Владыко Господи Вседержителю, исцеляяй всякий недуг, и всякую язю, сам и сию днесь родившую рабу твою, имярек, исцели, и возстави ю от одра, на немже лежит, зане, по пророка Давида словеси: в беззакониих зачахомся, и сквернави всы есмы пред тобою. Сохрани сию, и сего младенца, егоже роди: покрый ю под кровом крилу твоею, от днешняго дне, даже до последняго ея скончания, молитвами пречистыя Богородицы, и всех святых: яко благословен еси во веки веков, аминь.

Владыко Господи Боже наш, родивыйся от пречистыя Владычицы нашея Богородицы и приснодевы Марии, и яко младенец в яслех возлегий, и яко детищь восприемлемь бывый: сам и сию рабу твою, днесь родившую сие отроча, помилуй, и прости вольная и невольная ея прегрешения, и сохрани ю от всякаго диавольскаго мучительства: и из нея рожденнаго младенца соблюди от всякаго ада, от всякия лютости, от всякия бури сопротивнаго, от духов лукавых, дневных же и нощных. Сию же соблюди под державною рукою твоею, и даждь ей скорое востание, и от скверны очисти, и болезни исцели, и здравие и благомощие души же и телу даруй, и ангелы светлыми и сияющими сию огради, и соблюди от всякаго наития невидимых духов. Ей, Господи, от недуга и слабости, от ревности и зависти, и от очес призора: и помилуй ю и младенца, по велицей милости твоей: и очисти ю от телесныя скверны, и различнх ей находящихся утробных стужений: и изведи ю скорою милостию твоею, во смиреннем ея теле во исправление: и из нея рожденнаго младенца сподоби поклонитися земному храму, егоже уготовал еси славослоитися имени твоему святому.
Яко подобает Тебе всякая слава, честь, и поклонение, Отцу, и Сыну, и Святому Духу, ныне и присно, и во веки веков, аминь.

Господи Боже наш, благоволивый снити с небес, и родитися от святыя Богородицы и приснодевы Марии, спасения ради нас грешных, ведый немощное человеческаго естества, прости рабе твоей, имярек, днесь родившей, по множеству щедрот твоих: ты бо рекл еси, Господи, радуйтеся, и умножитеся, и исполните землю, и обладайте ею. Сего ради и мы раби твои молимся, и дерзающе незлобивым твоим человеколюбием, со страхом вопием к царствия твоего святому имени: Призри с небесе, и виждь немощь нас осужденных, и прости рабе твоей сей, имярек, и всему дому, в немже родися отроча, и прокоснувшымся ей, и зде обретающымся всем, яко благ и человеколюбец Бог прости: яко един имаши власть оставляти грехи: молитвами пресвятыя Богородицы, и всех святых твоих, аминь.