Настоятель со иереи, исходит поюще стихиру, глас 6: Воскресение Твое, Христе Спасе, ангели поют на небесех, и нас на земли сподоби, чистым сердцем Тебе славити.

Иерей велегласно возгласит: Слава святей, и единосущней, и животворящей, и нераздельней Троице, всегда, ныне и присно, и во веки веков.

И нам отвещающым: Аминь начинает настоятель с прочими служители, велегласно настоящий тропарь, во глас 5: Христос воскресе из мертвых, смертию смерть поправ, и сущым во гробех живот даровав.

Первый: Да воскреснет Бог, и расточатся врази его, и да бежат от лица его ненавидящии его.
И на кийждо стих мы поем тропарь: Христос воскресе: весь по единожды.
Вторый: Яко исчезает дым, да исчезнут, яко тает воск от лица огня его.
Христос воскресе:
Третий: Тако да погибнут грешницы от лица божия, а праведницы да возвеселятся.
Христос воскресе:
Четвертый: Сей день егоже сотвори Господь, возрадуесчя и возвеселимся в онь.
Христос воскресе: единожды:
Слава: Христос воскресе: единожды.
И ныне: Христос воскресе: единожды.

Таже настоятель поет вышшим гласом: Христос воскресе из мертвых, смертию смерть поправ:

И отверзаются врата. Входит настоятель с честным крестом, предъидущым ему со двема лампадами, и братиям поющым: И сущым во гробех живот даровав.

Таже ударяют во вся кампаны, и клеплют довольно, три звоны.
Вшед же настоятель со иереи во святый олтарь, и диакон глаголет ектению великую:
Миром Господу помолимся.

Возглас: Яко подобает Тебе всякая слава, честь и поклонение, Отцу, и Сыну, и святому Духу, ныне и присно, и во веки веков.
Лик: Аминь.

КАНОН.

Ирмос: Воскресения день, просветимся людие: Пасха, господня Пасха, от смерти бо к жизни, и от земли к небеси. Христос Бог нас преведе, победную поющыя.
Припев: Христос воскресе из мертвых.
Очистим чувствия, и узрим неприступным светом воскресения, Христа блистающася, и радуйтеся рекуща, ясно да услышим, победную поюще.
Небеса убо достойно да веселятся, земля же да радуется, да празднует же мир, видимый же весь и невидимый: Христос бо воста, веселие вечное.

Таже, ектениа малая, и возглас: Яко Твоя держава, и Твое есть царство, и сила, и слава, Отца, и Сына, и святаго Духа, ныне и присно, и во веки веков.

Ирмос: Приидите, пиво пием новое, не от камене неплодна чудодеемое, но нетления источник, из гроба одождивша Христа, в немже утверждаемся.
Ныне вся исполнишася света, небо же и земля и преисподняя: да празднует убо вся тварь востание христово, в немже утверждается.
Вчера спогребохся Тебе, Христе, совостаю днесь воскрешу Тебе, сраспинахся Тебе вчера: сам мя спрослави, Спаси, во царствии Твоем.

Ектениа малая, и возглас: Яко Ты еси Бог наш, и Тебе славу возсылаем, Отцу, и Сыну, и святому Духу, ныне и присно, и во веки веков.

Ипакои, глас 4: Предварившыя утро яже о Марии, и обретшыя камень отвален от гроба, слышаху от ангела: во свете присносущнем сущаго, с мертвыми что ищете яко человека; видите гробныя пелены: тецыте, и миру проповедите, яко воста Господь, умертвивый смерть, яко есть Сын Бога, спасающаго род человеческий.

Ирмос: На божественней стражи, богоглаголивый Аввакум, да станет с нами, и покажет светоносна ангела, ясно глаголюща: днесь спасение миру, яко воскресе Христос, яко всесилен.
Мужеский убо пол, яко разверзый девственную утробу, явися Христос: яко человек же, агнец наречеся: непорочен же, яко невкусен скверны, наша Пасха, и яко Бог истинен, совершен речеся.
Яко единолетный агнец, благословенный нам венец Христос, волею за всех заклан бысть, Пасха чистительная, и паки из гроба красное правды нам возсия солнце.
Богоотец убо Давид, пред сенным ковчегом скакаше играя: людие же божии святии, образов сбытие зряще, веселимся, божественне, яко воскресе Христос, яко всесилен.

Ектениа малая, и возглас: Яко благ и человеколюбец Бог еси, и Тебе славу возсылаем, Отцу, и Сыну, и святому Духу, ныне и присно, и во веки веков.

Ирмос: Утренюем утреннюю глубоку, и вместо мира песнь принесем Владыце, и Христа узрим правды солнце, всем жизнь возсияюща.
Безмерное Твое благоутробие, адовыми узами содержимии зряще, к свету идяху, Христе, веселыми ногами, Пасху хваляще вечную.
Приступим, свещеноснии, исходящу Христу из гроба яко жениху, и спразднуим любопразднственными чинми Пасху божию спасительную.

Ектениа малая, и возглас: Яко святися и прославися пречестное и великолепое имя Твое, Отца, и Сына, и святаго Духа, ныне и присно, и во веки веков.

Ирмос: Снизшел еси в преисподняя земли, и сокрушил еси вереи вечныя, содержащыя связанныя, Христе, и тридневен, яко от кита Иона, воскресл еси от гроба.
Сохранив цела знамения, Христе, воскресл еси от гроба, ключи девы не вредивый в рождестве Твоем, и отверзл еси нам райския двери.
Спасе мой, живое же и нежертвенное заколение, яко Бог сам себе волею привед Отцу, совоскресил еси всероднаго Адама, воскрес от гроба.

Ектениа малая, и возглас: Ты бо еси Царь мира, и Спас душ наших, и Тебе славу возсылаем, Отцу, и Сыну, и святому Духу, ныне и присно, и во веки веков.

Кондак, глас 8: Аще и во гроб снизшел еси, безсмертне, но адову разрушил еси силу, и воскресл еси яко победитель, Христе Боже, женам мироносицам вещавый: радуйтеся, и Твоим апостолом мир даруяй, падшым подаяй воскресение.

Икос: Еже прежде солнца Солнце, зашедше иногда во гроб, предвариша ко утру, ищущыя яко дне мироносицы девы, и друга ко друзей вопияху: о другини, приидите, вонями помажем тело живоносное и погребенное, плоть воскресившаго падшаго Адама, лежащую во гробе. Идем, потщимся якоже волсви, и поклонимся, и принесем мира яко дары, не в пеленах, но в плащанице обвитому, и плачим, и возопиим: о Владыко, востани, падшым подаяй воскресение.

И полагается синаксарь. Таже глаголем: Воскресение Христово видевше, поклонимся святому Господу Иисусу, единому безгрешному, Кресту Твоему покланяемся, Христе, и святое воскресение Твое поем и славим: Ты бо еси Бог наш, разве Тебе иного не знаем, имя Твое именуем. Приидите, вси вернии, поклонимся святому христову воскресению: се бо прииде крестом радость всему миру. Всегда благословяще Господа, поем воскресение его: распятие бо претерпев, смертию смерть разруши. Трижды.

Стихира, глас 6: Воскрес Иисус от гроба, якоже прорече, даде нам живот вечный, и велию милость. Трижды.

Ирмос: Отроки от пещи избавивый, быв человек, страждет яко смертен, и страстию смертное в нетления облачит благолепие, един благословен отцев Бог, и препрославлен.
Жены с миры богомудрыя в след Тебе течаху: егоже яко мертва со слезами искаху, поклонишася радующыяся живому Богу, и Пасху тайную Твоим, Христе, учеником благовестиша.
Смерти празднуем умерщвление, адово разрушение, иного жития вечнаго начала: и играюще поем виновнаго, единаго благословеннаго отцев Бога, и препрославленнаго.
Яко воистину священная и всепразднственная, сия спасительная нощь, и светозарная, светоноснаго дне, востания сущи провозвестница, в нейже безлетный свет из гроба плотски всем возсия.

Ектениа малая, и возглас: Буди держава царствия Твоего благословенна и препрославлена, Отца, и Сына, и святаго Духа, ныне и присно, и во веки веков.

Ирмос: Сей нареченный и святый день, един суббот, царь и господь, праздников праздник, и торжество есть торжеств: в оньже благословим Христа во веки.
Приидите, новаго винограда рождения, божественнаго веселия, в нарочитем дни воскресения, царствия христова приобщимся, поюще его, яко Бога во веки.
Возведи окрест очи твои, Сионе, и виждь: се бо приидоша к тебе, яко богосветлыя светила, от запада, и севера, и моря, и востока чада твоя, в тебе благословящыя Христа во веки.

Троичен: Отче вседержителю, и Слове, и Душе, треми соединяемое во ипостасех естество, пресущественне и пребожественне, в Тя крестихомся, и Тя благословим во вся веки.

Таже, ектениа малая, и возглас: Яко благословися имя Твое и прославися царство Твое, Отца, и Сына, и святаго Духа, ныне и присно, и во веки веков.

Ирмос: Светися, светися, новый Иерусалиме, слава бо господня на тебе возсия: ликуй ныне и веселися, Сионе: ты же, чистая, красуйся, Богородице, о востании рождества твоего.
О божественнаго, о любезнаго, о сладчайшаго Твоего гласа: с нами бо неложно обещался еси быти до скончания века, Христе: егоже, вернии, утверждение надежды имуще, радуемся.
О Пасха велия и священнейшая, Христе, о мудросте и Слове божий, и сило, подавай нам истее Тебе причащатися, в невечернем дни царствия Твоего.

Ектениа малая, и возглас: Яко Тя хвалят вся силы небесныя, Отца, и Сына, и святаго Духа, и Тебе славу возсылают, ныне и присно, и во веки веков.

Ексапостиларий, самогласен: Плотию уснув, яко мертв, царю и Господи, тридневен воскресл еси, Адама воздвиг от тли, и упразднив смерть: Пасха нетления, мира спасение. Трижды.

На хвалитех, Всякое дыхание: на глас 1.

Стих: Хвалите его на силах его, хвалите его по множеству величествия его.
Поем Твою, Христе, спасительную страсть и славим Твое воскресение.
Стих: Хвалите его во гласе трубнем, хвалите его во псалтири и гуслех.
Крест претерпевый, и смерть упразднивый, и воскресый из мертвых, умири нашу жизнь. Господи, яко един еси всесилен.
Стих: Хвалите его в тимпане и лице, хвалите его во струнах и органе.
Ада пленивый, и человека воскресивый воскресением Твоим, Христе, сподоби ны чистым сердцем Тебе пети и славити.
Стих: Хвалите его в кимвалех доброгласных, хвалите его в кимвалех восклицания. Всякое дыхание да хвалит Господа.
Боголепное Твое снизхождение славяще, поем Тя, Христе: родился еси от девы, и неразлучен был еси от Отца, пострадал еси яко человек, и волею претерпел еси крест. Воскресл еси от гроба, яко от чертога произшед, да спасеши мир: Господи, слава Тебе.

Стих: Да воскреснет Бог, и расточатся врази его, и да бежат от лица его ненавидящии его.
Пасха священная нам днесь показася, Пасха нова святая, Пасха таинственная, Пасха всечестная, Пасха Христос избавитель, Пасха непорочная, Пасха великая, Пасха верных, Пасха двери райския нам отверзающая, Пасха всех освящающая верных.
Стих: Яко исчезает дым, да исчезнут, яко тает воск от лица огня.
Приидите от видения жены благовестницы, и Сиону рцыте: приими от нас радости благовещения, воскресения христова: красуйся, ликуй и радуйся, Иерусалиме, царя Христа узрев из гроба, яко жениха, происходяща.
Стих: Тако да погибнут грешницы от лица божия, а праведницы да возвеселятся.
Мироносицы жены, утру глубоку, представша гробу живодавца, обретоша ангела на камени седяща, и той просвещав им, сице глаголаше: что ищете живаго с мертвыми: что плачете нетленнаго во тли; шедше проповедите учеником его.
Стих: Сей день, егоже сотвори Господь, возрадуемся и возвеселимся вонь.
Пасха красная, Пасха, господня Пасха, Пасха всечестная нам возсия: Пасха, радостию друг друга объимем. О Пасха, избавление скорби: ибо из гроба днесь яко от чертога возсияв Христос, жены радости исполни, глаголя: проповедите апостолом.

Слава, и ныне, глас 5: Воскресения день, и просветимся торжеством, и друг друга объимем. Рцем, братие, и ненавидящым нас: простим вся воскресением, и тако возопиим: Христос воскресе из мертвых, смертию смерть поправ, и сущым во гробех живот даровав.

Посем же ектениа: Помилуй нас, Боже: и возглас. Таже: Исполним утреннюю молитву нашу Господеви. И по возгласе, диакон: Премудрость. Мы же: Благослови. Иерей: Сый благословен Христос Бог наш, всегда, ныне и присно, и во веки веков. И мы: Аминь. Утверди Боже:

Посем настоятель, держя крест, вместо: Слава Тебе, Христе Боже: поет: Христос воскресе из мертвых, смертию смерть поправ. И мы поем: И сущым во гробех живот даровав.

Таже, крест возвышая, глаголет: Христос воскресе, трижды. Мы же отвещаем: Воистину воскресе, трижды. Таже, поем конечное: Христос воскресе: трижды, весь тропарь. И по нем пением кончим: И нам дарова живот вечный, покланяемся его тридневному воскресению.

ЧАСИ ВО СВЯТУЮ ПАСХУ
и во всю светлую седмицу.

Наченшу иерею: Благословен Бог наш: глаголем трижды: Христос воскресе из мертвых: весь тропарь.

Таже глаголем трижды: Воскресение христово видевше, поклонимся святому Господу Иисусу, единому безгрешному. Кресту Твоему покланяемся, Христе, и святое воскресение Твое поем и славим: Ты бо еси Бог наш, разве Тебе иного не знаем, имя Твое именуем. Приидите, вси вернии, поклонимся святому христову воскресению: се бо прииде крестом радость всему миру. Всегда благословяще Господа, поем воскресение его: распятие бо претерпев, смертию смерть разруши.

Таже ипакои единожды: Предварившыя утро яже о Марии, и обретшыя камень отвален от гроба, слашыху от ангела: во свете присносущнем сущаго, с мертвыми что ищете яко человека; видите гробныя пелены, тецыте и миру проповедите, яко воста Господь умертвивый смерть: яко есть Сын Бога, спасающаго род человеческий.

Таже кондак единожды: Аще и во гроб снизшел еси, безсмертне, но адову разрушил еси силу, и воскресл еси яко победитель, Христе Боже, женам мироносицам вещавый: радуйтеся, и Твоим апостолом мир даруяй, падшым подаяй воскресение.

Таже и сей тропарь единожды: Во гробе плотски, во аде же с душею яко Бог, в раи же с разбойником, и на престоле был еси, Христе, со Отцем и Духом, вся исполняяй, неописанный.

Слава: Яко живоносец, яко рая краснейший, воистину и чертога всякаго царскаго показася светлейший, Христе, гроб Твой, источник нашего воскресения.

И ныне, богородичен: Вышняго освященное божественное селение, радуйся. Тобою бо дадеся радость, Богородице, зовущым: благословенна ты в женах еси, всенепорочная Владычице.

Таже, Господи, помилуй, 40. Слава, и ныне: Честнейшую херувим: Именем господним благослови, отче. Иерей: Молитвами святых отец наших: Мы же речем: Аминь. И паки глаголем: Христос воскресе из мертвых: трижды. Слава, и ныне: Господи, помилуй, трижды. Благослови.

ВО СВЯТУЮ И ВЕЛИКУЮ НЕДЕЛЮ ПАСХИ ВЕЧЕРА.

Благословен Бог наш всегда, ныне и присно, и во веки веков. И нам отвещающым: Аминь. И той начинает: Христос воскресе из мертвых, смертию смерть поправ, и сущым во гробех живот даровав. Трижды. И мы тойжде отвещаем трижды. И глаголет настоятель преждереченныя стихи: 1-й: Да воскреснет Бог: 2-й: Яко исчезает дым: 3-й: Тако да погибнут грешницы: 4-й: Сей день, егоже сотвори Господь: Мы же на кийждо стих поем: Христос воскресе: по единожды. Слава: Мы же: Христос воскресе: И ныне: Мы же: Христос воскресе: И паки настоятель: Христос воскресе из мертвых, смертию смерть поправ. И мы конец: И сущым во гробех живот даровав. Таже ектениа великая от диакона: Миром Господу помолимся.

Посем, Господи воззвах: и прочее:

Вход со евангелием. Свете тихий:

Таже, прокимен великий, глас 7: Кто Бог велий, яко Бог наш: Ты еси Бог творяй чудеса.
1: Сказал еси в людех силу Твою.
2: И рех: ныне начах, сия измена десницы вышняго.
3: Помянух дела господня, яко помяну от начала чудеса Твоя.
И паки: Кто Бог велий:

По прокимне же возглашает диакон: И о сподобитися нам слышанию святаго евангелиа, Господа Бога молим.

Посем чтет евангелие настоятель во олтари, от Иоанна, зачало 65: Сущу позде в день той: конец: не иму веры.

Посем ектениа: Рцем вси: и Сподоби, Господи, в вечер сей: Таже: Исполним вечернюю молитву:

Таже стихиры Пасхи, глас 5: Пасха священная: с припевы их. Слава, и ныне: Воскресения день: Христос воскресе, трижды, кроме конца стихиры.

Таже диакон: Премудрость. Мы же: Благослови. Настоятель: Сый благословен Христос Бог наш: И мы: Утверди Боже: Таже настоятель, вместо Слава Тебе, Христе Боже: поет: Христос воскресе из мертвых, смертию смерть поправ, И мы: И сущым во гробех живот даровав. И абие глаголет отпуст со крестом:

Таже крест возвышая, глаголет: Христос воскресе, трижды. Мы же отвещаем: Воистину воскресе, трижды. Таже поем конечное: Христос воскресе: трижды, весь тропарь. И по нем пением кончаем: И нам дарова живот вечный, покланяемся его тридневному воскресению. Посем многолетны: и целуем честный крест держимый в руку настоятеля.