ТРОПАРИ И КОНДАКИ,
глаголемии от недели мытаря и фарисеа, и во святую четыредесятницу, до святыя Пасхи.

Неделя о мытари и фарисеи.

Тропарь воскресен гласа.

Кондак, глас 4. Фарисеева убежим высокоглаголания, и мытареве научимся высоте глагол смиренных, в покаянии взывающе: Спасе мира, милостив буди рабом Твоим.

Неделя о блуднем сыне.

Тропарь воскресен гласа.

Кондак, глас 3. Отеческия славы Твоея удалихся безумно, во злых расточив, еже ми предал еси богатство. Темже Ти блуднаго глас приношу: согреших пред Тобою, Отче щедрый: приими мя кающася, и сотвори мя яко единаго от наемных Твоих.

В субботу мясуопустную.

Тропарь, глас 8: Глубиною мудрости человеколюбно вся строяй, и полезное всем подаваяй, едине содетелю, упокой, Господи, душы раб Твоих: на Тя бо упование возложиша, творца и зиждителя и Бога нашего.

Слава, кондак, глас 8: Со святыми упокой, Христе, душы раб Твоих, идеже несть болезнь, ни печаль, ни воздыхание, но жизнь безконечная.

И ныне, богородичен, глас тойже: Тебе и стену и пристанище имамы, и молитвенницу благоприятну к Богу: егоже родила еси, Богородице безневестная, верных спасение.

Неделя мясопустная.

Тропарь воскресен гласа.

Кондак, глас 1: Егда приидеши, Боже, на землю со славою, и трепещут всяческая: река же огненная пред судищем течет, и книги разгибаются, и тайная являются: тогда избави мя от огня неугасимаго, и сподоби мя одесную Тебе стати, судие праведнейший.

В субботу сыропустную,
память совершаем всех в посте просиявших, преподобных и богоносных отец наших наших.

Тропарь, глас 4: Боже отец наших, творяй присно с нами по Твоей кротости, не отстави милости Твоея от нас, но молитвами их в мире управи живот наш.

Кондак, глас 8: Яко благочестия проповедники и нечестия обуздатели, богоносных собор просветил еси, Господи, подсолнечную осиявающыя: тех молитвами, в мире совершеннем Тебе славящыя и величающыя сохрани, воспевати Тебе: аллилуиа.

Неделя сыропустная.

Тропарь гласа.

Кондак, глас 6: Премудрости наставниче, смысла подателю, немудрых наказателю и нищих защитителю, утверди, вразуми сердце мое, Владыко: Ты даждь ми слово, отчее Слово, се бо устнам моим не возбраню, во еже звати Тебе: милостиве, помилуй мя падшаго.

На утрени прокимен гласа.

В ту же неделю вечера, прокимен великий, глас 8, псалом 68:

Не отврати лица Твоего от отрока Твоего, яко скорблю, скоро услыши мя: вонми души моей и избави ю.
1: Спасение Твое, Боже, да приимет мя.
2: Да узрят нищии и возвеселятся.
3: Взыщите Бога, и жива будет душа ваша.
И паки тойже: Не отврати:

В субботу 1-ю постов,
память совершаем бывшаго чудесе коливы о святаго великомученика Феодора Тирона.

Тропарь, глас 2: Велия веры исправления, во источнице пламене, яко на воде упокоения, святый мученик Феодор радовашеся: огнем бо всесожжегся, яко хлеб сладкий Троице принесеся. Того молитвами, Христе Боже, спаси душы нашя.

Кондак, глас 8: Веру христову яко щит внутрь приим в сердце твоем, противныя силы попрал еси, многострадальче, и венцем небесным венчался еси вечно, Феодоре, яко непобедимый.

В неделю 1-ю постов,
сиречь православия, память совершаем святых пророков Моисеа и Аарона и прочих, и святых и честных икон возставление.

Тропарь воскресен гласа.

Слава, тропарь празднику, глас 2: Пречистому образу Твоему покланяемся благий, просяще прощения прегрешений наших, Христе Боже: волею бо благоволил еси плотию взыти на крест, да избавиши, яже создал еси, от работы вражия. Тем благодарственно вопием Ти: радости исполнил еси вся, Спасе наш, пришедый спасти мир.

И ныне, богородичен: Вся паче смысла, вся преславная твоя, Богородице, таинства: чистоте запечатанной, и девству храмину Мати познался еси неложна, Бог рождши истиннаго: того моли спастися душам нашым.

Кондак, глас 8: Неописанное Слово отчее, из тебе, Богородице, описася воплощаемь, и оскверншийся образ в древнее вообразив, божественною добротою смеси: но исповедающе спасение, делом и словом, сие воображаем.

На утрени, прокимен гласа.

В ту же неделю вечера, прокмен великий, глас 8, псалом 60:

Дал еси достояние боящымся Тебе, Господи.
1: От конец земли к Тебе воззвах.
2: Порыюся в крове крил Твоих.
3: Тако воспою имени Твоему во веки.
И Дал еси достояние:

В неделю 2-ю постов.

Тропарь воскресен гласа.

Кондак, глас 4: Ныне время делательное явися, при дверех суд, востанем убо постящеся, принесем слезы умиления милостынями, зовуще: согрешихом паче песка морскаго: но ослаби, содетелю всех, яко да приимем нетленныя венцы.

На утрени прокимен гласа.

В ту же неделю вечера, прокимен великий.

Не отврати:

В неделю 3-ю постов,
празднуем поклонение Креста господня.

Тропарь воскресен гласа.

Слава, тропарь Кресту, глас 1: Спаса, Господи, люди Твоя, и благослови достояние Твое, победы благоверным царем на сопротивныя даруя, и Твое сохраняя крестом Твоим жительство.

И ныне, богородичен.

Кондак Кресту, глас 7: Уже пламенное оружие на хранит врат едемских, на тое бо найде преславное угашение, древо крестное, смерти жало и адова победа прогнася: и предстал еси, Спасе мой, вопия сущым во аде: внидите паки в рай.

На утрени, прокимен гласа.

В ту же неделю вечера, прокимен великий:

Дал еси:

В неделю 4-ю постов,
память совершаем преподобнаго отца нашего Иоанна, списателя Лествицы.

Тропарь и кондак воскресны гласа.

Тропарь преподобному, глас 1: Пустынный житель, и в телеси ангел, и чудотворец показался еси, богоносе отче наш Иоанне: постом, бдением, молитвою небесная дарования приим, исцеляеши недужныя, и душы верою притекающих к тебе. Слава давшему тебе крепость: слава венчавшему тя: слава действующему тобою всем исцеления.

Кондак преподобному, глас 4: На высоте Господь воздержания истинно тя положи, якоже звезду нелестную, световодящую концы, наставниче Иоанне отче наш.

На утрени, прокимен гласа.

В ту же неделю вечера, прокимен великий:

Не отврати:

В четверток 5-я седмицы,
поем последование Великаго Канона.

Кондак, глас 6: Душе моя, душе моя, востани, что спиши; конец приближается, и имаши смутитися: воспряни убо, да пощадит тя Христос Бог, везде сый и вся исполняяй.

В субботу 5-я седмицы,
поем ко пресвятей Богородице неседальное пение.

Тропарь, глас 8: Повеленное тайно прием в разуме, в крове иосифове со тщанием предста безплотный, глаголя неискусобрачней: приклонивый схождением небеса, вмещается неизменно весь в тя: егоже и видя в ложеснах твоих, приемша рабий зрак, ужасаюся звати тебе: радуйся, невесто неневестная.

Кондак, глас 8: Взбранной воеводе победительная, яко избавльшеся от злых, благодарственная восписуем ти раби твои, Богородице: но яко имущая державу непобедимую, от всяких нас бед свободи, да зовем ти: радуйся, невесто неневестная.

В неделю 5-ю постов,
память совершаем преподобныя матери нашея Марии египтяныни.

Тропарь и кондак воскресны гласа, и ипакои.

Тропарь преподобней, глас 8: В тебе, мати, известно спасеся еже по образу: приимши бо крест, последовала еси Христу, и дея учила еси, презирати убо плоть, преходит бо: прилежати же о души, вещи безсмертней. Темже и со ангелы срадуется, преподобная Марие, дух твой.

Кондак преподобний, глас 4: Блудами перве преисполнена всяческими, христова невеста днесь покаянием явися, ангельское жительство подражающи, демоны креста оружием погубляет. Сего ради царствия невеста явися Мариа преславная.

На утрени, прокимен гласа.

В ту же неделю вечера, прокимен великий:

Дал еси:

В субботу 6-ю,
святаго и праведнаго Лазаря.

Тропарь, глас 1: Общее воскресение прежде Твоея страсти уверяя, из мертвых воздвигл еси Лазаря, Христе Боже. Темже и мы, яко отроцы, победы знамения носяще, Тебе победителю смерти вопием: осанна в вышних, благословен грядый во имя господне.

Кондак, глас 2: Всех радость, Христос, истина, свет, жизнь и мира воскресение, сущым на земли явися, своею благостию, и бысть образ воскресения, всем подая божественное оставление.

Отпуст:

Воскресый из мертвых, Христос истиннный:

В неделю Ваий.

Тропарь, глас 1: Общее воскресение: Дважды.

И сей тропарь, глас 4: Спогребшеся Тебе крещением, Христе Боже наш, безсмертныя жизни сподобихомся воскресением Твоим, и воспевающе зовем: осанна в вышних, благословен грядый во имя господне.

По 3-й песни ипакои, глас 6: С ветвьми воспевше прежде, с древесы последи яша Христа Бога, неблагодарнии Иудее. Мы же верою непреложною присно почитающе яко благодетеля, выну вопием ему: благословен еси грядый Адама воззвати.

Кондак, глас 6: На престоле на небеси, на жребяти на земле носимый, Христе Боже, ангелов хваление, и детей воспевание приял еси, зовущих Ти: благословен еси грядый Адама воззвати.

На утрени прокимен, глас 4, псалом 8:

Из уст младенец и ссущих * совершил еси хвалу.
Стих: Господь, Господь наш, яко чудно имя Твое по всей земли.

Отпуст:

Иже на жеребяти осли сести изволивый, нашего ради спасения, Христос истинный:

В ту же неделю вечера, и до святаго и великаго четвертка:

Грядый Господь на волную страсть, нашего ради спасения, Христос истинный:

Во святый и великий понедельник.

На утрени, во Аллилуиа, тропарь, глас 8: Се жених грядет в полунощи, и блажен раб, егоже обрящет бдяща, недостоин же паки, егоже обрящет унывающа: блюди убо, душе моя, не сном отяготися, да не смерти предана будеши, и царствия вне затворишися: но воспряни зовущи: свят, свят, свят еси, Боже, Богородицею помилуй нас.

Кондак, глас 8: Иаков рыдаше иосифова лишения, и доблий седяше на колеснице, яко царь почитаемь: египтяныни бо тогда сластем не поработав, воспрославляшеся от ведущаго человеческая серцда, и посылающаго венец нетленный.

Светилен: Чертог Твой вижду, Спасе мой, украшенный, и одежды не имам да вниду вень: просвети одеяние души моея, светодавче, и спаси мя. Трижды.

Во святый и великий вторник.

Тропарь: Се жених грядет в полунощи:

Кондак, глас 2: Час, душе, конца помысливши, и посечения смоковницы убоявшися, данный тебе талант трудолюбно делай, окаянная, бодрствующи и зовущи: да не пребудем вне чертога христова.

Светилен: Чертог Твой:

Во святую и великую среду.

Тропарь, глас 8: Се жених:

Кондак, глас 4: Паче блудницы, блаже, беззаконновав, слез тучи никакоже Тебе принесох: но молчанием моляся припадаю Ти, любовию облобызая пречистеи Твои нозе, яко да осталение мне яко Владыка подаси долгов, зовущу Ти, Спасе: от скверных дел моих избави мя.

Светилен: Чертог Твой вижду:

Во святый и великий четветок.

На утрени, во Аллилуиа, тропарь, глас 8: Егда славинии ученицы на умовении вечери просвещахуся, тогда Иуда злочестивый сребролюбием недугов омрачашеся, и беззаконным судиям Тебе праведнаго судию предает. Виждь, имений рачителю, сих ради удавление употребивша: бежи несытая души, учителю таковая дерзнувшия: иже о всех благий, Господи, слава Тебе. Трижды.

Кондак, глас 2: Хлеб прием в руце предатель, сокровенно тыя простирает, и приемлет цену создавшаго своима рукама человека, и не исправлен пребысть Иуда, раб и льстец.

Светилен: Чертог Твой:

В конец утрени, отпуст: Грядый на вольную страсть:

В конец вечерни, и литургии, отпуст: Иже за превосходящую благость путь добрейший смирения показавый, внегда умыти ноги учеников, даже до креста и погребения снизшедый нам, Христос истинный:

Во святый и великий пяток.

Тропарь: Егда славнии ученицы: Трижды.

Кондак, глас 8: Нас ради распятаго, приидите вси воспоим: того бо виде Мариа на древе, и глаголаше: аще и распятие терпиши, Ты бо еси сын и Бог мой.

Ексапостиларий: Разбойника благоразумнаго во едином часе раеви сподобил еси, Господи, и мене древом крестным просвети, и спаси мя. Трижды.

Тропарь во отпуст, глас 4: Искупил ны еси от клятвы законныя честною Твоею кровию, на кресте пригвоздився, и копием прободся, безсмертие источил еси человеком, Спасе наш, слава Тебе.

Отпуст: Иже оплевания, и биения, и заушения, и крест, и смерть претерпевый за спасение мира, Христос истинный:

Слава, тропарь перваго часа, глас 1: Распеншуся Тебе, Христе, погибе мучительство, попрана бысть сила вражия: ниже бо ангел, ниже человек, но сам, Господи, спасал еси нас, слава Тебе.

И ныне, богородичен: Что тя наречем, о благодатная; небо, яко возсияла еси солнце правды: рай, яко прозябла еси цвет нетления: деву, яко пребыла еси нетленна: чистую матерь, яко имела еси на святых твоих объятиях сына, всех Бога: того моли спастися душам нашым.

Кондак, глас 8: Нас ради распятаго:

Слава, тропарь третияго часа, глас 6: Господи, осудиша Тя Иудее на смерть, жизнь всех: иже чермное море жезлом прошедшии, на кресте Тя пригвоздиша: и иже от камене мед ссавши, желчь Тебе принесоша, но волею претерпел еси, да нас свободиши от работы вражия, Христе Боже, слава Тебе.

И ныне, богородичен: Богородице, ты еси лоза истинная, возрастившая нам плод живота, тебе молимся, молися, Владычице, со святыми апостолы, помиловати душы нашя.

Кондак, глас 8: Нас ради:

Слава, тропарь шестаго часа, глас 2: Спасение соделал еси посреде земли, Христе Боже, на кресте пречистеи руце Твои прострел еси, собирая вся языки, зовущыя: Господи, слава Тебе.

И ныне, богородичен: Яко не имамы дерзновения за премногия грехи нашя: ты иже от тебе рождшагося моли, Богородице дево: много бо может моление матернее ко благосердию Владыки. Не презри грешных мольбы, всечистая, яко милостив есть и спасти могий, иже и страдати о нас изволивый.

Кондак, глас 8: Нас ради распятаго:

Слава, тропарь девятаго часа, глас 8: Видя разбойник начальника жизни на кресте висяща, глаголаше: аще не бы Бог бол воплощся, иже с нами распныйся, не бы солнце лучы своя потаило, ниже бы земля трепещущи тряслася: но вся терпяй, помяни мя, Господи, во царствии Твоем.

И ныне, богородичен: Иже нас ради рождейся от девы, и распятие претерпев, благий, испровергий смертию смерть, и воскресение явлей яко Бог, не презри, яже создал еси рукою Твоею: яви человеколюбие Твое, милостиве, приими рождшую тя Богородицу молящуюся за ны, и спаси, Спасе наш, люди отчаянныя.

Кондак, глас 8: Нас ради распятаго, приидите, вси воспоим: того бо виде Мариа на древе, и глаголаше: аще и распятие терпиши, Ты еси сын и Бог мой.

Отпуст часов: Иже нас ради человеков, и нашего ради спасения страшныя страсти, и животворящий крест, и вольное погребение плотию прияти изволивый, Христос истинный:

В святую и великую субботу.

Тропарь, глас 2: Благообразный Иосиф, с древа снем пречистое тело Твое, плащаницею чистою обвив, и вонями во гробе нове покрыв положи.

Слава: Егда снизшел еси к смерти, животе безсмертный, тогда ад умертвил еси блистанием божества: егда же и умершыя от преисподних воскресил еси, вся силы небесныя взываху: жизнодавче Христе Боже наш, слава Тебе.

И ныне: Мироносицам женам, при гробе представ ангел вопияше: мира мертвым суть прилична, Христос же истления явися чуждь.

Кондак, глас 6: Бездну заключивый мертв зрится, и смирною и плащаницею обвився, во гробе полагается яко смертный безсмертный, жены же приидоша помазати его миром плачущыя горько и вопиющыя: сия суббота есть преблагословенная, в нейже Христос уснув, воскреснет тридневен.

Отпуст по обычаю.

 

 

Службы времени Великого Поста

(Тропари и кондаки, глаголемии от недели мытаря и фарисеа, и во святую четыредесятницу, до святыя Пасхи.) Для католиков славяно-византийского обряда. По книге "Иерейский молитвослов" (Рим, 1950).