Кондак 1. Образ соприсносущный славы Отчия, любовию снисшел еси к нам, Слове Божий, за нас быв человек, и положив о нас душу Твою возставил еси в нас образ Божий. Темже Божественному Твоему Сердцу благодарно поем: Радуйся, Сердце Иисусово, любовию к нам горящее.

Икос 1. Зачат в утробе пречистыя Матере Твоея, первая преблагословеннаго Сердца Твоего чувствия вознесл еси о спасении нашем, Иисусе, уголовль оттоле Богоносное Твое Тело на жертву Голгофскую за грехи наша, глаголя ко Отцу Твоему небесному: жертвы и приношения не восхотел еси, тело же совершил Ми еси. Тогда рех: се иду. (Пс 39,1) Сего ради почивающу Тебе в утробе приснодевственней, яко Агнцу непорочному, хотящему взяти грехи мира, с Херувимы и Серафимы приникше покланяемся, и чувствии блаженнейшия Матере Твоея Тя приветствуем: Радуйся, Сердце Иисусово, паче Ангел нас возлюбившее. Радуйся, Сердце Иисусово, беззакония наша себе присвоившее. (Пс 21,1) Радуйся, Сердце Иисусово, любве святыя воню на ны разливающее. Радуйся, Сердце Иисусово, любовию к нам горящее.

Кондак 2. Тебе обручившагося естеству нашему во чреве пречистыя Ти Матере, со светилы исполнь елеем Твоея благодати сретаем, поюще Ти небесному жениху нашему надчертожную песнь: Аллилуиа.

Икос 2. Лиси язвины имут, и птицы небесныя гнезда; ты же содержай всяческая яко Бог, и исполняяй всяко животно благоволения, не имел еси где главы подклонити (Лк 9,58), и любве ради нашея отвержен от обители, родился еси в вертепе, и положился еси в яслех между скоты, седяй на Херувимех, да нас сподобиши обителий небесных, и сожития Ангелов: и первый плачь восприял еси, да слезами Твоими измыеши беззакония наша и отъимеши от нас плачь вечный, и пеленами обвился еси, да нас разреши от уз греховных. Темже богатству любве Сердца Твоего дивящеся поем: Радуйся, Сердце Иисусово, о славе в вышних взыграющееся. Радуйся, Сердце Иисусово, о мире на земли красующееся. Радуйся, Сердце Иисусово, о благоволении Отца Твоего небеснаго в человецех наслаждающееся. Радуйся, Сердце Иисусово, любовию к нам горящее.

Кондак 3. Осияваеми славою Твоею, якоже пастырие и наставляеми звездою светлости Твоея, якоже царие Волсви, покланяемтися нас ради лежащему в вертепе вифлеемстем, Иисусе, и приносим Ти, яко злато и кадило и смирну исповедание Твоего Царства, и Божества, и смертнаго нас ради человечества, поюще неизследованней любови Сердца Твоего Ангельскую песнь: Аллилуиа.

Икос 3. Единородный Сын Отцу Своему Небесному снизшел еси к нам, Спасе, тайно якоже иногда дождь на руно (Пс 81,6), и первая тридесять лета пожития Твоего с человеки нас ради превел еси в скрытии, в смирении, в нищите, в трудех, в неутомимем подвизе молебнем о спасении нашем, повинуяся во всем родителям Твоим туземнем (Лк 8,51) прилежа же древоделию (Златоуст. Cat. Aur. S. Th. in I. Luc.), да выну имаши пред очима твоима древо крестное, имже хотел еси искупити нас поработившихся сатане древом смертоносным. Темже неизмеримей учине любве Сердца Твоего поем: Радуйся, Сердце Иисусово, повиноватися человеком Бога ради нас научающее. Радуйся, Сердце Иисусово, смиренная мудрствовати нас воздвизающее. Радуйся, Сердце Иисусово, к трудолюбию нас ободряющее. Радуйся, Сердце Иисусово, любовию к нам горящее.

Кондак 4. Сидящему Ти на престоле высоце, и приемлющу трисвятое пение от шестокрылатых Серафимов (Ис 6, 2, 3; Иоан 13,41), умаленому же нас ради странным образом в убозей храмине Назаретстей, с Пречистою ти Материю и блаженнейшим ея Обручником чудящеся, поем: Аллилуиа.

Икос 4. По совершении тридесять лет жития Твоего сокровеннаго, помазан исперва Духом Господним, и подвизався четыредесятидневным постом в пустыни и искусився тамо от сатаны, изшел еси на проповедание лета Господня благоприятна, и пребывая в нем три лета, понесл еси вар и студ, бдения и труды, нищету и гонения с всяким долготерпением, кротостию и смирением; проходя же без пристани пешешествием землю святую, благотворя и исцеляя вся, исполнил еси ю чудесы безчисленными; разрешал еси грешники, ял и пил еси с мытари, да исцелиши недуги их душевныя; злобным грозил еси, да покаются и не погибнут; вся собирая, якоже кокошь птенцы своя под крыле своя (Мф 23,37); об нощ, якоже Иаков с Ангелом, брался еси молитвами со Отцем Твоим небесным о спасении нашем. Темже поминающе сию непостижимую любовь Сердца Твоего к нам, восклицаем, поюще: Радуйся, Сердце Иисусово, благости пучино. Радуйся, Сердце Иисусово, милосердия престоле. Радуйся, Сердце Иисусово, жертво непрестанная любве. Радуйся, Сердце Иисусово, любовию к нам горящее.

Кондак 5. Научитеся от мене, яко кроток есмь и смирен Сердцем, и обрящете покой душам вашим, рекл еси, Спасе наш премилостиве; темже подаждь нам благодать подражати Тебе боголепно, кротости же и смиренности Сердца Твоего достойно пети: Аллилуиа.

Икос 5. Видяще Иисусе возлюбленнаго Ти друга Лазаря, четверодневна во гробе, сожалися человеколюбивое Твое Сердце, и прослезися еси, якоже глаголати Иудеом: виждь, яко любляше его; воскресил же его от мертвых, преложил еси плачь Марии и Марфы в радость. Обаче под образом Лазаря прослезился еси и над возлюбленным Ти всем родом человеческим умершем Тебе прегрешении своими: хотя же его воскресити от смерти духовныя, в последний же день такожде и от смерти телесныя, нуждался еси любовию Сердца Твоего, желая прежде сам вкусити зань смерти и положитися во гробе. Темже и мы дивящеся неисповедимей любви Сердца Твоего к нам, с восхищением восклицаем: Видите, како любляше нас, - и благодарно поем: Радуйся, Сердце Иисусово, безконечно любящее и безконечно любимое. Радуйся, Сердце Иисусово, о нашей смерти глубоко смущающееся. Радуйся, Сердце Иисусово, смерти жало, еже на нас силою любве Твоея приютившее. Радуйся, Сердце Иисусово, любовию к нам горящее.

Кондак 6. Прежде даже не принял еси мук желанием Сердца Твоего желал еси ясти с нами последнюю Пасху законную, да нас лучшия Пасхи сподобиши во царствии Отца Твоего, неизреченней любви Сердца Твоего поющих: Аллилуиа.

Икос 6. Отходя ко Отцу Твоему небесному, не стерпел еси отлучитися от нас, но оставил еси нам Тебе самаго под виды хлеба и вина, жертву всегдашнюю и манну небесную в напутие к земли обетования горней. Нам убо спребывая Пастырю добрый, питаеши нас пречистою Твоею Плотию и напаяеши честнейшую Ти Кровию, смешаешися нам во едино, якоже части воска растаена; Царь же славы сый, входиши со двором Твоим небесным под наша аще и убогия кровы и утешаеши и подкрепляеши нас в последнем подвизе нашем. Темже ужасающеся о крайнем нисхождении Сердца Твоего к нам, поем сице: Радуйся, Сердце Иисусово, во святем причастии в живот вечный нас питающее. Радуйся, Сердце Иисусово, во святых Тайнах до скончания века на земли спребывающее. Радуйся, Сердце Иисусово, любовию к нам горящее.

Кондак 7. Имуще Тя, Спасе, хлеб Ангельский содержащь в себе всяку сладость, да не возвратятся сердца наша во Египет пожеланий плотских, но да чувствуем сладость Его и сладость неизреченную Сердца Твоего, поюще Ему: Аллилуиа.

Икос 7. Якоже иногда Праотец Твой Давид, обольщен ближайшим своим советником, и гоним своим ему сыном, прохождаше с верною си дружиною Кедрон, и тужя и плачяся, восхождаше на гору масличну (2Цар 15), сице и Ты, Спасе, предан от злочестиваго Иуды, и гоним сродники Твоими Иудеи, прешел еси со верными Ти Апостолы тойже поток, и скорбел еси ко Отцу Твоему небесному, да мимонесет от Тебе чашу страстей, обаче духом Сердце Твое нуждашеся креститися крещением техже; и волею претерпел еси на горе масличней подвиг кровный, да помажеши нас елеем Твоея благодати, и сотвориши нас борцы подвизающияся за неувядаемый венец славы. Темже непостижимей Сердца Твоего любви поем: Радуйся, Сердце Иисусово, нас ради даже до пота кровнаго подвизавшееся. Радуйся, Сердце Иисусово, подвига нашего сило необоримая и чаши нашея услаждение. Радуйся, Сердце Иисусово, любовию к нам горящее.

Кондак 8. Заушения, заплевания, укоризны, раны, страшная биения и терновен венец восприял еси, Господь и Бог наш, да нас исхитиши мук вечных, и сподобиши почестей и венцев небесных, поющих неизглубимей любви Сердца Твоего: Аллилуиа.

Икос 8. Небо и земля да ужаснется о бездне любве Твоея к нам, Сыне Божий, ибо нас ради между разбойники на кресте наг висиши, тяготою пречистаго Ти тела язв гвоздинных непристанно расщирение и неисповедимую болезнь терпиши; в жажде Твоей оцтом и желчию напаяешися: болезнию Преблагословенныя Ти Матере паче уязвляешися: ктому же и от Отца Твоего без утешения оставляешися. Обаче в мори болезни и горести, любезнейшее Твое Сердце на враги Своя не ожесточашеся, но бяше яко воск таяй посреде чрева Твоего (Пс 21, 15), и молился еси о них ко Отцу Твоему небесному, извиняя их и глаголя: Отче отпусти им, не ведят бо, что творят; и разбойнику кающемуся рай обещал еси, глаголя: Днесь со Мною будеши в раи. Темже недоумеющеся о неизмеримей любви Сердца Твоего зовем: Радуйся, Сердце Иисусово, страдания ужаснаго жертво самоизволимая. Радуйся, Сердце Иисусово, кротости и долготерпения бездно непостижимая. Радуйся, Сердце Иисусово, олтарю огня любве неугасимыя. Радуйся, Сердце Иисусово, любовию к нам горящее.

Кондак 9. Сый над всеми Бог благословен во веки, был еси за нас проклятие, пригвоздився на древе, и искупил ны еси от клятвы древния. Сего ради выну благословяще Тя, неизреченней любви Сердца Твоего поем: Аллилуиа.

Икос 9. Больше сея любве никтоже имать, да душу свою положит кто о друзехсвоих, рекл еси, Спасе; ибо и за праведнаго едва кто дерзает умрети: Ты же составил еси любовь Твою к нам, яко за нас нечестивых и врагов Тебе, умерл еси. Плотию же уснув на кресте, от ребра купно же и Сердца Твоего прободеннаго источил еси кровь и воду, имиже Отец Твой небесный созда нас Тебе Обручницу Церковь святую, юже любовию неразлучною сердца Твоего возлюбил еси. Сего ради Сердцу Твоему ураненному любовию нашею поем: Радуйся, Сердце Иисусово, любовию нашею даже до смерти истаявающее (Песн 5,9). Радуйся, Сердце Иисусово, любовию Серафимом непостижимою нас возлюбившее. Радуйся, Сердце Иисусово, любовию к нам горящее.

Кондак 10. Се ныне кость от костий Твоих и плоть от плоти Твоея суще (Еф 5,30) небесный наш Обручниче, Иисусе, погагаем Тя, яко печать на сердци нашем, и яко печать на мышци нашей (Песн 8,6), поюще безконечней любви Сердца Твоего: Аллилуиа.

Икос 10. Начаток стяжания Твоего паче всех любимую Ти Матерь, стоящую под крестом Твоим дал еси в матерь нам недостойным рабом Твоим, Спасе наш, и уязвил еси ю нас ради болезнию непостижимою; Та бо приемши на обятия Своя пречистое Тело Твое низложенное со креста, и зрящи ризу сию божества от Себе Тебе истканную, раздерту от лютейшаго зверя греховнаго, плакашеся горько, якоже иногда Иаков о Иосифе, и не хотяше утешитися, но желаше до ада снити за Тобою. Сего ради толикую любовь Сердца Твоего к нам ублажающе, зовем: Радуйся, Сердце Иисусово, Матере своея сладчайшим попечением нас почетшее. Радуйся, Сердце Иисусово, Себе и вся за ны пожертвовавшее. Радуйся, Сердце Иисусово, любовию к нам горящее.

Кондак 11. Видяще Тя, Иисусе, снята со креста мертва и неизчетными ранами нас ради уязвленна, во гробе же положена, чудящеся зовем: Видите како любляше нас! И неизследованную Сердца Твоего любовь вспоминающе, поем Ти надгробное пение: Аллилуиа.

Икос 11. По воскресении Твоем, Пастырю премилостиве, Иисусе, не отреклся еси овец Твоего любимаго стада, но аще и оставиша Тя во время страсти, паки во кротости Сердца Твоего собрал еси я; и известив нам быти с нами до скончания века, вознеслся еси на небо, да тамо показуя язвы Твоя Отцу Твоему небесному, ходатайствуеши о нас. Запечатлев же любовь Твою ниспосланием на ны Святаго Утешителя Духа, привлекл еси вся к Тебе. Сего ради, наставляеми темже Святым Твоим Духом, ублажаем неисповедимую любовь Сердца Твоего, поюще: Радуйся, Сердце Иисусово, сладосте в наших печалех. Радуйся, Сердце Иисусово, дерзосте в наших напастех. Радуйся, Сердце Иисусово, крепосте в наших бранех. Радуйся, Сердце Иисусово, любовию к нам горящее.

Кондак 12. Не Моисей раб Божий, со Мариею, но сам Бог истинный со Пречистою Ти Материю исшел еси на спасение наше, Христе, и поразив жезлом крестным мысленнаго Фараона, исправил еси нас к земли обетования небесней, поющих любви Сердца Твоего победную песнь: Аллилуиа.

Икос 12. Яко орел покры гнездо свое, и на птенцы своя возжеле, простер крыле свои и прият их и подъят их на раму своею (Втор 32,12): тако и нас, Иисусе, преходящих пустыню сего мира к земли обетования лучшей, приял еси под крыле Твоего сладкаго промысла, и возжелел еси над нами: питаешь нас пречистою Твоею Плотию и честною Твоею Кровию, и облаком пресвятаго Твоего Духа просвещаеши нас в нощи неведения, и охлаждаеши ны в дни зноя всяких тяжестий. Сего ради превозносяще безконечную любовь Сердца Твоего к нам, с любовию поем Ему: Радуйся, Сердце Иисусово, от смертоноснаго яда змия ветхаго нас исцеляющее. Радуйся, Сердце Иисусово, в бранех наших за нас одолевающее. Радуйся, Сердце Иисусово, яко щитом благоволения Твоего нас венчающее. Радуйся, Сердце Иисуса, любовию к нам горящее.

Кондак 13. О всепетое Сердце, раю сладостий небесных, место упокоения. В тебе плод жизни вечныя, в Тебе источник вод живых. Отверзи нам недро Твое труждающимся и обременненым, да в нем упокоимся и поем ти: Аллилуиа.

Паки и паки, преклоньше колена, миром Господа молим. – Господи помилуй (3).

Владыко многомилостиве Господи Иисусе Христе, Боже наш, что Ти воздадем за толикую любовь Сердца Твоего, еюже венчал еси нас? Исповедуем, яко вси мы стяжаннии от Тебе неизглаголанными труды и подвиги, в конец и многоценною Твоею Кровию, должни есмы благочестием жития нашего воздаяти Тебе любовь за любовь. Но, о забвения и студенности сердец наших, иже в жажде Сердца Твоего о спасении нашем напаяем Тя паки отцом и желчию нерадения и беззаконий наших. Обаче, понеже в сих последних временах неверства и растления нравов благоволил еси открыти нам в руце блаженныя рабы Твоея Маргариты, богатство любве Твоего пламеннаго, раненнаго, тернием венчаннаго и крестом навершеннаго Сердца, и обещал еси не полагати ктому предела в раздаянии благодатей Твоих небесных, всем притекающим к нему: сего ради, одушевляеми толиким нисхождением и человеколюбием Твоим, со упованием и благоговением приступаем к священнейшему Сердцу Твоему, к сему престолу преизобильныя благодати Божия, и просим и молим и милися деем, премени молитвами Пренепорочныя Твоея Матере, студенность нашего сердца в горящую любовь, якоже иногда в Кане Галилейстей воду в державно вино; сокруши Духом Твоим Святым сердца наша, даруй нам слезы покаяния и умиления, и простив беззакония наша, подаждь нам исправление постоянное жития; яко да в любви Твоей сподобимся лицезрения и любве совершенныя святыя Троицы со святыми Твоими в безконечныя веки. Аминь.