КАНОН АНГЕЛУ ХРАНИТЕЛЮ

Тропарь, гл. 6: Ангеле Божий, хранителю мой святый, живот мой соблюди во страсе Христа Бога, ум мой утверди во истиннем пути, и к любви горней уязви душу мою, да тобою направляемь, получу от Христа Бога велию милость.
Богородичен: Святая Владычице, Христа Бога нашего Мати, яко всех Творца недуоменно рождшая, моли благость Его всегда, со хранителем моим ангелом, спасти душу мою страстьми одержимую, и оставление грехов даровати ми.

КАНОН гл. 8.

Песнь 1.

Ирмос: Поим Господеви, преведшему люди своя сквозе Чермное море, яко един славно прославися.
Песнь воспети и восхвалити, Спасе, Твоего раба достойно сподоби, бесплотному ангелу, наставнику и хранителю моему.
Един аз в неразумии и в лености ныне лежу: наставниче мой и хранителю, не остави
мене погибающа.
Слава: Ум мой твоею молитвою направи, творити ми Божия повеления, да получу от Бога отдаяние грехов и ненавидети ми злых настави мя, молюся ти.
И ныне: Молюся, Девице, о мне рабе Твоем ко Благодателю, со хранителем моим ангелом, и настави мя творити заповеди Сына Твоего и Творца моего.

Песнь 3.

Ирмос: Ты еси утверждение притекющих к Тебе, Господи, Ты еси свет омраченных, и поет Тя дух мой.
Все помышление мое, и душу мою к Тебе возложих, хранителю мой, ты от всякия мя напасти вражия избави.
Враг попирает мя, и озлобляет, и поучает всегда творити своя хотения; но ты, наставниче мой, не остави мене погибающа.
Слава: Пети песнь со благодарением и усердием Творцу и Богу даждь ми, и тебе благому ангелу хранителю моему: избавителю мой, изми мя от враг озлобляющих мя.
И ныне: Исцели, Пречистая, моя многонедужныя струпы, яже в души: прожени враги, иже присно борются со мною.

Седален, гл. 2.
Подобен:
Вышних ища.

От любве душевныя вопию ти, хранителю моея души, всесвятый мой ангеле: покрый мя, и соблюди от лукаваго ловления всегда, и к жизни настави небесней, вразумляя, и просвещая, и укрепляя мя.

Слава… и ныне…

Богородичен

Богородице безневестная, Пречистая, яже без семене рождши Владыку, Того со ангелом хранителем моим моли, избавити ми ся всякаго недоумения, и дати умиление, и свет души моей, и согрешением очищение, яже едина вскоре заступающи.

Песнь 4.

Ирмос: Услышах, Господи, смотрения Твоего таинство, разумех дела Твоя и прославих Твое Божество.
Моли человеколюбца Бога, ты хранителю мой, и не остави мене, но присно в мире житие мое соблюди, и подаждь ми спасение необоримое.
Яко заступника и хранителя животу моему прием тя от Бога, ангеле, молю тя, святый: от всяких мя бед свободи.
Слава: Мою скверность твоею святынею очисти, хранителю мой, и от части шуия да отлучен буду молитвами твоими, и причастник славы явлюся.
И ныне: Недоумение предлежит ми от обышедших мя зол, Пречистая, но избави мя от них скоро: к Тебе бо единей прибегох.

Песнь 5.

Ирмос: Утренююще вопием Ти, Господи, спаси ны: Ты бо еси Бог наш, разве Тебе иного не вемы.
Яко имея дерзновение к Богу, хранителю мой святый, Сего умоли от оскорбляющих мя зол избавити.
Свете светлый, светло просвети душу мою, наставниче мой и хранителю, от Бога данный ми ангеле.
Слава: Спяща мя зле тяготою греховною, яко бдяща сохрани, ангеле Божий, и восстави мя на славословие молением Твоим.
И ныне: Марие, Госпоже Богородице безневестная, надежде верных, вражия возношения низложи, а поющия Тя возвесели.

Песнь 6.

Ирмос: Ризу мне подаждь светлу, одеяйся светом яко ризою, многомилостиве Христе Боже наш.
Всяких мя напастей свободи, и от печалей спаси, молюся ти, святый ангеле, данный ми от Бога, хранителю мой добрый.
Освети ум мой, блаже, и просвети мя, молюся ти, святый ангеле, и мыслити ми полезная всегда настави мя.

Слава: Устави сердце мое от настоящаго мятежа, и бдети укрепи мя во благих, хранителю мой, и настави мя чудно к тишине животней.
И ныне: Слово Божие в Тя вселися, Богородице, человеком Тя показа небесную лествицу: Тобою бо к нам Вышний сошел есть.

Кондак, гл. 4.

Явися мне милосерд, святый ангеле Господень, хранителю мой, и не отлучайся от мене сквернаго: но просвети мя светом неприкосновенным, и сотвори достойна царствия небеснаго.
Икос: Уничиженную душу мою многими соблазны ты, святый предстателю, неизреченныя славы небесныя сподоби, и певец с лики бесплотных сил Божиих: помилуй мя и сохрани, и помыслы добрыми душу мою просвети, да Твоею славою, ангеле мой, обогащуся, и низложи зломыслящия мне враги, и сотвори мя достойна царствия небеснаго.

Песнь 7.

Ирмос: От Иудеи дошедше отроцы в Вавилоне иногда, верою троическою плмень пещный попраша, поюще: отцев Боже, благословен еси.
Милостив буди ми, и умоли Бога, Господень ангеле: имею бо тя заступника во всем животе моем, наставника же и хранителя, от Бога дарованнаго ми во веки.
Не остави в путь шествующия души моея окаянныя убити разбойником, святый ангеле, яже ти от Бога предана бысть непорочне; но настави ю на путь покаяния.
Слава: Всю посрамлену душу мою приводя от лукавых ми помысл и дел, предвари, наставниче мой, и исцеление ми подаждь благих помысл, уклоняти ми ся внегда на правыя стези.
И ныне: Премудрости исполни всех и крепости божественныя, ипостасная премудросте Вышняго, Богородицы ради верою вопиющих: отец наших Боже, благословен еси.

Песнь 8.

Ирмос: Царя небеснаго, Егоже поют вои ангельстии, хвалите и превозносите во вся веки.
От Бога посланный, утверди живот мой, раба твоего, преблагий ангеле, и не остави мене во веки.
Ангела тя суща блага, души моея наставника и хранителя, преблаженне, воспеваю во веки.
Слава: Буди ми покров и забрало в день испытания всех человек, воньже огнем искушаются дела, благая же и злая.
И ныне: Буди ми помощница и тишина, Богородице Приснодево, рабу Твоему, и не остави мене лишена быти Твоего владычества.

Песнь 9.

Ирмос: Воистину Богородицу Тя исповедуем спасеннии Тобою, Дево чистая, с бесплотными лики Тя величающе.
Иисусу: Помилуй мя, едине Спасе мой, яко милостив еси и милосерд и праведных ликов сотворити мя причастника.
Мыслити ми присно и творити, Господень ангеле, благая и полезная даруй, яко сильна яви в немощи, и непорочна.
Слава: яко имея дерзновение ко царю небесному, Того моли и с прочими бесплотными, помиловати мя окаяннаго.
И ныне: Много дерзновение имущи, Девице, к Воплощшемуся из Тебе, преложи мя от уз, и разрешение ми подаждь и спасение молитвами Твоими.

Молитва Ангелу

Ангеле Христов святый, к тебе припадая молюся, хранителю мой святый, преданный мне на соблюдение души и телу моему грешному от святаго крещения, аз же своею леностию, и своим злым обычаем, прогневах твою пречистую светлость, и отгнах тя от себе всеми студными делы: лжами, клеветами, завистию, осуждением, непокорством, братоненавидением и злопомнением, сребролюбием, прелюбодеянием, яростию, скупостию, объяданием без сытости, многоглаголанием, злыми помыслы и лукавыми, и гордым обычаем, имый самохотение на всякое плотское вожделение. О злое мое произволение, егоже и скоти бессловеснии не творят, да како возможеши возрети на мя, или приступити ко мне; которыма очима, ангеле Христов, воззриши на мя, оплетшая зле во гнусных делех; да како уже возмогу отпущения просити горьким и злым моим и лукавым деянием, в няже впадаю по вся дни и нощи, и на всяк час; но молюся ти припадая, хранителю мой святый, умилосердися на мя грешнаго и недостойнаго раба твоего (имя рек), буди ми помощник и заступник на злаго моего сопротивника, святыми твоими молитвами, и царствия Божия причастника мя сотвори со всеми святыми, всегда, и ныне и присно, и во веки веков. Аминь.

 

 

Канон Ангелу-Хранителю

Для католиков славяно-византийского обряда. По кн.: "Миром Господу помолимся". Брюссель, 1991.