Ryugtōs sōpes, osu šautri
Myusu sirdim durit cauri. (Divkōrt.)
Jautrōs sejas, skumēs neikstit
Un osorōs, vaigi, sleikstit.
Spūdrō saule ūmai tymsoj,
Jo tai žālums vaigu aizklōj,
Pat eņgeli prīcas nabaud’,
Gaudu dzīsmēs sōpes izraud.
Cītōs kliņtis pušu škeļās,
Svātū mīsas augšanceļās.
Kas nūtyka, kas tam vaiņas?
Kōpēc nūteik tōs pōrmaiņas? –
Kristus sōpes un cīsšonas,
Vysus spīž pi nūskumšonas!
Atgrīz, Jezu, cītsirdeigūs,
Pador jūs Tev paklauseigus.
Un caur tovu ryugtū nōvi,
Nikam naļauņ pazust veļti.
Lai mīleibā īsalīsmoj,
Kas par tovom sōpem dūmoj.

Pōrdūmōsim myusu Pesteitōja cīsšonas – nu lyugšonas Olivu dōrzā, leidz jō nataisneigai apsyudzēšonai tīsas prīškā. Kunga Jezus cīsšonu nūpalnus upurēsim Dabasu Tāvam par svātū Katōļu Bazneicu, par myusu vysaugstōkū ganeitōju – Pāvestu un vysim goreidznīkim, lai izlyugtu Dīva svēteibu jūs dorbam.

Lai žālums rūnās, sōpes sirdi nūmōc,
Kad lobais Jezus sōpu gaitas īsōc,
Olivu dōrzā ašņa svīrim apklōts,
Mōcekļu atstōts.

Jō svātais vaigs ar dyurem rupi sasysts,
Vyss bryucem apklōts, kai ar asni aplīts;
Bet lobais Jezu ni vīnu naapsyudz,
Klus un Dīvu lyudz.

Kaut tagad muna sirds gauži raudōtu
Un nu šō laika nikod nagrākōtu!
Es nūžāloju munu oplomeibu
Un cītsirdeibu.

Jezus, brīsmeigai krysta nōvei
Tautas vacōku nūlamts.
Muns mīlais Jezus!

Jezus, par trejsdesmit grašim
Napateiceiga mōcekļa nūdūts.
Muns mīlais Jezus!

Jezus, pi lyugšonas Olivu dōrzā
Naizsokamom nōves bailem padūts.
Muns mīlais Jezus!

Jezus, nūskumeigs leidz nōvei,
Ar ašņa svīdrim applyudis.
Muns mīlais Jezus!

Jezus, pa tīsas pogolmu
Uz Kaifasa nomu aizvasts.
Muns mīlais Jezus!

Esi sveicynōts, esi gūdynōts,
Par mums smōdātais un pazamōtais!
Esi slavynōts, vysur daudzynōts,
Dīvs bezgaleigais!

DVĒSELES SAURNA AR JEZUS MŌTI

Ak, es Mōte nūskumeigo!
Sōpe mani spīž brīsmeiga,
Zūbyns sirdi cauri dur. (Divkōrt)

- “Kōpēc, Mōte nūmīļōtō,
Posa Dīva izvālātō,
Esi ļūti satrīkta?”

- “Ak, kū vaicoj? Asu skuma,
Tikkū dzeiva un žāluma:
Sirds nu sōpem pageibst maņ.”

- “Pasok, svātō vaļd(i)neica,
Kōpēc esi nūskumuse,
Kōpēc osorōs sleiksti?”

- “Radzu ļaužu Pesteitōju,
Munu Dālu nūmīļōtū
Ašņa svīdrim apklōtu.”

- “Svātō Dīva Dzemdeitōja,
Žēlesteibas izlyudzēja,
Dūd maņ ar tevi raudōt.”

Ūtrajā daļā pōrdūmōsim, kū myusu Pesteitōjs izcīte nu jō nataisneigōs apsyudzēšonas tīsā leidz jō krūņōšonai ar ērškim. Pesteitōja cīsšonu nūpalnus upirēsim dabasu Tāvam par vysim kristeigajim ļaudim, lyudzūt jim mīru, sasaprasšonu, kai ari eistu Dīva un tyvōkō mīlesteibu.

Stōv tīsas prīkšā vyspasauļa kēneņš,
Neatbiļd vōrda, leidz kai lēneigs jēreņš,
Ar boltu drēbi apsmīkļam teik apgārbts,
Kai nagudrs smōdāts.

Kaut tegad muna sirds gauži raudōtu
Un nu šō laika nikod nagrākōtu!
Es nūžāloju munu oplomeibu
Un ļaunprōteibu.

Jezus, tīsas pogolmā trejskōrteigi
Sova mōcekļa nūlīgts.
Muns mīlais Jezus!

Jezus, nu Heroda mōjas sulainum
Kai naprōteigs smōdāts.
Muns, mīlais Jezus!

Jezus, lelōkam izsmīkļam
Boltā svōrkā apgārbts.
Muns mīlais Jezus!

Es sviecynōts, esi gūdynōts,
Par mums smōdātais un pazamōtais!
Esi slavynōts, vysur daudzynōts,
Dīvs bezgaleigais!

DVĒSELES SARUNA AR JEZUS MŌTI

- “Ak, radzu es munu Dālu,
Pīsītu pi stoba, kailu,
Un ar reikstem šausteitu.”. (Divkōrt)

“Tova Dāla, nūšausteitō
Un ar ērškim apkrūņōtō,
Sōpes ar mums sadoli”.

- “Lic maņ, Jaunova Vyssvātō,
Lai es tova Dāla krystu
Leidz ar tevi nosōtu.”

Trešajā daļā pōrdūmōsim, kū myusu Pesteitōjs izcīte nu jō krūņōšonas ar ērškim leidz krysta nōvei. Kunga Jezus cīsšonu nūpalnus upurēsim dabasu Tāvam par visim cylvākim. Lyugsim, lai lobais Pesteitōjs pamudynoj grēcinīkus uz atsagrīzšonu pi Dīva, lai mozynoj dvēselem cīsšonas škeisteišonas gunī, un mums visim lai dūd patīsōs grāku nūžālōљonas goru un laimeigu nōves stuņdi.

Ak, muna dvēseļ’, kam tu namīļ’, natveikst?
Kōpēc nu sōpem, muna sirds, tu nageibst’?
Izmet jai, Jezu, nu tovas sirds degsmes
Mīleibas dzērstes.

Ļaundarim, beņdem pasadūd bez bailem,
Uz sōp’u krysta labprōteigi gulstās,
Ļaun pōrdūrt rūkas un kōjas ar noglom
Par myusu grākim.

Ak, krysts, tu esi dōrgōks mums par vysu,
Pi sevis turi Pesteitōja mīsu.
Ļauņ, mes jū kopā cīneigi īliksim
Un apraudōsim!

Kaut tagad muna sirds gauži raudōtu,
Un nu šō laika nikod nagrākōtu!
Es nūžāloju munu oplomeibu
Un magūdeibu.
Tev pīdar, Jezu, gūds ar pateiceibu
Pat tū breineigi lelū labdareibu,
Ka myus bēdeigus, cīsdams krysta nōvi,
Nu eļnes glōbi.

Jezus napateiceigō ļaužu pyuļa
Zamōks par Barabasu nūskaiteits.
Muns mīlais Jezus!

Jezus, uz nōvi pi krysta
Pilata mataisneigu nūtīsōts.
Muns mīlais Jezus!

Jezus, storp divim slapkovom
Ar krystu uz augšu pacalts.
Muns mīlais Jezus!

Jezus, apleik stōvūšū
Un garumejūšū zaimōts.
Muns mīlais Jezus!

Jezus, naizsokamōs slōpēs
Ar ryugtu žuļti un etiki dzirdeits.
Muns mīlais Jezus!

Jezus, sova Tāva rūkōs
Goru atdūdams, nūmiris.
Muns mīlais Jezus!

Esi sveicynōts, esi gūdynōts,
Par mums smōdātais un pazamōtais!
Esi slavynōts, vysur daudzynōts.
Dīvs bezgaleigais!

DVĒSELES SARUNA AR JEZUS MŌTI

- “Ak, maņ, Mōtei nūskumeigai,
Stōvūt raudūšai pi krysta,
Žālums sirdi pōrdyure.” (Divkōrt)

“Svātō Mōte, lai es vysod
Jezus kraystu prōtā turu,
Sovus grākus apraužu.”

“Jau muns Jezus nūmīļōtais
Mērst par ļaudim, krystā pīkolts.
Ak, kaut es jam leidz mērtu!”

“Grybu, Mōte, leidz ar Tevi
Stōvēt uzticeigs pi krysta,
Jezus sōpes gūdynōt.”

“Dīva Mōte, Tevi lyudzu,
Izmōc mani krystu mīļōt,
Krystu vysod nest labprōt.”

JEZUS KRISTUS, KUNGS DĪVS MĪLAIS

Jezu paceļ krysta kūkā,
Zaimōtōji apstōj lūkā.
Ryugtōs, ryugtōs cīsšonōs jū skota
Mōte, Mōte, dzili sōpynōta.

Pōrpleist aizkors Dīva nomā,
Zeme plaisoj drabādama.
Simtnīks, simtnīks Dīva Dālu pazeist,
Ļaudis, ļaudis sovu vaini atzeist.