По Благословен Бог наш: глаголем:

Благослови, душе моя, Господа: Господи Боже мой, возвеличился еси зело, во исповедание и в велелепоту облекся еси. Одеяйся светом яко ризою, простираяй небо яко кожу: Покрываяй водами превыспренняя своя, полагаяй облаки на восхождение свое, ходяй на крилу ветреню: Творяй ангелы своя духи, и слуги своя пламень огненный: Основаяй землю на тверди ея: не прелонится в век века. Бездна яко риза одеяние ея: на горах станут воды, От запрещения твоего побегнут, от гласа грома твоего убоятся. Восходят горы: и низходят поля в место, еже основал еси им. Предел положил еси, егоже не прейдут, ниже обратятся покрыти землю. Посылаяй источники в дебрех: посреде гор пройдут воды. Напаяют вся звери сельныя, ждут онагри в жажду свою. На тых птицы небесныя привитиют, ри спелы камения дадят глас. Напаяяй горы от превыспренних своих, от плода дел твоих насытится земля. Прозябаяй траву скотом, и злак на службу человеком, извести хлеб от земли: И вино веселит сердце человека, умастити лице елеем, и хлеб сердце человека укрепит. Насытятся древа польская, кедри ливанстии, ихже еси насадил. Тамо птицы возгнездятся, еродиево жилище предводительствует ими. Горы высокия еленем, камень прибежище заяцем. Сотворил есть луну во времена, солнце позна запад свой. Положил еси тьму, и бысть нощь, в нейже пройдут вси зверие дубравнии: Скимни рыкающии восхитити, и взыскати от Бога пищу себе. Возсия солнце, и собрашася, и в ложах своих лягут. Изыдет человек на дело свое, и на делание свое до вечера. Яко возвеличишася дела твоя, Господи, вся премудростию сотворил еси: исполнися земля твари твоея. Сие море великое и пространное: тамо гади, ихже несть числа, животная малая с великими. Тамо корабли преплавают, змий сей, егоже создал еси ругатися ему. Вся к тебе чают, дати пищу им во благо время. Давшу тебе им, соберут: отверзшу тебе руку, всяческая исполнятся благости: Отвращшу же тебе лице, возмятутся: отъимеши дух их, и исчезнут, и в персть свою возвратятся. Послеши духа твоего, и созиждутся, и обновиши лице земли. Буди слава господня во веки: возвеселится Господь о делех своих. Призираяй на землю, и творяй ю трястися: прикасаяйся горам, и дымятся. Воспою Господеви о животе моем, пою Богу моему, дондеже есмь. Да усладится ему беседа моя, аз же возвеселюся о Господе. Да исчезнут грешницы от земли, и беззаконницы, якоже не быти им. Благослови, душе моя, Господа.
Солнце позна запад свой, положил еси тьму, и бысть нощь.
Яко возвеличишася дела твоя, Господи, вся премудростию сотворил еси.

Аллилуиа, аллилуиа, аллилуиа, слава Тебе Боже. Трижды.

Господи, да не яростию Твоею обличиши нас, ниже гневом Твоим накажеши нас, но сотвори с нами по милости Твоей, врачу и исцелителю душ наших. Настави нас ко пристанищу хотения Твоего: просвети очи сердец наших в познание Твоея истины: и даруй нам прочее настоящаго дне мирное и безгрешное, и все время живота нашего, молитвами святыя Богородицы, и всех святых.
Яко Твоя держава, и Твое есть царство, и сила, и слава, Отца, и сына, и святаго Духа, ныне и присно, и во веки веков, аминь.

Господи Боже наш, помяни нас грешных и непотребных раб Твоих, внегда призывати нам святое покланяемое имя Твое, и не посрами нас от чаяния милости Твоея; на даруй нам, Господи, вся яже ко спасению прошения, и сподоби нас любити, и боятися Тебе от всего сердца нашего, и творити во всех волю Твою.
Яко благ и человеколюбец Бог еси, и Тебе славу возсылаем, Отцу, и Сыну, и святому Духу, ныне и присно, и во веки веков, аминь.

Боже великий и дивный, неисповедимою благостию и богатым промыслом управляяй всяческая, и мирская нам благая даровавый: и споручивый нам обещанное царство, дарованными нам благими: сотворивый ны дне прешедшую часть от всякаго уклонитися зла: даруй нам и прочее непорочно совершити пред святою славою Твоею, пети Тя единаго благаго и человеколюбиваго Бога нашего.
Яко Ты еси Бог наш, и Тебе славу возсылаем, Отцу, и Сыну, и святому Духу, ныне и присно, и во веки веков, аминь.

Боже великий и вышний, един имеяй безсмертие, во свете живый неприступнем, всю тварь премудростию создавый, разделивый между светом и между тмою, и солнце положивый во область дне, луну же и звезды во область нощи: сподобивый нас грешных и в настоящий час предварити лице Твое исповеданием, и вечернее Тебе славословие принести: сам, человеколюбче, исправи молитву нашу яко кадило пред Тобою, и приими ю в воню благоухания: подаждь же нам настоящий вечер, и приходящую нощь мирну: облецы ны во оружие света: избави ны от страха ночнаго, и всякия вещи во тме преходящия: и даждь сон, егоже во упокоение немощи нашей даровал еси, всякаго мечтания диаволя отчужденный. Ей, Владыко благих подателю, да и на ложах наших умиляющеся, поминаем в нощи имя Твое, и поучением Твоих заповедей просвещаеми, в радости душевней востанем ко славословию Твоея благости: моления и молитвы Твоему благоутробию приносяще, о своих согрешениих, и всех людей Твоих, яже, молитвами святыя Богородицы, милостию посети.
Яко благ и человеколюбец Бог еси, и Тебе славу возсылаем, Отцу, и Сыну, и святому Духу, ныне и присно, и во веки веков, аминь.

Исполншуся же предначинательному псалму, глаголет диакон, или иерей, ектению сию: Миром Господу помолимся.
На едином коемждо прошению лик поет: Господи, помилуй.
О свышнем мире, и спасении душ наших, Господу помолимся.
О мире всего мира, благостоянии святых божиих церквей, и соединении всех, Господу помолимся.
О святем храме сем, и с верою, благоговением, и страхом божиим входящих в онь, Господу помолимся.
О господине нашем святейшем вселенстем Архиерее имя рек Папе Римстем, и о господине нашем Митрополите (или Архиепископе, или Епископе) нашем имя рек, егоже есть область, честнем пресвитерстве, во Христе диаконстве, о всем причте и людех, Господу помолимся.
О богохранимом государе нашем Императоре (или Короле,) имя рек, (или О предержащих властех наших) и о всем воинстве, Господу помолимся.
О граде сем (или О веси сей, или О святей обители сей), всяком граде, стране, и верою живущих в них, Господу помолимся.
О благорастворении воздухов, о изъобилии плодов земных, и временех мирных, Господу помолимся.
О плавающих, путешествующих, недугующих, страждущих, плененных, и спасении их, Господу помолимся.
О избавитися нам от всякия скорби, гнева и нужды, Господу помолимся.
Заступи, спаси, помилуй, и сохрани нас, Боже, Твоею благодатию.
Пресвятую, пречистую, преблагословенную, славную Владычицу нашу Богородицу и приснодеву Марию, со всеми святыми помянувше, сами себе и друг друга, и весь живот наш Христу Богу предадим.
Лик: Тебе, Господи.

Возглашение: Яко подобает Тебе всякая слава, честь и поклонение, Отцу и Сыну, и святому Духу, ныне и присно, и во веков.
Лик: Аминь.

Паки и паки миром Господу помолимся.
Лик: Господи, помилуй.
Заступи, спаси, помилуй, и сохрани нас, Боже, Твоею благодатию.
Лик: Господи, помилуй.
Пресвятую, пречистую, преблагословенную, славную Владычицу нашу Богородицу, и приснодеву Марию, со всеми святыми помянувше, сами себе и друг друга, и весь живот наш Христу Богу предадим.
Лик: Тебе, Господи.

Возглашает иерей: Яко Твоя держава, и Твое есть царство, и сила и слава, Отца, и Сына, и святаго Духа, ныне и присно, и во веки веков.
Лик: Аминь.

В неделю, и аще положено по уставу, поем: Блажен муж:

Блажен муж, иже не иде на совет нечестивых, и на пути грешных не ста, и на седалищи губителей не седе: Но в законе господни воля его, и в законе его поучится день и нощь. И будет яко древо насажденное при исходищих вод, еже плод свой даст во время свое, и лист его не отпадет, и вся, елика аще творит, успеет. Не тако нечестивии, не тако: но яко прах, егоже возметает ветр от лица земли. Сего ради не воскреснут нечестивии на суд, ниже грешницы в совет праведных. Яко весть Господь путь праведных, и путь нечестивых погибнет.

Аллилуиа, аллилуиа, аллилуиа, слава Тебе Боже. Трижды.

По первом же антифоне ектениа малая и возглас: Яко Твоя держава, и Твое есть царство, и сила, и слава, Отца, и Сына, и святаго Духа, ныне и присно, и во веки веков.
Лик: Аминь.

Глаголы моя внуши, Господи, разумей звание мое. Вонми гласу моления моего, царю мой и Боже мой, яко к тебе помолюся, Господи. Заутра услыши глас мой: заутра предстану ти, и узриши мя. Яко Бог не хотяй беззакония, ты еси: не приселится к тебе лукавнуяй. Ниже пребудут беззаконницы пред очима твоима: возненавидел еси вся делающыя беззаконие. Погубиши вся глаголющыя лжу: мужа кровей и льстива гнушается Господь. Аз же множеством милости твоея, вниду в дом твой, поклонюся ко храму святому твоему, в страсе твоем. Господи, настави мя правдою твоею, враг моих ради исправи пред тобою путь мой. Яко несть во устех их истины, сердце их суетно, гроб отверст гортань их, языки своими льщаху. Суди им, Боже, да отпадут от мыслей своих, по множеству нечестия их изрини я, яко преогорчиша тя, Господи. И да возвеселятся вси уповающии на тя, во век возрадуются: и вселишися в них, и похвалятся о тебе любящии имя твое. Яко ты благословиши праведника, Господи, яко оружием благоволения венчал еси нас.

Аллилуиа, аллилуиа, аллилуиа, слава Тебе Боже. Трижды.

По втором антифоне и ектении возглас: Яко благ и человеколюбец Бог еси, и Тебе славу возсылаем, Отцу, и Сыну, и святому Духу, ныне и присно, и во веки веков.
Лик: Аминь.

Господи Боже мой, на тя уповах, спаси мя от всех гонящих мя, и избави мя. Да не когда похитих яко лев душу мою, не сущу избавляющу, ниже спасающу. Господи Боже мой, аще сотворих сие, аще есть неправда в руку моею: Аще воздах воздающым ми зла, да отпаду убо от враг моих тощь. Да поженет убо враг душу мою, и да постигнет, и поперет в землю живот мой, и славу мою в персть вселит. Воскресни, Господи, гневом твоим, вознесися в концах враг твоих, и востани, Господи Боже мой, повелением, имже заповедал еси. И сонм людей обыдет тя: и о том на высоту обратися. Господь судит людем: суди ми, Господи, по правде моей, и по незлобе моей на мя. Да скончается злоба грешных, и исправиши праведнаго, испытаяй сердца и утробы, Боже, праведно. Помощь моя от Бога, спасающаго правыя сердцем. Бог судитель праведен, и крепок, и долготерпелив, и не гнев наводяй на всяк день. Аще не обратитеся, оружие свое очистит, лук свой напряже, и уготова и: И в нем уготова сосуды смертныя, стрелы своя сгараемым содела. Се боле неправдою, зачат болезнь, и роди беззаконие: Ров изры, и ископа и, и падет в яму, юже содела. Обратится болезнь его на главу его, и на верх его неправда его снидет. Исповемся Господеви по правде его, и пою имени Господа вышняго.

По третием антифоне и ектении возглас: Яко Ты еси Бог наш, и Тебе славу возсылаем, Отцу, и Сыну, и святому Духу, ныне и присно, и во веки веков.
Лик: Аминь.

По кафисме диакон глаголет ектению малую: Паки и паки: и иерей возглас: Яко Твоя держава, и Твое есть царство, и сила, и слава, Отца, и Сына, и святаго Духа, ныне и присно, и во веки веков.
Лик: Аминь.

Таже, Господи, воззвах: в случившийся глас.

Господи, воззвах к тебе, услыши мя.
Припев: Услыши мя, Господи.
Господи, воззвах к тебе, услыши мя: вонми гласу моления моего, внегла воззвати ми к тебе.
Услыши мя, Господи.

Вторый лик: Да исправится молитва моя, яко кадило пред тобою: воздеяние руку моею, жертва вечерняя.
Услыши мя, Господи.

И по чину стихи: Положи Господи, хранение устом моим, и дверь ограждения о устнах моих.
Не уклони средце мое в словеса лукавствия, непщевати вины о гресех.
С человеки делающими беззаконие, и не сочтуся со избранными их.
Накажет мя праведник милостию, и обличит мя: елей же грешнаго да не намастит главы моея.
Яко еще и молитва моя во благоволениих их, пожертвы быша при камени судии их.
Услышатся глаголи мои, яко возмогоша: яко толща земли проседеся на земли, расточишася кости их при аде.
Яко к тебе, Господи, Господи, очи мои, на тя уповах, не отъими душу мою.
Сохрани мя от сети, юже составиша ми, и от соблазн делающих беззаконие.
Падут во мрежу свою грешницы, един есмь аз, дондеже прейду.

Стихи к стихирам на Господи, воззвах.

На 10: Изведи из темницы душу мою: исповедатися имени твоему.
Мене ждут праведницы, дондеже воздаси мне.

На 8: Из глубины воззвах к тебе, Господи, Господи, услыши глас мой.
Да будут уши твои внемлюще гласу моления моего.
На 6: Аще беззакония назриши, Господи, Господи, кто постоит; яко у тебе очищение есть.
Имене ради твоего потерпех тя, Господи, потерпе душа моя в слово твое, упова душа моя на Господа.
На 4: От стражи утренния до нощи, от стражи утренния, да уповает Исраиль на Господа.
Яко у Господа милость, и многое у него избавление, и той избавит Исраиля от всех беззаконий его.

Аще есть вход, скончавшуся пению, диакон глаголет к иерею тайно: Господу помолимся,

Иерей же глаголет тайно молитву входа: Вечер, и заутра, и полудне, хвалим, благословим, благодарим и молимся Тебе, Владыко всех: исправи молитву нашу, яко кадило пред Тобою, и не уклони сердец наших в словеса, или в помышления лукавствия: но избави нас от всех ловящих душы нашя, яко к Тебе, Господи, Господи, очи наши, и на Тя уповахом, да не посрамиши нас, Боже наш.
Яко подобает Тебе всякая слава, честь и поклонение, Отцу, и Сыну, и святому Духу, ныне и присно, и во веки веков, аминь.

Посем диакон глаголет к иерею: Благослови, владыко, святый вход.

Иерей: Благословен вход святх Твоих, всегда, ныне и присно, и во веки веков.
Диакон: Аминь.

И абие диакон или иерей: Премудрость, прости.

Лик же: Свете тихий святыя славы безсмертнаго, Отца небеснаго, святаго, блаженнаго, Иисусе Христе: пришедше на запад солнца, видевше свет вечерний, поем Отца, и Сына, и святаго Духа, Бога. Достоин еси во вся времена пет быти гласы преподобными, Сыне божий, живот даяй: темже мир Тя славит.

Таже диакон: Вонмем.

Иерей: Мир всем.
Лик: И духови твоему.
Паки диакон: Премудрость, вонмем.

Аще есть Бог Господь: поются прокимны сия:

В субботу вечера, глас 6, псалом 92: Господь воцарися, * в лепоту облечеся.
Стих: Облечеся Господь в силу и препоясася.
Стих: Ибо утверди вселенную, яже не подвижится.
Стих: Дому Твоему подобает святыня, Господи, в долготу дний.

В неделю вечера, глас 8, псалом 133: Се ныне благословите Господа, * вси раби господни.
Стих: Стоящии в храме господни, во дворех дому Бога нашего.

В понедельник вечера, глас 4, псалом 4: Господь услышит мя, * внегда воззвати ми к нему.
Стих: Внегда прихвати ми, услыша мя Бог правды моея.

В вторник вечера, глас 1, псалом 22: Милость Твоя, Господи, поженет мя * вся дни живота моего.
Стих: Господь пасет мя, и ничтоже мя лишит, на месте злачне, тамо всели мя.

В среду вечера, глас 5, псалом 53: Боже, в имя Твое спаси мя * и в силе Твоей суди ми.
Стих: Боже, услыши молитву мою, внуши глаголы уст моих.

В четверток вечера, глас 6, псалом 120: Помощь моя от Господа, * сотворшаго небо и землю.
Стих: Возведох очи мои в горы, отнюдуже приидет помощь моя.

В пяток вечера, глас 7, псалом 58: Боже, заступник мой еси Ты * и милость Твоя предварит мя.
Стих: Изми мя от враг моих, Боже, и от востающих на мя избави мя.

Подобает ведати аще пост, и есть Аллилуиа, вместо прокименов, поем сия:

В понедельник вечера, Аллилуиа, трижды, во глас 6:
Стих: Господи, да не яростию Твоею обличиши мене, ниже гневом Твоим накажеши мене. Аллилуиа.
Стих: И во веки веков.
Мы же высочайшим гласом поем: Аллилуиа.

Во вторник и в четверток вечера: Аллилуиа.
Стих: Возносите Господа Бога нашего, и покланяйтеся подножию ногу его, яко свято есть. Аллилуиа.
Стих: И во веки веков. Аллилуиа.

В среду вечера: Аллилуиа.
Стих: Во всю землю изыде вещание их, и в концы вселенныя глаголы их. Аллилуиа.
Стих: И во веки веков. Аллилуиа.

В неделю же и в пяток вечера, никогдаже поется Аллилуиа.

По прокимене, аще положено уставом, чтец читает паремии. Прежде коегождо чтения диакон возглашает: Премудрость, по изречении же чтеца, откуду суть (сиесть: Бытия, или Притчей, или Соборнаго послания и прочих), глаголет: Вонмем.

На вечерни повседневной ектениа: Рцем вси: не глаголется, но по прокимене абие: Сподоби, Господи:

Рцем вси от всея души, и от всего помышления нашего рцем.
Лик: Господи, помилуй.
Господи вседержителю, Боже отец наших, молимтися, услыши и помилуй.
Лик: Господи, помилуй.
Помилуй нас, Боже, по велицей милости Твоей, молимтися, услыши и помилуй.

На едином коемждо прошении лик поет: Господи, помилуй, трижды.
Еще молимся о господине нашем святейшем вселенстем Архиерее имя рек Папе Римстем, и о господине нашем Митрополите (или Архиепископе, или Епископе нашем) имя рек, и всей во Христе братии нашей.
Еще молимся о богохранимом государе нашем Императоре или Короле, егоже есть государство, имя рек, о здравии и спасении его (или о предержащих властех наших), и о всем воинстве.
Еще молимся о блаженных и приснопамятных создателех святаго храма сего (аще во обители: святыя обители сея), и о всех преждепочивших отцех и братиях, зде лежащих и повсюду, православных.
Еще молимся о милости, жизни, мире, здравии, спасении, посещении, прощении и оставлении грехов рабов божиих братии святаго храма сего (аще во обители: святыя обители сея).
Еще молимся о плодоносящих и добродеющих во святем и всечестнем храме сем, труждающихся, поющих и предстоящих людех, ожидающих от Тебе великия и богатыя милости.

Возглашает иерей: Яко милостив и человеколюбец Бог еси, и Тебе славу возсылаем, Отцу, и Сыну, и святому Духу, ныне и присно, и во веки веков.
Лик: Аминь.

Сподоби, Господи, в вечер сей без греха сохранитися нам. Благословен еси, Господи Боже отец наших, и хвально и прославлено имя Твое во веки, аминь.
Буди, Господи, милость Твоя на нас, якоже уповахом на Тя. Благословен еси, Господи, научи мя оправданием Твоим. Благословен еси, Владыко, вразуми мя оправданием Твоим. Благословен еси, святый, просвети мя оправдании Твоими.
Господи, милость Твоя во век, дел руку Твоею не презри. Тебе подобает хвала, Тебе подобает пение, Тебе слава подобает, Отцу, и сыну, и святому Духу, ныне и присно, и во веки веков, аминь.

Диакон: Исполним вечернюю молитву нашу Господеви.
Лик: Господи помилуй.
Заступи, спаси, помилуй и сохрани нас, Боже, Твоею благодатию.
Лик: Господи, помилуй.
Вечера всего совершенна, свята, мирна и безгрешна, у Господа просим.
На едином коемждо прошении лик поет: Подай, Господи.
Ангела мирна, верна наставника, хранителя душ и телес наших, у Господа просим.
Прощения и оставления грехов, и прегрешений наших, у Господа просим.
Добрых и полезных душам нашым, и мира мирови, у Господа просим.
Прочее время живота нашего в мире и покаянии скончати, у Господа просим.
Христианския кончины живота нашего, безболезнены, непостыдны, мирны, и добраго ответа на страшнем судищи христове, просим.
Пресвятую, пречистую, преблагословенную, славную Владычицу нашу Богородицу и приснодеву Марию, со всеми святыми помянувше, сами себе и друг друга, и весь живот наш Христу Богу предадим.
Лик: Тебе, Господи.

Иерей возглашает: Яко благ и человеколюбец Бог еси, и Тебе славу возсылаем, Отцу, и Сыну, и святому Духу, ныне и присно, и во веки веков.
Лик: Аминь.

Иерей: Мир всем.
Лик: И духови твоему.
Диакон: Главы нашя Господеви приконим.
Лик: Тебе, Господи.

Таже иерей возглашает: Буди держава царствия Твоего благословена и препрославлена, Отца, и Сына, и святаго Духа, ныне и присно, во веки веков.
Лик: Аминь.

Стих 1: К Тебе возведох очи мои, живущему на небеси. Се, яко очи раб в руку господий своих, яко очи рабыни в руку госпожи своея: тако очи наши ко Господу Богу нашему, дондеже ущедрит ны.
Стих 2: Помилуй нас, Господи, помилуй нас, яко по многу исполнихомся уничижения: наипаче наполнися душа наша поношения гобзующих, и уничижения гордых.

Трисвятое, и по Отче наш: иерей возглашает: Яко Твое есть царство:

Лик, или чтец, тропари. На вечерни повседневной, диакон ектению: Помилуй нас, Боже:

По сем: Премудрость.

Лик: Благослови.
Иерей: Сый благословен Христос Бог наш, всегда, ныне и присно, и во веки веков.
Лик: Аминь. Утверди, Боже, святую православную веру, православных христиан, во век века.

Иерей: Пресвятая Богородице, спаси нас.
Лик: Честнейшую херувим и славнейшую без сравнения серафим, без истления Бога Слова рождшую, сущую Богородицу тя величаем.
Иерей: Слава Тебе, Христе Боже, упование наше, слава Тебе.
Лик: Слава, и ныне: Господи, помилуй, трижды. Благослови.

Аще же есть четыредесятница, или ин пост, и Аллилуиа пето, по Ныне отпущаеши: глаголи тропари сия, во глас 4:

Богородице дево, радуйся, благодатная Марие, Господь с тобою: благословенна ты в женах, и благословен плод чрева твоего, яко спаса родила еси душ наших. Поклон един.

Слава: Крестителю христов, всех нас помяни, да избавимся от беззаконий наших: тебе бо дадеся благодать молитися за ны. Поклон един.

И ныне: Молите за ны, святии апостоли, святии вси, да избавимся от бед и скорбей: вас бо теплыя предстатели ко Спасу стяжахом. Поклон един.

Под твое благоутробие прибегаем, Богородице, моления нашя не презри во обстоянии, но от бед избави ны, едина чистая, едина благословенная. Без поклона.

Господи, помилуй, 40.

Иерей: Сый благословен, Христос Бог наш, всегда, ныне и присно, и во веки веков.

И мы глаголем: Аминь. Небесный царю, богохранимаго Императора (или Короля) нашего, имя рек, (или предержащия власти нашя) укрепи, веру утверди, языки укроти, мир умири, град сей (или святую обитель сию), добре сохрани, прежде отшедшыя отцы и братию нашу в селениих праведных учини, и нас в покаянии и исповедании приими, яко благий и человеколюбец.

Господи и Владыко живота моего, дух праздности, уныния, любоначалия и празднословия не даждь ми. Поклон.
Дух же целомудрия, смиреномудрия, терпения и любве, даруй ми рабу Твоему. Поклон.
Ей, Господи царю, даруй ми зрети моя прегрешения, и не осуждати брата моего, яко благословен еси во веки веков, аминь. Поклон.

Таже малых 12 поклонов, глаголюще на кийждо поклон: Боже, очисти мя грешнаго.

И паки, скончав поклоны, глаголем молитву всю вышеписанную: Господи и Владыко живота моего: до конца: во веки веков, аминь. И поклон един великий.

Таже Трисвятое. И поклоны три. И по Отче наш: Господи, помилуй, 12. Таже молитву:

Посем: Буди имя господне благословенно от ныне и до века. Трижды.

Таже, псалом 33: Благословлю Господа на всякое время: и псалом 144: Вознесу Тя, Боже мой, царю мой: И посем, Достойно есть: Слава, и ныне: Господи, помилуй, трижды. Благослови.

Аще же есть ин пост, и пето Аллилуиа, по поклонех и Трисвятом, и по возгласе: Яко Твое есть царство: Господи, помилуй, 12. Слава, и ныне: И паки Господи, помилуй, трижды. Благослови. И отпуст.

Аще есть литиа, по возгласе Буди держава: исходим в притвор, поюще стихиру храма или праздника.

Спаси, Боже, люди Твоя, и благослови достояние Твое: посети мир Твой милостию и щедротами возвыси рог христиан православных, и низпосли на ны милости Твоя богатыя: молитвами всепречистыя Владычицы нашея Богородицы и приснодевы Марии: силою честнаго и животворящаго Креста: предстательствы честных небесных сил безплотных: честнаго, славнаго пророка, предтечи и крестителя Иоанна: святых славных и всехвальных апостол (или святаго апостола и евангелиста имя рек, и прочиих святых славных и всехвальных апостол:) иже во святых отец наших, и вселенских великих учителей и святителей, Василия Великаго, Григория Богослова и Иоанна Златоустаго: иже во святых отца нашего Николаа архиепископа, мирликийскаго чудотворца: святых равноапостольных Мефодиа и Кирилла учителей словенских, святаго благовернаго и равноапостольнаго великаго князя Владимира, святых сланых и добропобедных мучеников: святыя великомученицы Варвары: преподобных и богоносных отец наших Антониа и Феодосиа печерских, и святаго, имя рек, егоже есть храм, и егоже есть день, святых и праведных богоотец Иоакима и Анны, и всех святых: молим Тя, многомилостиве Господи, услыши нас грешных молящихся Тебе, и помилуй нас.

Лик: Господи, помилуй, 40.

Еще молимся о господине нашем святейшем вселенстем Архиерее имя рек Папе Римстем, и о господине нашем Митрополите (или Архиепископе или Епископе нашем) имя рек: [и о Архимандрите или Игумене нашем имя рек]: и о всем во Христе братстве нашем, и о всякой души христианстей, скорбящей же и озлобленней, милости божия и помощи требующей: о покровении града сего и живущих в нем (или веси сея и живущих в ней): о мире и состоянии всего мира: о благостоянии святых божиих церквей: о спасении и помощи со тщанием и страхом божиим труждающихся, и служащих отец и братий наших: о оставльшихся и во отшествии сущих: о исцелении в немощех лежащих: о успении, ослабе, блаженней памяти и оставлении грехов всех прежде отшедших отец и братий наших, зде лежащих и повсюду, православных: о избавлении плененных, и о братиях наших в службах сущих, и о всех служащих и служивших во святем храме сем (аще во обители: во святей обители сей), рцем вси:

Лик: Господи, помилуй, 50.

Еще молимся о государе нашем богохранимом Императоре имя рек, (или Короле имя рек, или о предержащих властех наших), и о всем воинстве, рцем вси:

Лик: Господи, помилуй, 30.

Еще молимся о еже сохранитися граду сему (или веси сей), и святому храму сему (аще во обители: святей обтели сей), и всякому граду и стране, от глада, губительства, труса, потопа, огня, меча, нашествия иноплеменников и междоусобныя брани: о еже милостиву и благоветливу быти благому и человеколюбивому Богу нашему, отвратити всякий гнев на ны движимый, и избавити ны от належащаго и праведнаго своего прещения, и помиловати ны.

Лик: Господи, помилуй, трижды.

Лик: Господи, помилуй, трижды.

Иерей возглашает: Услыши ны, Боже, спасителю наш, упование всех концев земли, и сущих в мори далече: и милостив, милостив буди, Владыко, о гресех наших, и помилуй ны. Милостив бо и человеколюбец Бог еси, и Тебе славу возсылаем, Отцу, и Сыну, и святому Духу, ныне и присно, и во веки веков.
Лик: Аминь.

Таже иерей: Мир всем.
Лик: И духови твоему.
Диакон: Главы нашя Господеви приклоним.
Лик: Тебе, Господи.

И всем приклоншым главы молится иерей велегласно: Владыко многомилостиве, Господи Иисусе Христе Боже наш, молитвами всепречистыя Владычицы нашея Богородицы и приснодевы Марии: силою честнаго и животворящаго Креста: предстательствы честных небесных сил безплотных: честнаго, славнаго пророка, предтечи и крестителя Иоанна: святых славных и всехвальных апостол: (или святаго апостола и евангелиста имя рек, и прочиих святых славных и всехвальных апостол), иже во святых отец наших, и вселенских великих учителей Василия Великаго, Григория Богослова и Иоанна Златоустаго: иже во святых отца нашего Николаа архиепископа, мирликийскаго чудотворца: святых равноапостольных Мефодиа и Кирилла учителей словенских: святаго благовернаго и равноапостольнаго великаго князя Владимира, святых славных и добропобедных мучеников: святыя великомученицы Варвары: преподобных и богоносных отец наших Антониа и Феодосиа печерских, и святаго имя рек: (егоже есть храм и егоже есть день), святых и праведных богоотец Иоакима и Анны, и всех святых: благоприятну сотвори молитву нашу, даруй нам оставление прегрешений наших, покрый нас кровом крилу Твоею, отжени от нас всякаго врага и супостата: умири нашу жизнь, Господи, помилуй нас и мир Твой: и спаси душы нашя, яко благ и человеколюбец.
Лик: Аминь.

По стиховнах же: Ныне отпущаеши раба Твоего, Владыко, по глаголу Твоему, с миром: яко видеста очи мои спасение Твое, еже еси уготовал пред лицем всех людей, свет во откровение языков, и славу людей Твоих Исраиля.

Трисвятое. Пресвятая Троице: По Отче наш: Иерей: Яко Твое есть царство: Лик: Аминь.

Диакон возглашает: Господу помолимся.
Лик: Господи, помилуй.

Иерей чтет велегласно молитву: Господи Иисусе Христе Боже наш, благословивый пять хлебов и пять тысящ насытивый, сам благослови и хлебы сия, пшеницу, вино и елей: и умножи сия во граде сем (или в веси сей, или в святей обители сей) и во всем мире Твоем: и вкушающыя от них верныя освяти. Яко Ты еси благословляяй и освещаяй всяческая, Христе Боже наш, и Тебе славу возсылаем, со безначальным Твоим Отцем и всесвятым и благим и животворящим Твоим Духом, ныне и присно, и во веки веков.
Лик: Аминь. И поет:

Буди имя господне благословенно от ныне и до века. Трижды.

По исполнении же псалма, иерей ко народу глаголет: Благословение господне на вас, Того благодатию и человеколюбием, всегда, ныне и присно, и во веки веков.
Лик: Аминь.

Аще всенощному бдению присовокупляется утреня, по Аминь, чтец: Слава в вышних Богу: трижды, и: Господи, устне мои отверзеши, дважды и таже шестопсалмие.

Таже диакон глаголет: Премудрость.
Лик же: Благослови.
Иерей: Сый благословен Христос Бог наш, всегда, ныне и присно, и во веки веков.
Лик: Аминь. Утверди, Боже, святую православную веру, православных христиан, во век века.

Иерей: Пресвятая Богородице, спаси нас.
Лик: Честнейшую херувим и славнейшую без сравнения серафим, без истления Бога Слова рождшую, сущую Богородицу тя величаем.

Иерей: Слава Тебе, Христе Боже, упование наше, слава Тебе.
Лик: Слава, и ныне: Господи, помилуй, 3. Благослови.