вялі мяне да Цябе. Выслухай маю малітву і дай ім шчасце ў небе разам з усімі Апосталамі. Амэн.

Малітва за парафію
Пане Езу Хрыстэ, Добры Пастыр! Зірні ласкава з нябёсаў на нашу парафію, на гэты маленькі статак у Тваёй вялікай аўчарні святога Касцёла. Про-сім Цябе за нашу супольнасць, за старых і маладых, за добрых і злых, за здаровых і хворых. Беражы дзяцей нашай парафіі ад усялякай сапсаванасці і дапамажы ім вырасці на Тваю хвалу і ўцеху бацькам. Барані нашу моладзь ад грахоў непрыстойных, распалі ў іх любоў да цнатлівасці, а лепшых сярод іх выберы сабе на службу ў святарскім і манаскім стане. Благаславі бацькоў, каб сваім словам і прыкладам належна выхоўвалі моладзь. Умацуй хворых, прасвятлі тых, што ў сумненнях і роспачы, запалі сэрцы абыякавых, навярні грэшнікаў і суцеш засмучаных. Беражы нашую парафію ад аблудаў і ерасяў, ад усялякіх цяжкіх грахоў, што выклікаюць Тваю справядлівую кару. Умацуй нас, каб мы верна трымаліся святых традыцыяў нашых продкаў і адзінага паўсюднага каталіцкага Касцёла. Дай нашым парафіянам паразуменне і любоў дасканаласці, благаславі тых, хто прыступае да Тваіх святых Сакрамэнтаў, і адары трывалым поспехам працу нашага душпастыра, каб мы ўсе пад ягонаю апекаю шчасліва ўвайшлі ў Тваё Валадарства. Амэн.

Малітва міністранта
Пане Езу Хрыстэ, Ты паклікаў мяне, каб я ішоў за Табою да Айца. Хачу ісці з Табою, будзь святлом, якое мяне асвячае. Будзь сілаю, якая мяне напаўняе. Будзь маім Настаўнікам, якога я слухаю і за якім іду. Запішы свае словы ў сэрца маё. Навучы мяне наследаваць Цябе. Напоўні мяне Тваім жыццём, каб я праслаўляў Айца і служыў братам так, як Ты вучыў. Выбаў мяне ад граху. Дапамажы мне жыць згодна з Тваёю воляю. Удзялі мне свайго Духа і дазволь, каб Тваё абяцанне выканалася ўва мне. Хачу жыць ва ўдзяч---насці Табе, з Табою і ў Табе – у любові Духа Святога дзеля хвалы Айца. Марыя, Маці Касцёла, будзь для мяне Маці на шляхах майго жыцця. Выпрасі мне, Маці цудоўнай любові, Духа любові, Духа мудрасці крыжа, які вядзе да змёртвыхпаўстання. Амэн.

Малітва перад чытаннем Святога Пісання
Духу Святы Божа, вось мы стаім перад Табою, як некалі Самуіл, і просім: «Кажы, Пане, бо слухае слуга Твой». Дай нам ласку глыбокага разумення Твайго слова, каб мы маглі зразумець і захаваць яго на ўсё сваё жыццё. Амэн.

Малітва пасля чытання Святога Пісання
Духу Святы Божа, гэтак, як апосталы, мы хочам спаўняць слова, а не толькі слухаць яго. Дай нам моцы Тваёй, каб, спаўняючы пачутае слова, мы ўзрасталі ў дабрыні дзеля збаўлення душаў нашых і нашых бліжніх. Амэн.

Малітва за Айчыну
(паводле кс. Пятра Скаргі)
Божа, Валадару і Пане народаў, з рук сваіх і волі сваёй не выпускай нас, а праз заступніцтва Найсвяцейшай Панны і Каралевы нашай благаславі Айчыну нашу, каб яна была заўсёды верная Табе і хвалу прыносіла Твайму святому Імені, а сыноў і дачок сваіх вяла да вечнага шчасця.
Усемагутны вечны Божа, адары нас глыбокаю і шчыраю любоўю да братоў, сясцёр і  наймілейшай маці-Айчыны нашай, каб мы ёй і люду Твайму, забыўшыся пра карысць уласную, годна служыць маглі.
Спашлі Духа Святога на слугаў Тваіх, якія кіруюць нашай краінай, каб яны згодна з воляю Тваёю маглі мудра і справядліва кіраваць давераным ім людам. Праз Хрыста, Пана нашага. Амэн. 

Малітва на заканчэнне старога года
Божа, Ты праз пастаянную змену дзён, начэй, месяцаў і гадоў паказваеш нам, як мінае час. Дай нам, просім, так умела выкарыстоўваць час на малітву, працу і адпачынак, каб мы маглі пасля цяжкасцяў зямнога жыцця атрымаць вечны адпачынак у небе. Праз Хрыста, Пана нашага. Амэн.

Малітва за Айчыну
(чытаецца на заканчэнне года) 
Усемагутны Божа, узносім да Цябе малітвы за нашу Айчыну і народ і дзякуем Табе за незлічоныя дабрадзейнасці, якімі Ты меў ласку з любоўю адарыць нас. Асабліва дзякуем за тое, што Ты паклікаў нас да святой каталіцкай веры і дазволіў нам шмат вытрываць дзеля яе, што даў нам паўсюдную і асаблівую любоў да нашай Каралевы і Тваёй Найсвяцейшай Маці, а таксама ўпэўненасць, што і Яна, як Маці, нас любіць. Дзякуем за ўсе выпрабаванні, праз якія нас наведваў і наведваеш: праслаўляем праз іх не толькі найсвяцейшую волю Тваю, але таксама любоў і дабрыню, якая ўсюды так бачна шукае карысці для нас і для іншых. Просім Цябе, спрадвечны Ойча, каб мы пас-таянна ўзрасталі ў веры і вернасці і заўсёды выконвалі з нязменнай ахвотай Тваю волю. Учыні, каб заўсёды трываў у нас каталіцкі дух і сыноўняя прывязаннасць да ўстаноўленай Табою Апостальскай Сталіцы; навучы нас пакорна прызнавацца да сваіх правінаў і шчыра за іх пакутваць; дай нам братнюю згоду, пакору і пачуццё справяд-лівасці; запалі ў нашых сэрцах сапраўд-ную любоў да ўсіх, з кім нас альбо адна кроў яднае, альбо звязваюць жыццёвыя абставіны, альбо ўчыненыя нам крыўды і несправядлівасці раздзяляюць нас на варожыя лагеры. Дай нам, о Божа, такую святасць, якая не ведае помсты і ўзносіцца па-над самалюбства асабістае і нацыянальнае. Не дазволь нам праз легкадумнасць альбо праз маладушнасць сысці з дарогі высакародных прынцыпаў альбо грашыць лянотаю, адсутнасцю  пастаянства, не дазволь забаўляцца ўяўленнямі праўды і выдумкамі. Знішч ў нашым сэрцы за-мі-лаванне да дарэмнай хвалы і прагу часовых задавальненняў, каб мы ня-спын-на і пэўным крокам імкнуліся да хвалы ў небе, бо толькі яна адна – са-праўдная хвала і сапраўднае шчасце. О Пане, абудзі ў нашых сэрцах апостальскую адданасць, каб мы не аказвалі дрэннага ўплыву на каго-небудзь, а імкнуліся быць усім у справе збаўлення, каб праз ўчынак, малітву і любоў прыносілі карысць. Праз Хрыста, Пана нашага. Амэн.

Малітва на парозе новага года
Пане Езу, Ты вучыў нас усё пачынаць у Імя Тваё. Таму ў Імя Тваё мы распачынаем новы  год. Праслаўляем Цябе, Езу, Валадар вякоў, і дзякуем Табе за падараваны час. Няхай Імя Тваё ўшаноўваецца на ўсёй зямлі, няхай прыйдзе Валадарства Тваё.
Дапамажы нам у гэтым годзе ўсё лепш распазнаваць, прымаць і выконваць Тваю святую волю. Шчодраю рукою май ласку адорваць кожнае стварэнне, няхай кожны мае штодзённы хлеб. Навучы нас любіць братоў  і  жыць у згодзе з бліжнімі. Адары ўсіх нас спакоем. Май ласку дараваць нам грахі і вызвалі нас ад усялякага няшчасця, якое можа нам па-гражаць.
Марыя Панна, урачыстасць Мацярынства  якой мы сёння ўспамінаем, атулі жыццё нашае сваёю Матчынаю апекай. Амэн. 
 

Малітва св. Францішка аб духу любові 
Учыні мяне, Пане, 
прыладаю Твайго спакою,
каб нёс любоў туды, 
дзе пануе нянавісць,
каб прабачаў там, дзе абражаюць, 
каб яднаў там, дзе сварка і звада,
каб праўду казаў там, дзе ёсць фальш,
каб нёс веру туды, дзе ёсць сумненне,
каб абуджаў надзею, 
дзе пануе роспач,
каб распаліў святло там, 
дзе валадарыць цемра,
каб нёс радасць там, 
дзе турбуе неспакой.
Учыні, каб не шукаў я суцяшэння, 
а суцяшаў іншых,
каб не толькі прагнуў разумення, 
але каб разумеў іншых,
каб не шукаў уласнай любові, 
а любіў іншых.
Бо той, хто дае, заўсёды атрымлівае,
хто не шукае свайго, той знаходзіць,
хто прабачае, таму будзе прабачана,
бо, паміраючы, нараджаемся 
для жыцця вечнага.

Малітва аб пазбаўленні ад дрэнных думак
Усемагутны і міласэрны Божа, выслухай нашыя просьбы і вызвалі нашы душы ад спакусаў дрэнных думак, каб мы маглі быць годным памяшканнем Духа Святога. Пане, узносім да Цябе малітвы, каб Ты вызваліў нашыя душы ад нячыстых і нядобрых думак. 
Божа, Ты асвячаеш кожнага чалавека, які прыходзіць на гэты свет, асвяці нашыя сэрцы святлом сваёй ласкі, каб мы заўсёды мелі думкі, годныя велічы Тваёй, а таксама шчыра Цябе любілі. Праз Хрыста, Пана нашага. Амэн. 

Малітва ў цярпенні
Усемагутны вечны Божа, суцяшэнне засмучаных і сіла церпячых, пачуй просьбы тых, хто ў кожным цярпенні да Цябе звяртаецца, каб ўсе яны маглі радавацца, што ў сваіх патрэбах спазналі Тваю міласэрнасць.
Просім Цябе, Пане, выслухай ласкава малітвы свайго люду і, хоць заслужана мы церпім за нашы грахі, выбаў нас праз сваю міласэрнасць дзеля хвалы Імя Твайго.
Божа, Ты знішчыў пыху адвечнага ворага, шатана, праз цярплівасць свайго Адзінароднага Сына, дай нам, просім, з пашанаю разважаць Яго цярпенні, якія Ён з любові да нас вынес, і дапамажы нам так, як Ён, у спакоі духа вытрываць усе перашкоды.
Ойча, калі Ты хочаш, то аддалі ад мяне гэты келіх, аднак не мая, але Твая воля няхай станецца. Амэн.

Малітва самотнага чалавека
Пане мой і Божа, так склалася, што жыву я ў адзіноце. Часам цешыць мяне мая свабода, але часта прыгнятае мяне мая самота і сам у сябе пытаю: якая карысць з такога жыцця?
Дай мне зразумець, што мая самота – гэта не пакінутасць, што я вольны для таго, каб дапамагаць людзям, што я адзін, каб жыць для многіх, што мая любоў патрэбная іншым. Натхні мяне надзеяй, каб маё жыццё стала служэннем. Амэн.

Аб пакоры
Божа, Ты ганарлівых не прымаеш, а пакорным даеш ласку. Удзялі нам цноту сапраўднай пакоры, прыклад якой нам даў Твой Сын Адзінародны, каб мы пыхаю не выклікалі Твайго гневу, але праз пакору  атрымалі дары Тваёй ласкі.
Просім Цябе, Пане, няхай гэтая малітва вымаліць нам ласку сапраўднай пакоры, а таксама выкіне з сэрцаў нашых нястрыманасць цела і вачэй і пыху гэтага свету, каб мы, жывучы разважна, справядліва і пабожна, дасягнулі вечнай узнагароды.
Пане, няхай Твая ласка ачысціць нас ад бруду нашых грахоў і праз пакору давядзе нас да Валадарства Нябеснага. Праз Хрыста, Пана нашага. Амэн.

Аб цвярозасці
О добры Божа, дай нам дасканала зразумець, якою вялікаю дабрадзейнасцю з’яўляецца цвярозасць у вачах Тваіх. Няхай знікне ва ўсёй нашай Айчыне п’янства і запануе цвярозасць.
 Шчырым сэрцам просім аб дары цвярозасці для ўсіх тых, каго любім, асабліва для N(імя), які знаходзіцца ў залежнасці ад алкаголю.
А нас саміх, о добры Ойча, навучы асабліва паважаць гэтую цноту, іншых да яе заклікаць і вытрываць у заўсёднай еднасці з Езусам Хрыстом. Які жыве і валадарыць праз усе вякі вечныя. Амэн.
Маці Божая, Валадарка і Заступніца наша, дапамажы нам.
Святы Міхале Арханёле, барані нас. 
Святы Ян Хрысціцель, Апякуне цвярозасці, маліся за нас.
 

Малітва аб благаславенні для сям’і
Божа добры і міласэрны, аддаем у Тваю апеку наш дом, сям’ю і ўсё,  што маем. Благаслаўляй нас, беражы ад усяго злога, ахоўвай у небяспецы, захоўвай ад няшчасця, умацоўвай нашую веру. У смутку і цярпенні дай шчырую надзею. Учыні, каб мы заўсёды былі паяднаныя з Табою.

Малітва за бацькоў
Пане Божа, Ты даў нам запаведзь, каб мы шанавалі бацьку і маці. Усім сэрцам люблю сваіх бацькоў. Ведаю, як я ім абавязаны, і таму прашу Цябе: май іх у Тваёй апецы, адары іх зда-роў-ем і вядзі іх па жыцці дарогаю Тваіх запаведзяў. Дай ім шчаслівую старасць, а калі прыйдзе час, прымі іх да неба. Амэн.

Малітва за памерлых бацькоў
Божа, Ойча Нябесны, аддаем Табе ў апеку нашых памерлых бацькоў. Ты ведаеш іх працу і цяжкасці жыцця. Праз муку і смерць Твайго Сына, у якога яны верылі, прабач ім усе грахі і прымі іх да неба. Дапамагай нам весці годнае жыццё, каб мы маглі сустрэцца з імі ў шчаслівай вечнасці. Амэн.

Малітва бацькоў за дзяцей
Пане Божа, Ты паклікаў нас стварыць сям’ю, пажадаў узбагаціць яе нашчадкамі. Даручаем Табе нашых дарагіх дзяцей. Аддаем іх Тваёй ўсемагутнай бацькоўскай апецы, каб яны пастаянна ўзрасталі ў Тваёй святой боязі, вялі праўдзівае хрысціянскае жыццё і прынеслі радасць не толькі нам, якія далі ім жыццё, але найперш Табе, свайму Стварыцелю. 

Малітва бацькоў у інтэнцыі зачатага дзіцяці
Марыя, Маці Добрай Рады, Цябе прашу аб дапамозе, каб зачатае дзіця стала радасцю нашага дома, народа і Касцёла. Праз Хрыста, Пана нашага.

Малітва маці ў благаславёным стане
Умілаваны Нябесны Ойча, дзякую Табе, што даў мне ласку насіць і даць жыццё. Ты даверыў мне таямніцу жыцця і за яе я прагну Цябе праслаўляць.
Таму дазволь мне дзякаваць за гэты вялікі дар. Асвяці ахвяру маіх намаганняў, стань пры мне ў цяжкую хвіліну, дапамажы мужна вытрываць і нарадзіць здаровае дзіця. Разам з мужам мы давяраем яго Тваёй айцоўскай любові і прымем усё, што давядзецца нам выканаць і выцерпець. Дай мне добрыя чыстыя думкі, каб я карміла сваё дзіця не толькі сваёю крывёю, але таксама Тваёю ласкаю, любоўю і сапраўднаю радасцю.
Не дазволь нам ніколі забыць, што дзіця было нам даверана Табою і па-він-на стаць дзіцем Божым. Праз Хрыс-та, Пана нашага. Амэн. 

*  *  *
Маці Езуса, Ты Маці Таго, хто з’яўляецца жыццём. Ты – Маці жыцця. Бог у сваёй усемагутнасці ўчыніў, што і я нашу ў сабе жыццё і павінна даць яго свету.
Колькі таямніцы ў тым, што паўстае новае чалавечае жыццё, колькі трэба дапамогі Божай, каб гэтае жыццё развівалася бяспечна!
Прашу Цябе, Маці, дапамажы, каб я штораз лепш разумела сваё пакліканне да мацярынства як годнасць і адказнасць і каб за гэта я была ўдзячная Богу.
Сардэчна прашу, памятай пра мяне, узгадай усіх маці, якія чакаюць свайго часу, і ўпрасі нам шчодрую дапамогу неба. Амэн.
Божа Ойча, адары маё дзіця самымі прыгожымі зямнымі і нябеснымі дарамі, каб тут, на зямлі, яно прыносіла Табе хвалу, а для нас было крыніцай радасці. Маці Найсвяцейшая, якая мела радасць з свайго мацярынства, навучы мяне усё рабіць так, каб не ўчыніць крыўды свайму дзіцяці. Выпрасі мне цноту цярплівасці і мужнасці, каб дзеля майго дзіцяці я змагла вытрываць ўсе цяжкасці. 

У кожнай патрэбе
Акажы нам, Пане, вялікую міласэрнасць сваю. Няхай яна вызваліць нас ад усіх грахоў і заслоніць перад карамі, якіх мы заслугоўваем.
Просім Цябе, Пане, няхай Твая ласка нас ачысціць і ўмацуе ў служэнні Табе.
Учыні, Пане, просім Цябе, каб мы, вольныя ад зямных прывязаннасцяў, імкнуліся да поўнага ўдзелу ў таямніцы жыцця Божага, пачатак якому даў cвяты хрост. Праз Хрыста, Пана нашага. Амэн.

Благаславенне ў дарозе
Няхай Усемагутны і міласэрны Пан вядзе нас дарогаю спакою, а Яго Анёл няхай беражэ нас, каб мы ў спакоі і бяспецы змаглі дасягнуць мэты свайго падарожжа.

Малітва вадзіцеля
Божа, дай мне ўпэўненую руку і зоркае вока, каб я нікому не прычыніў шкоды ў дарозе. Даўца жыцця, не дазволь, каб я стаў прычынаю смерці для тых, каму Ты даў жыццё. Захавай, Пане, ад няшчасных выпадкаў тых, хто падарожнічае са мною. Навучы мяне карыстацца аўтамабілем для дабра маіх бліжніх і стрымай  спакусу празмернай хуткасці. Учыні, каб хараство свету, створанага Табою, і радасць Тваёй ласкі заўсёды мне спадарожнічалі.

Малітва перад навукаю
О Добры Божа, прасвятлі нас Духам Тваім Святым, які дае розум і ўмацоўвае духоўныя сілы, каб мы ўважліва спасцігалі ўсе навукі і раслі Табе, Творцу нашаму, на славу, бацькам і настаўнікам нашым на радасць і ўцеху, Касцёлу і Бацькаўшчыне на дабро і славу. Амэн. 

Малітва перад працай
Пане і мой Божа, найлепшы Ойча! Ты паклікаў мяне, каб я сваёю працаю ўдасканальваў свет. Дзякую Табе за даручэнні, магчымасці і здольнасці. Дапамажы мне кожны дзень служыць Табе добрасумленнаю працаю, зычлівасцю да супрацоўнікаў, разуменнем і добрым словам.
Добрым настроем і прыкладам я хацеў бы ўлагодзіць сваркі, непаразуменні і падазронасць. Дапамажы мне такім чынам паспрыяць дзеля дабра маіх бліжніх і ўдасканалення свету. Амэн.

*  *  *
Пане Божа, асвячай нашыя ўчынкі сваім натхненнем і падтрымлівай сваёю дапамогаю, каб мы кожную малітву і працу з Табою пачыналі і з Табою заканчвалі. Амэн.

Малітва аб дажджы
Божа Ойча, Стварыцель неба і зямлі, які аддзяліў воды ад водаў, і воды ад сушы, спашлі нам дождж, каб зямля, Табою створаная, прынесла багаты плён, патрэбны для жыцця людзей, якія з’яўляюцца Тваімі дзецьмі.
Удзялі, Пане, нашым душам шчодрай расы Тваёй ласкі, каб мы, узбагачаныя ёю, ахвотна Табе, Ойча, служылі і добрымі ўчынкамі заслужылі тое, аб чым просім. Праз Хрыста, Пана нашага. Амэн.

Малітва аб добрым надвор’і
Божа, які ў сваіх святых Кнігах сказаў, што «ў радасным абліччы караля – жыццё», пакажы нам і зямлі, якую Ты стварыў, сваё радаснае Аблічча і спашлі нам добрае надвор’е.
Сваім ласкавым і радасным Абліччам асвяці, Ойча, нашыя сэрцы, умацуй у нас бляск Тваёй ласкі, каб мы праз добрыя ўчынкі атрымалі тое, аб чым просім. Праз Хрыста, Пана нашага. Амэн.

Малітвы да Маці Божай 

Малітва да Маці Божай Фацімскай 
Наша Фацімская Пані Ружан-цо-вая, Ты нам параіла праз траіх пастушкоў замі-ла-ванне да малітвы, асабліва да малітвы ружан-цовай, а таксама заахвоціла захоўваць сапраўд-ны дух пакаяння як сродак вечнага збаў-лен-ня. Про-сім Цябе, дапамажы нам, каб мы ў ду-ху вернай паслухмянасці Тваім Маця-рынскім па-радам адшукалі дарогу да Неба і на-леж-ным чынам Цябе перапрашалі. Амэн.

Малітва ахвяравання сябе Маці Божай
Маці Божая, Беззаганная Марыя! Табе прысвячаю цела і душу маю, усе малітвы і працу, радасць і цярпенні, усё, чым я ёсць і ўсё, што я маю. 
Шчырым сэрцам аддаюся Табе ў няволю любові. Даю Табе поўную свабоду карыстацца мною дзеля выратавання людзей і дзеля дапамогі святому Касцёлу, Маці якога Ты з’яўляешся. Хачу з гэтага часу рабіць усё з Табою, праз Цябе і дзеля Цябе. Ведаю, што ўласнымі намаганнямі нічога не зраблю. Ты ж усё можаш па волі Сына Твайго. І заўсёды перамагаеш. Апякунка верных, учыні, каб мая сям’я, парафія і ўся Айчына сталі сапраўдным Валадарствам Твайго Сына і Тваім Валадарствам. Амэн.  

Малітва да Маці Божай Нястомнай Дапамогі
О Маці Божая Нястомнай Дапамогі, з вялікім даверам прыходжу сёння да Твайго святога абраза, каб прасіць Тваёй дапамогі. Не спадзяюся на свае заслугі ані на свае добрыя ўчынкі, але толькі на бязмежныя заслугі Пана Езуса і на Тваю неспацігальную Мацярынскую любоў.
Ты глядзела, о Маці, на раны Адкупіцеля  і на кроў Яго, што пралілася на крыжы дзеля нашага збаўлення. Сын Твой, які паміраў, даў нам Цябе за Маці. Ці ж не будзеш Ты для нас, як сведчыць Твой цудоўны тытул, Нястомнай За-ступ-ніцай?
Таму, о Маці Божая Нястомнай Дапамогі, праз балесную муку і смерць Твайго Боскага Сына, праз невыказныя цярпенні Твайго Сэрца, о Заступніца, вельмі горача малю Цябе, каб выпрасіла мне ў свайго Сына тую ласку, якой вельмі жадаю і якая мне так патрэбна...
Ты ведаеш, о Маці благаслаўлёная, як хоча Езус Адкупіцель наш удзяліць нам усялякіх пладоў Адкуплення. Ты ведаеш, што гэтыя скарбы былі адда-дзеныя ў Твае рукі, каб Ты іх нам раздзяляла. Таму, о найласкавейшая Маці, выпрасі для мяне у Сэрца Езуса тую ласку, аб якой ў гэтай малітве пакорна прашу, а я з радасцю буду праслаўляць Тваю міласэрнасць праз усю вечнасць. Амэн. 

Малітва да Маці Божай Міласэрнасці, Вастрабрамскай
Беззаганная Маці Божая, Каралева неба, Маці Міласэрнасці, Заступніца і Прытулак грэшнікаў! Вось я, натхнёны ласкамі, якія Ты так шчодра выпрасіла для мяне сваёй мацярынскай ласкай са скарбу любові Божай, пастанаўляю цяпер і назаўсёды аддаць у Твае рукі сваё сэрца, каб Ты прысвя-ціла яго Езусу.

Малітва да Маці Божай Будслаўскай
Маці Божая Будслаўская, наша Пані і Каралева, мы, Твае падданыя, схіляючы пакорна перад Табою галовы, абяцаем, што заўсёды і ўсюды будзем вернымі Богу, Сыну Твайму, нашаму Збавіцелю, вернымі Табе і Касцёлу.
З бязмежным даверам аддаем Табе ў апеку нас саміх, нашыя сем‘і, нашыя парафіі, нашыя дыяцэзіі, наш Касцёл на Беларусі.
Аддаем Табе ў апеку нашых дзяцей, нашу моладзь, дарослых, а асабліва хворых, церпячых, слабых, адзінокіх, старых, пакінутых, сірот і ўсіх, каму патрэбныя дапамога, падтрымка і абарона.
Апякунка наша, Каралева наша, дапамагай нам, кіруй намі, апякуйся намі.
Тваёй абароне аддаемся, святая Маці Божая. Амэн. 

Малітва да Маці Божай Лагішынскай
Каралевы Палесся
Маці Божая Лагішынская, Каралева Палесся, глянь на нас ласкава і выслухай нашую пакорную малітву.
Найлепшая наша Маці, дзякуем Табе за тое, што Ты дапамагаеш нам, што выціраеш нашыя слёзы, што заўсёды знаходзішся побач з намі.
Даручаем Тваёй Матчынай апецы Святога Айца, духавенства і верны люд Божы. Абяцаем быць вернымі Твайму Сыну, Пану нашаму Езусу Хрысту, які жыве і валадарыць на вякі вечныя. Амэн.

Малітва да Маці Божай Берасцейскай
Маці Божая Берасцейская, Пані выратавання, поўная ласкі і міласэрнасці. Маці пакінутых, суцяшальніца расчараваных, шлях блукаючых, успамога тых, хто патрабуе апекі, Маці Няспыннага паратунку, будзь ласкава паспяшыць на дапамогу нам. Спашлі духа Божай ласкі ў нячулыя сэрцы нашых сем’яў. Знішчы бязвер‘е і сумненні, пакажы любоў і радасць жыцця з Богам. Маці Божая Берасцейская, заступіся за нас. Амэн.
 
 
 
 

Основные молитвы на белорусском языке

Для католиков латиского обряда. Основные молитвы в течение дня. Молитвы в разных случаях, и молитвы к Божей Матери.