ТРОПАРИ ДНЕВНЫЕ
с кондаками, прокимнами, аллилуиа и причаст.

В понедельник

Тропарь, глас 4: Небесных воинств архистратизи, молим вас присно мы недостойнии, да вашими молитвами оградите нас кровом крил невещественныя вашея славы, сохраняюще ны припадающыя прилежно, и вопиющыя: от бед избавите ны, яко чиноначальницы вышних сил.

Кондак, глас 2: Архистратизи божии, служителие божественныя славы, ангелов начальницы и человеков наставницы, полезное нам просите и велию милость, яко безплотных архистратизи.

На литургии:

Прокимен, гл. 4: Творяй Ангелы Своя духи, и слуги Своя пламень огненный.
Стих: Благослови, душе моя, Господа, Господи Боже мой, возвеличился еси зело.
Аллилуиа, гл. 5: Хвалите Господа вси Ангели Его, хвалите Его вся силы Его.
Стих: Яко той рече, и быша: Той повеле, и создашася.
Причастен: Творяй Ангелы Своя духи, и слуги Своя пламень огненный.

Во вторник

Тропарь, глас 2: Память праведнаго с похвалами, тебе же довлеет свидетельство господне, предтече: показал бо ся еси воистинну и пророков честнейший, яко и в струях крестити сподобился еси проповеданнаго. Темже за истину пострадав радуйся, благовестил еси и сущым во аде Бог явльшагося плотию, вземлющаго грех мира, и подающаго нам велию милость.

Кондак, глас 3: Пророче божий, и предтече благодати, главу твою яко шипок священнейший от земли обретше, исцеления всегда приемлем: ибо паки, якоже прежде, в мире проповедуеши покаяние.

На литургии:

Прокимен, гл. 7: Возвеселится праведник о Господе и уповает на Него.
Стих: Услыши, Боже, глас мой, внегда молити ми ся к Тебе.
Аллилуиа, гл. 4: Праведник яко финикс процветет, яко кедр, иже в Ливане, умножится.
Стих: Насаждени в дому Господни, во дворех Бога нашего процветут.
Причастен: В память вечную будет праведник, от слуха зла не убоится.

В среду

Тропарь, глас 1: Спаси Господи люди Твоя, и благослови достояние Твое, победы благоверным людем Твоим на сопротивныя даруя, и Твое сохраняя крестом Твоим жительство.

Кондак, глас 4: Вознесыйся на крест волею, тезоименитому Твоему новому жительству щедроты Твоя даруй, Христе Боже: возвесели силою Твоею благоверных царей, победы дая им на супостаты, пособие имущым Твое оружие мира, непобедимую победу.

На литургии:

Прокимен, песнь Богородицы, глас 3: Величит душа моя Господа, и возрадовася дух мой о Бозе, Спасе моем.
Стих: Яко призре не смирение рабы Своея, се бо отныне ублажат мя вси роди.
Аллилуиа, гл. 8: Слыши, дщи, и виждь, и приклони ухо твое.
Стих: Лицу твоему помолятся богатии людстии.
Причастен: Чашу спасения прииму и имя Господне призову.

В четверг

Тропари, глас 3: Апостоли святии, молите милостиваго Бога, да прегрешений оставление подаст душам нашым.

Глас 4: Правило веры и образ кротости, воздержания учителя, яви тя стаду твоему, яже вещей истина. Сего ради стяжал еси смирением высокая, нищетою богатая: отче священноначальниче Николае, моли Христа Бога, спастися душам нашым.

Кондаки, глас 2: Твердыя и боговещанныя проповедатели, верх ученик Твоих, Господи, приял еси в наслаждение благих Твоих и покой: болезни бо онех, и смерть приял еси паче всякаго всеплодия, едине сведый сердечная.

Глас 3: В Мирех, святе, священнодействитель показался еси: христово бо, проеподобне, евангелие исполнив, положил еси душу твою о людех твоих, и спасл еси неповинныя от смерти. Сего ради освятился еси, яко великий таинник божия благодати.

На литургии:

Прокимен, гл. 8: Во всю землю изыде вещание их, и в концы вселенныя глаголы их.
Стих: Небеса поведают славу Божию, творение же руку Его возвещает твердь.
Аллилуиа, гл. 1: Исповедят небеса чудеса Твоя, Господи, ибо истину Твою в церкви святых.
Стих: Бог прославляем в совете святых, велий и страшен есть над всеми окрестными Его.
Причастен: Во всю землю изыде вещание их, и в концы вселенныя глаголы их.

В пятницу

Тропарь, глас 1: Спаси Господи люди Твоя, и благослови достояние Твое, победы благоверным людем Твоим на сопротивная даруя, и Твое сохраняя крестом Твоим жительство.

Кондак, глас 4: Вознесыйся на крест волею, тезоименитому Твоему новому жительству щедроты Твоя даруй, Христе Боже: возвесели силою Твоею благоверных царей, победы дая им на супостаты, пособие имущым Твое оружие мира, непобедимую победу.

На литургии

Прокимен, гл. 7: Возносите Господа Бога нашего ипоклоняйтеся подножию ногу Его, яко свято есть.
Стих: Господь воцарися, да гневаются людие.
Аллилуиа, гл. 1: Помяни сонм Твой, егоже стяжал еси исперва.
Стих: Бог же Царь наш прежде века, содела спасение посреде земли.
Причастен: Спасение соделал еси посреде земли, Боже.

В субботу

Тропари, глас 2: Апостоли, мученицы и пророцы, святителие, преподобнии и праведнии, добре подвиг совершивший и веру соблюдшии, дерзновение имуще ко Спасу, о нас того яко блага молите спастися, молимся, душам нашым.

Помяни, Господи, яко благ, рабы Твоя, и елика в житии согрешиша, прости: никтоже бо безгрешен, токмо Ты, могий и преставленным дати покой.

Кондаки, гл. 8: Со святыми упокой, Христе, душы раб Твоих, идеже несть болезнь, ни печаль, ни воздыхание, но жизнь безконечная.

Яко начатки естества, насадителю твари, вселенная приносит Ти, Господи, богоносныя мученики: тех молитвами в мире глубоце церковь Твою, жительство Твое, Богородицею соблюди, многомилостиве.

На литургии

Прокимен, гл. 8: Веселитеся о Господе и радуйтеся, праведнии.
Стих: Блажени, ихже оставишася беззакония и ихже прикрышася греси.
И умершим, гл. 6: Души их во благих водворятся.
Аллилуиа, гл. 4: Воззваша праведнии, и Господь услыша их, и от всех скорбей их избави их.
Стих: Многи скрби праведным, и от всех их избавит я Господь.
Стих: Блажени, яже избрал и приял еси, Господни, и память их в род и род.
Причастен: Радуйтеся праведнии о Господе, правым подобает похвала.
Другой: Блажени, яже избрал и приял еси, Господи, и память их в род и род.

 

ТРОПАРИ ДНЕВНЫЕ

с кондаками, прокимнами, аллилуиа и причаст. Для католиков славяно-византийского обряда. По молитвеннику "Миром Господу помолимся" (Брюссель, 1991), и "Иерейскому молитвослову" (Рим, 1950).