Бог наш на небеси и на земли, вся, елика восхоте, сотвори.
1: Во исходе исраилеве от Египта, дому иаковля из людей варвар, бысть Иудеа святыня его.
2: Море виде и побеже, Иордан возвратится вспять.
3: Что ти есть, море, яко побегло еси; и тебе, Иордане, яко возвратился еси вспять;
И паки: Бог наш на небеси:

Отпуст во всю светлую седмицу: Христос воскресый из мертвых, смертию смерть поправый и сущым во гробех живот даровавый, истинный Бог наш:

Гласом моим ко Господу воззвах, гласом моим к Богу, и внят ми.
1: В день скорби моея Бога взысках.
2: Отвержеся утешитися душа моя.
3: Боже, во святем путь Твой.
И паки: Гласом моим:

Внуши, Боже, молитву мою, и не презри моления моего.
1: Вонми ми и услыши мя.
2: Яко уклониша на мя беззаконие.
3: Аз к Богу воззвах, и Господь услыша мя, вечер и заутра и полудне.
И паки: Внуши, Боже:

Возлюблю Тя, Господи, крепосте моя, Господь утверждение мое.
1: Бог мой, помощник мой, и уповаю на него.
2: Хваля призову Господа, и от враг моих спасуся.
3: Услыша от храма святаго своего глас мой.
И паки: Возлюблю Тя:

Дал еси достояние боящымся Тебе, Господи.
1: От конец земли к Тебе воззвах.
2: Покрыюся в крове крил Твоих.
3: Тако воспою имени Твоему во веки.
И паки: Дал еси:

Тропарь, глас 7: Запечатану гробу, живот от гроба возсиял еси, Христе Боже, и дверем заключенным, учеником предстал еси, всех воскресение, дух правый теми обновляя нам, по велицей Твоей милости.

Кондак, глас 8: Любопытною десницею жизнодательная Твоя ребра Фома испыта, Христе Боже: заключенным бо дверем яко вшел еси, с прочими апостолы вопияше Тебе: Господь еси и Бог мой.

Тропарь воскресен, глас 2: Егда снизшел еси к смерти, животе безсмертный, тогда ад умертвил еси блистанием божества. Егда же и умершыя от преисподных воскресил еси, вся силы небесныя взываху: жизнодавче Христе Боже наш, слава Тебе.
И: Благообразный Иосиф, с древа снем пречистое тело Твое, плащаницею чистою обвив, и благоуханьми, во гробе нове покрыв положи: но тридневен воскресл еси, Господи, подаяй мирови велию милость.
И: Мироносицам женам, при гробе предстал ангел вопияше: мира мертвым суть прилична, Христос же истления явися чуждь. Но возопийте: воскресе Господь, подаяй мирови велию милость.

Кондак, глас 2: Радоватися мироносицам повелел еси, плачь праматере Евы утолил еси воскресением Твоим, Христе Боже, апостолом же Твоим проповедати повелел еси: Спас воскресе от гроба.

Кондак Пасхи: Аще и во гроб снизшел еси, безсмертне, но адову разрушил еси силу, и воскресл еси яко победитель, Христе Боже, женам мироносицам вещавый: радуйтеся, и Твоим апостолом мир даруяй, падшым подаяй воскресение.

Тропарь воскресен, глас 3: Да веселится небесная, да радуются земная, яко сотвори державу мышцею своею Господь: попра смертию смерть, первенец мертвых бысть, из чрева адова избави нас, и подаде мирови велию милость.

Кондак, глас 3: Душу мою, Господи, во гресех всяческих и безместными деяньми люте разславлену, воздвигни божественным Твоим предстательством, якоже и разслабленнаго воздвиг еси, древле, да зову ти спасаемь: щедре, слава, Христе, державе Твоей.

Тропарь, глас 8: Преполовившуся празднику, жаждущую душу мою благочестия напой водами, яко всем, Спасе, возопил еси: жаждай да грядет ко мне и да пиет. Источниче жизни нашея, Христе Боже, слава Тебе.

Кондак, глас 4: Празднику законному преполовляющуся, всех творче и Владыко, к предстоящым глаголал еси, Христе Боже: приидите и почерпите воду безсмертия. Темже Тебе припадаем и верно вопием: щедроты Твоя даруй нам, Ты бо еси источник жизни нашея.

Тропарь воскресен, глас 4: Светлую воскресения проповедь от ангела уведевшая господни ученицы, и прадеднее осуждение отвергшя, апостолом хвалящяся глаголаху: испровержеся смерть, воскресе Христос Бог, даруяй мирови велию милость.

И тропарь преполовения: Преполовившуся празднику:

Кондак, глас 8: Верою пришедши на кладязь, самаряныня виде тя премудрости воду, еюже напоившася обильно, царствие вышнее наследова вечно, приснославная.

Кондак преполовения: Празднику законному преполовляющуся, всех творче и Владыко, к предстоящым глаголал еси, Христе Боже: приидите и почерпите воду безсмертия. Темже Тебе припадаем и верно вопием: щедроты Твоя даруй нам, Ты бо еси источник жизни нашея.

Тропарь воскресен, глас 5: Собезначальное Слово Отцу и Духови, от девы рождшееся на спасение наше, воспоим, вернии, и поклонимся: яко благоволи плотию взыти на крест и смерть претерпети и воскресити умершыя славным воскресением своим.

Кондак, глас 4: Душевныма очима ослеплен, к Тебе, Христе, прихожду, якоже слепый от рождения, покаянием зову Ти: Ты сущих во тьме свет пресветлый.

Кондак Пасхи: Аще и во гроб снизшел еси:

Тропарь, глас 4: Вознеслся еси во славе, Христе Боже наш, радость сотворивый учеником, обетованием святаго Духа, извещенным им бывшым благословением, яко Ты еси Сын божий, избавитель мира.

Кондак, глас 6: Еже о нас исполнив смотрение, и яже на земли соединив небесным, вознеслся еси во славе, Христе Боже наш, никакоже отлучаяся, но пребывая неотступный, и вопия любящым Тя: аз есмь с вами, и никтоже на вы.

Отпуст: Иже во славе вознесыйся от нас на небо, и одесную седый Бога и Отца, Христос истинный:

Тропарь воскресен, глас 6: Ангельския силы на гробе Твоем, и стрегущии омертвеша, и стояше Мариа во гробе, ищущи пречистаго тела Твоего. Пленил еси ад, не искусився от него: сретил еси деву, даруяй живот. Воскресый из мертвых, Господи, слава Тебе.

Тропарь святых отец, глас 8: Препрославлен еси, Христе Боже наш, светила на земли отцы нашя основавый, и теми ко истинней вере вся ны наставивый: многоблагоутробне, слава Тебе.

Таже Вознесения: Вознеслся еси во славе:

Кондак, глас 8: Апостол проповедание и отец догматы едину веру утвердиша церкви, яже и носящи ризу истины, исткану от свышняго богословия, право правит и славит благочестия великое таинство.

Кондак Вознесения: Еже о нас:

Тропарь, глас 8: Глубиною мудрости человеколюбно вся строяй, и полезное всем подаваяй, едине содетелю, упокой, Господи, душы раб Твоих: на Тя бо упование возложиша, творца и зиждителя и Бога нашего.

Слава, и ныне: богородичен, глас тойже: Тебе и стену и пристанище имамы, и молитвенницу благоприятну к Богу: егоже родила еси, Богородице безневестная, верных спасение.

Кондак, глас 8: Со святыми упокой, Христе, душы раб Твоих, идеже несть болезнь, ни печаль, ни воздыхание, но жизнь безконечная.

Тропарь, глас 8: Благословен еси, Христе Боже наш, иже премудры ловцы явлей, низпослав им Духа святаго, и теми уловлей вселенную: человеколюбче, слава Тебе.

Кондак, глас 8: Егда снизшед языки слия, разделяше языки вышний: егда же огненныя языки раздаяше, в соединение вся призва: и согласно славим всесвятаго Духа.

Отпуст: Иже в видении огненных язык с небесе низпославый пресвятаго Духа на святыя своя ученики и апостолы, Христос истинный:

Тропари воскресен, глас 8: С высоты снизшел еси, благоутробне, погребение приял еси тридневное, да нас свободиши страстей: животе и воскресение наше, Господи, слава Тебе.

И святых, глас 4: Во всем мире мученик Твоих кровьми, яко багряницею и виссом, церковь Твоя украсившися, теми вопиет Ти, Христе Боже: людем Твоим щедроты Твоя низпосли, мир жительству Твоему даруй, и душам нашым велию милость.

Кондак, глас 8: Яко начатки естества насадителю твари, вселенная приносит Ти, Господи, богоносныя мученики. Тех молитвами в мире глубоце, церковь Твою, жительство Твое Богородицею соблюди, многомилостиве.