ПОСЛЕДОВАНИЕ ЧАСОВ

ЧАС ПЕРВЫЙ

Приидите, поклонимся цареви нашему Богу.
Приидите, поклонимся и припадем Христу, цареви нашему Богу.
Приидите, поклонимся и припадем самому Христу, цареви и Богу нашему.

Таже псалмы:

Псалом 5

Глаголы моя внуши, Господи, разумей звание мое. Вонми гласу моления моего, царю мой и Боже мой: яко к Тебе помолюся, Господи. Заутра услыши глас мой, заутра предстану ти, и узриши мя: Яко Бог, не хотяй беззакония, ты еси: не приселится к тебе лукавнуяй, ниже пребудут беззаконницы пред очима твоима. Возненавидел еси вся делающыя беззаконие. Погубиши вся глаголющыя лжу: мужа кровей и льстива гнушается Господь. Аз же множеством милости твоея, вниду в дом твой, поклонюся ко храму святому твоему в страсе твоем. Господи, настави мя правдою твоею, враг моих ради исправи пред тобою путь мой. Яко несть во устех их истины, сердце их суетно, гроб отверст гортань их, языки своими льщаху. Суди им, Боже, да отпадут от мыслей своих: по множеству нечестия их изрини я, яко преогорчиша тя, Господи. И да возвеселятся вси уповающии на тя, во век возрадуются, и вселишися в них, и похвалятся о тебе любящии имя твое. Яко ты благословиши праведника, Господи, яко оружием благоволения венчал еси нас.

Псалом 89

Господи, прибежище был еси нам в род и род. Прежде даже горам не быти, и создатися земли и вселенней, и от века до века ты еси. Не отбрати человека во смирение, и рекл еси: обратитеся, сынове человечестии. Яко тысяща лет пред очима твоима, Господи, яко день вчерашний, иже мимоиде, и стража нощная. Уничижения их лета будут: утро яко трава мимоидет, утро процветет и прейдет: на вечер отпадет, ожестеет и изсхнет. Яко исчезохом гневом твоим, и яростию твоею смутихомся. Положил еси беззакония наша пред тобою: век наш в просвещение лица твоего. Яко вси дние наши оскудеша, и гневом твоим исчезохом. Лета наша яко паучина паучахуся: дние лет наших, в нихже седмьдесят лет, аще же в силах, осмьдесят лет, и множае их труд и болезнь: яко прииде кротость на ны, и накажемся. Кто весть державу гнева твоего, и от страха твоего ярость твою исчести; Десницу твою тако скажи ми, и окованныя сердцем в мудрости. Обратися, Господи, доколе; и умолен буди на рабы твоя. Исполнихомся заутра милости твоея, Господи, и возрадовахомся, и возвеселихомся. Во вся дни нашя возвеселихомся, за дни в няже смирил ны еси, лета в няже видехом злая. И призри на рабы твоя, и на дела твоя, и настави сыны их: И буди светлость Господа Бога нашего на нас, и дело рук наших исправи на нас, и дело рук наших исправи.

Псалом 100

Милость и суд воспою тебе, Господи: Пою и разумею в пути непорочне: когда приидеши ко мне; прехождах в незлобии сердца моего, посреди дому моего: Не предлагах пред очима моима вещь законопреступную, творящыя преступление возненавидех. Не прильпе мне сердце строптиво: уклоняющагося от мене лукаваго не познах. Оклеветающаго тай искренняго своего, сего изгонях: гордым оком и несытым сердцем, с сим не ядях. Очи мои на верныя земли, посаждати я со мною: ходяй по пути непорочну, сей ми служаще. Не живяше посреде дому моего творяй гордыню: глаголяй неправедная, не исправляше пред очима моима. Во утрия избивах вся грешныя земли, еже потрубити от града господня вся делающыя беззакония.

Слава, и ныне:

Аллилуа, аллилуиа, аллилуиа, слава Тебе Боже. Трижды. Поклоны 3.
Господи, помилуй,
трижды.

И аще убо Бог Господь поется, глаголем: Слава, тропарь дне, или прздника, или святаго. И ныне, богородичен:

Что тя наречем, о благодатная; небо, яко возсияла еси солнце правды; рай, яко прозябла еси цвет нетления: деву, яко пребыла еси нетленна: чистую матерь, яко имела еси на святых твоих объятиях сына, всех Бога: того моли спастися душам нашым.

Аще же Аллилуиа, глаголем тропарь, во глас 6:

Заутра услыши глас мой, царю и Боже мой.
Стих 1: Глаголы моя внуши, Господи, разумей звание мое.
Стих 2: Яко к Тебе помолюся, Господи.
К сим же стихом припеваем: Заутра услыши глас мой:

Таже, Слава, и ныне, богородичен:
Что тя наречем, о благодатная:
и прочая.

Аще положено уставом, стихословим псалтирь, посем тропарь: Заутра услыши:

Стопы моя направи по словеси Твоему, и да не обладает мною всякое беззаконие. Избави мя от клеветы человеческия, и сохраню заповеди Твоя. В 40-у дважды.

Лице Твое просвети на раба Твоего, и научи мя оправданием Твоим. В 40-у дважды.

Да исполнятся уста моя хваления Твоего, Господи, яко да воспою славу Твою, весь день великолепие Твое. В 40-у единожды.

Трисвятое. Пресвятая Троице: По Отче наш: Иерей: Яко Твое есть царство:

И кондак дне, или праздника, или святаго.

Аще же есть четыредесятница, или кондака несть, в понедельник убо и во вторник и в четверток глаголи настоящий богородичен:

Преславную Божию Матерь, и святых ангел святейшую, немолчно воспоим, сердцем и усты Богородицу сию исповедающе, яко воистину рождшую Бога воплощенна, и молящуюся непрестанно о душах наших.

В среду же и пяток глаголи сие:

Скоро предвари, прежде даже не поработимся врагом хулящым Тя, и претящым нам, Христе Боже наш. Погуби крестом Твоим борющыя нас, да уразумеют, како может православных вера, молитвами Богородицы, едине человеколюбче.

В субботу сей:

Яко начатки естества, насадителю твари, вселенная приносит Ти, Господи, богоносныя мученики: тех молитвами, в мире глубоце, церковь Твою, жительство Твое, Богородицею соблюде, многомилостиве.

В неделю же глаголем ипакои прилучившагося гласа.

Господи, помилуй. (40)

Иже на всякое время и на всякий час, на небеси и на земли поклоняемый и славимый, Христе Боже, долготерпеливе, многомилостиве, многоблагоутробне, Иже праведныя любяй и грешныя милуяй, Иже вся зовый ко спасению, обещания ради будущих благ: Сам, Господи, приими и наша в час сей молитвы и исправи живот наш к заповедем Твоим, души наша освяти, телеса очисти, помышления исправи, мысли очисти: и избави нас от всякия скорби, зол и болезней: огради нас святыми Твоими Англеы, да ополчением их соблюдаеми и наставляеми достигнем в соединение веры и в разум неприступныя Твоея славы: яко благословен еси во веки веков. Аминь.
Господи, помилуй,
трижды.

Слава, и ныне:

Честнейшую Херувим, и славнейшую без сравнения серафим, без истления Бога Слова рождшую, сущую Богородицу тя величаем.
Именем господним благослови, отче.

Иерей: Боже, ущедри ны, и благослови ны, просвети лице Твое на ны, и помилуй ны.

И аще есть четыредесятница, творим три великия поклоны, глаголюще молитву:

Господи и Владыко живота моего, дух праздности, уныния, любоначалия и празднословия не даждь ми. Поклон.
Дух же целомудрия, смиренномудрия, терпения и любве, даруй ми рабу Твоему.
Поклон.
Ей, Господи Царю, даждь ми зрети моя согрешения, и не осуждати брата моего, яко благословен еси во веки веков. Аминь.
Поклон.

Таже малых 12, глаголюще на кийждо поклон: Боже, очисти мя грешнаго.

И паки последи молитву сию: Господи и Владыко живота моего: до конца: во веки веков. Аминь. И поклон един великий.

Таже, Трисвятое. Пресвятая Троице: Отче наш: Господи, помилуй, 12.

И молитву:

Христе, свете истинный, просвещаяй и освещаяй всякаго человека грядущаго в мир да знаменается на нас свет лица Твоего, да в нем узрим свет неприступный: и исправи стопы нашя к деланию заповедей Твоих, молитвами пречистыя Твоея Матере, и всех Твоих святых, аминь.

По молитве лик поет:

Взбранной воеводе победительная, яко избавльшеся от злых, благодарственная восписуем ти раби твои, Богородице: но яко имущая державу непобедимую, от всяких нас бед свободи, да зовем ти: радуйся, невесто неневестная.

Иерей: Слава Тебе, Христе Боже, упование наше, слава Тебе.
Лик: Слава, и ныне: Господи, помилуй, трижды. Благослови.

Иерей отпуст малый:

Христос истинный Бог наш, молитвами пречистыя своея Матере, преподобных и богоносных отец наших, и всех святых, помилует и спасет нас, яко благ и человеколюбец.

Или, по уставу, совершенный отпуст:

Христос истинный Бог наш, молитвами пречистыя своея Матере: в понедельник: предстательствы честных небесных сил безплотных: и прочая.
Во вторник: честнаго, славнаго пророка, предтечи и крестителя Иоанна: и прочая.
В среду и пяток: силою честнаго и животворящаго Креста: и прочая.
В четверток: святых славных и всехвальных апостол: иже во святых отца нашего Николаа архиепископа, Мирликийскаго чудотворца: и прочая.
В субботу: святых славных и всехвальных апостол: святых славных и добропобедных мучеников: преподобных и богоносных отец наших: и прочая.

 

ЧАС ТРЕТИЙ

Иерей: Благословен Бог наш всегда, ныне и присно, и во веки веков.
И мы: Аминь.

Слава Тебе, Боже наш, слава Тебе.

Царю небесный, утешителю, душе истины, иже везде сый и вся исполняяй, сокровище благих и жизни подателю, прииди и вселися в ны, и очисти ны от всякия скверны, и спаси, блаже, души нашя.
Святый Боже, святый крепкий, святый безсмертный, помилуй нас. Трижды.
Слава Отцу, и Сыну, и святому Духу, и ныне, и присно, и во веки веков, аминь.
Пресвятая Троице, помилуй нас: Господи, очисти грехи нашя: Владыко, прости беззакония наша: святый, посети и исцели немощи нашя имене Твоего ради.
Господи, помилуй.
Трижды.

Слава, и ныне:

Отче наш, иже еси на небесех, да святится имя Твое, да приидет царствие Твое: да будет воля Твоя, яко на небеси и на земли. Хлеб наш наущный даждь нам днесь, и остави нам долги нашя, якоже и мы оставляем должником нашым: и не введи нас во искушение, но избави нас от лукаваго.
Иерей: Яко Твое есть царство:
Таже, Господи, помилуй. (12)

Слава, и ныне:

Приидите, поклонимся цареви нашему Богу.
Приидите, поклонимся и припадем Христу, цареви нашему Богу.
Приидите, поклонимся и припадем самому Христу, цареви и Богу нашему.

Таже псалмы:

Псалом 16

Услыши, Господи, правду мою, вонми молению моему, внуши молитву мою, не во устнах льстивых: От лица твоего судьба моя изыдет: очи мои да внидита правоты. Искусил еси сердце мое, посетил еси нощию, искусил мя еси, и не обретеся во мне неправда. Яко да не возглаголют уста моя дел человеческих, за словеса устен твоих аз сохраних пути жестоки. Соверши стопы моя во стезях твоих, да не подвижутся стопы моя. Аз воззвах, яко услышал мя еси, Боже, приклони ухо твое мне, и услыши глаголы моя. Удиви милости твоя, спасаяй уповающыя на тя от противящихся деснице твоей: Сохрани мя, Господи, яко зеницу ока, в крове крилу твоею покрыеши мя. От лица нечестивых, острастших мя: врази мои душу мою одержаша. Тук свой затвориша: уста их глаголаша гордыню. Изгонящии мя ныне обыдоша мя, очи свои возложиша уклонити на землю. Объяша мя яко лев готов на лов, и яко скимен, обитаяй в тайных. Воскресни, Господи, предвари я и запни им: избави душу мою от нечестиваго: оружие твое от враг руки твоея. Господи, от малых от земли раздели я в живот их, и сокровенных твоих исполнися чрево их: насытишася сынов, и оставиша останки младенцем своим. Аз же правдою явлюся лицу твоему, насыщуся, внегда явитимися славе твоей.

Псалом 24

К тебе, Господи, воздвигох душу мою, Боже мой, на тя уповах, да не постыжуся во век, ниже да посмеют ми ся врази мои: Ибо вси терпящии тя не постыдятся. Да постыдятся беззаконнующии вотще. Пусти твоя, Господи, скажи ми, и стезям твоим научи мя: Настави мя на истину твою и научи мя: яко Ты еси Бог спас мой, и тебе терпех весь день. Помяни щедроты твоя, Господи, и милости твоя, яко от века суть. Грех юности моея и неведения моего не помяни: по милости твоей помяни мя ты, ради благости твоея, Господи. Благ и прав Господь, сего ради законоположит согрешающым на пути. Наставит кроткия на суд, научит кроткия путем своим. Вси путие господни милости и истина, взыскающым завета его и свидения его. Ради имене твоего, Господи, и очисти грех мой: мног бо есть. Кто есть человек, бояйся Господа; законоположит ему на пути, егоже изволи. Душа его во благих водворится, и семя его наследить землю. Держава Господь боящихся его, и завет его явит им. Очи мои выну ко Господу, яко той исторгнет от сети нозе мои. Призри на мя и помилуй мя, яко единород и нищь есмь аз. Скорби сердца моего умножишася, от нужд моих изведи мя. Виждь смирение мое, и труд мой, и остави вся грехи моя. Виждь враги моя, яко умножишася, и ненавидением неправедным возненавидеша мя. Сохрани душу мою и избави мя, да не постыжуся, яко уповах на тя. Незлобивии и правии прилепляхуся мне, яко потерпех тя, Господи. Избави, Боже, Израиля от всех скорбей его.

Псалом 50

Помилуй мя, Боже, по велицей милости Твоей, и по множеству щедрот Твоих, очисти беззаконие мое. Наипаче омый мя от беззакония моего, и от греха моего очисти мя. Яко беззаконие мое аз знаю, и грех мой предо мною есть выну. Тебе единому согреших и лукавое пред Тобою сотворих: яко да оправдишися во словесех Твоих и победиши внегда судити ти. Се бо в беззакониих зачат есмь и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом и очищуся; омыеши мя, и паче снега убелюся. Слуху моему даси радость и веселие: и возрадуются кости смиренные. Отврати лице Твое от грех моих, и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего, и Духа Твоего Святаго не отъими от мене. Воздаждь ми радость спасения Твоего, и Духом владычным утверди мя. Научу беззаконныя путем Твоим, и нечестивии к Тебе обратятся. Избави мя от кровей, Боже, Боже спасения моего, возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу – дух сокрушен: сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношение и всесожигаемая: тогда возложат на олтарь Твой тельцы.

Слава, и ныне:

Аллилуиа, аллилуиа, аллилуиа, слава Тебе Боже. Трижды. Поклоны 3.

Господи, помилуй, трижды.

И аще убо Бог Господь, поется, глаголи: Слава, тропарь дне, или праздника, или святаго.

И ныне: Богородице, ты еси лоза истинная, возврастившая нам плод живота, тебе молимся, Владычице, со святыми апостолы, помиловати души нашя.

Аще же Аллилуиа, глаголи сей тропарь, глас 6:

Господи, иже пресвятаго Твоего Духа в третий час апостолом Твоим низпославый: того, благий, не отъими от нас, но обнови нас молящихтися.
Стих 1: Сердце чисто созижди во мне, Боже, и дух прав обнви во утробе моей.
Стих 2: Не отвержи мене от лица Твоего, и Духа Твоего святаго не отъими от мене.

К сим же стихом припеваем: Господи, иже пресвятаго Твоего Духа: весь до конца, и покланяемся по единожды.

Таже, Слава, и ныне, богородичен: Богородице, Ты еси лоза истинная: и прочая.

Господь Бог благословен, благословен Господь день дне, поспешит нам Бог спасений наших, Бог наш, Бог спасати.

Трисвятое: Пресвятая Троице: По Отче наш:
Иерей: Яко Твое есть царство:

Кондак дне, или святаго, или праздника.

Аще же пост, или несть кондака, глаголем сия тропари, глас 8:

Благословен еси, Христе Боже наш, иже премудры ловцы явлей, низпослав им Духа святаго, и теми уловлей вселенную: человеколюбче, слава Тебе.

Слава: Скорое и известное даждь утешение рабом Твоим, Иисусе, внегда унывати духом нашым, не разлучайся от душ наших в скорбех: не удаляйся от мыслей наших во обстояниих, но присно нас предвари. Приближися нам, приближися, везде сый, якоже со апостолы Твоими всегда еси, сице и Тебе желающым соедини себе, щедре: да совокуплени Тебе поем, и славословим всесвятаго Духа Твоего.

И ныне: Надежда и предстательство и прибежище христиан, необоримая стена, изнемогающым пристанище небурное, Ты еси, Богородице пречистая: но яко мир спасающая непрестанною твоею молитвою, помяни и нас, дево всепетая.

Господи, помилуй. (40)

Иже на всякое время и на всякий час, на небеси и на земли поклоняемый и славимый, Христе Боже, долготерпеливе, многомилостиве, многоблагоутробне, Иже праведныя любяй и грешныя милуяй, Иже вся зовый ко спасению, обещания ради будущих благ: Сам, Господи, приими и наша в час сей молитвы и исправи живот наш к заповедем Твоим, души наша освяти, телеса очисти, помышления исправи, мысли очисти: и избави нас от всякия скорби, зол и болезней: огради нас святыми Твоими Англеы, да ополчением их соблюдаеми и наставляеми достигнем в соединение веры и в разум неприступныя Твоея славы: яко благословен еси во веки веков. Аминь.
Господи, помилуй,
трижды.

Слава, и ныне:

Честнейшую Херувим, и славнейшую без сравнения серафим, без истления Бога Слова рождшую, сущую Богородицу тя величаем.
Именем господним благослови, отче.

Иерей: Боже, ущедри ны, и благослови ны, просвети лице Твое на ны, и помилуй ны.

И аще есть четыредесятница, творим три великия поклоны, глаголюще молитву:

Господи и Владыко живота моего, дух праздности, уныния, любоначалия и празднословия не даждь ми. Поклон.
Дух же целомудрия, смиренномудрия, терпения и любве, даруй ми рабу Твоему.
Поклон.
Ей, Господи Царю, даждь ми зрети моя согрешения, и не осуждати брата моего, яко благословен еси во веки веков. Аминь.
Поклон.

Таже малых 12, глаголюще на кийждо поклон: Боже, очисти мя грешнаго.

И паки последи молитву сию: Господи и Владыко живота моего: до конца: во веки веков. Аминь. И поклон един великий.

Таже, Трисвятое. Пресвятая Троице: Отче наш: Господи, помилуй, 12.

Посем молитву сию:

Владыко Боже Отче вседержителю, Господи Сыне единородный, Иисусе Христе, и святый Душе, едино божество, едина сила, помилуй мя грешнаго: и имиже веси судьбами, спаси мя недостойнаго раба Твоего, яко благословен еси во веки веков, аминь.

 

ЧАС ШЕСТЫЙ

Приидите, поклонимся царвеи нашему Богу.
Приидите, поклонимся и припадем Христу, царвеви нашему Богу.
Приидите, поклонимся и припадем самому Христу, цареви и Богу нашему.

Псалом 53

Боже, во имя твое спаси мя, и в силе твоей суди ми. Боже, услыши молитву мою, внуши глаголы уст моих. Яко чуждии восташа на мя, и крепцыи взыскаша душу мою, и не предложиша Бог пред собою. Се бо Бог помогает ми, и Господь заступник души моей. Отвратит злая врагом моим, истиною твоею потреби их. Волею пожру тебе, исповемся имени твоему, Господи, яко благо. Яко от всякия печали избавил мя еси, и на враги моя воззре око мое.

Псалом 54

Внуши, Боже, молитву мою, и не презри моления моего: Вонми ми, и услыши мя: возскорбех печалию моею, и смятохся от гласа вражия и от стужения грешнича: Яко уклониша на мя беззаконие, и во гневе враждоваху ми. Сердце мое смятеся во мне, и боязнь смерти нападе на мя: Страх и трепет прииде на мя и поркы мя тьма. И рех: кто даст ми криле яко голубине, и полещу и почию. Се удалихся бегая, и водворихся в пустыни. Чаях Бога, спасающаго мя от малодушия и от бури. Потопи, Господи, и раздели языки их: яко видех беззаконие и претерпевание во граде. Днем и нощию обыдет и по стенам его: беззаконие и труд посреде его, и неправда: И не оскуде от стогн его лихва и лесть. Яко аще бы враг поносил ми, претерпел бых убо: и аще бы ненавидяй мя на мя велеречевал, укрылбыхся от него. Ты же, человече равнодушне, владыко мой и знаемый мой, Иже купно наслаждался еси со мною брашен: в дому божии ходихом единомышлением. Да приидет же смерть на ня, и да снидут во ад живи: яко лукавство в жилищах их, посреде их. Аз к Богу воззвах, и Господь услыша мя. Вечер и заутра и полудне повем, и возвещу, и услышит глас мой. Избавит миром душу мою от приближающихся мне: яко во мнозе бяху со мною. Услышит Бог и смирит я, сый прежде век: несть бо им изменения, яко не убояшася Бога. Простре руку свою на воздаяние, оскверниша завет его. Разделишася от гнева лиц его, и приближишася сердца их: умякнуша словеса их паче елеа, и та суть стрелы. Возверзи на Господа печаль твою: и той тя препитает: не даст в век молвы праведнику. Ты же, Боже, низведеши их к студенец истления: Мужие кровей и льсти не преполовят дней своих: аз же, Господи, уповаю на тя.

Псалом 90

Живый в помощи вышняго, в крове Бога небеснаго водворится. Речет Господеви: заступник мой еси и прибежище мое, Бог мой, и уповаю на него. Яко той избавит тя от сети ловчии, и от словесе мятежна: плещма своима осенит тя, и под криле его надеешися: оружием обыдет тя истина его. Не убоишися от страха нощнаго, от стрелы летящия во дни, От вещи во тьме преходящия, от сряща и беса полуденнаго. Падет от страны твоея тысяща, и тма одесную тебе, к тебе же не приближится: Обаче очима твоима смориши, и воздаяние грешников узриши. Яко Ты, Господи, упование мое: вышняго положил еси прибежище твое. Не приидет к тебе зло, и рана не приближится телеси твоему: Яко ангелом своим заповесть о Тебе, сохранити тя во всех путех твоих: На руках возмут тя, да не когда преткнеши о камень ногу твою: На аспида и василиска наступиши, и попереши льва и змия. Яко на мя упова, и избавлю и: покрыю и, яко позна имя мое. Воззовет ко мне, и услышу его: с ним есмь в скорби, изму его, и прославлю его: Долготою дней исполню его, и явлю ему спасение мое.

Слава, и ныне:

Аллилуиа, аллилуиа, аллилуиа, слава Тебе, Боже. Трижды. Поклоны 3.
Господи, помилуй. Трижды.

И аще убо Бог Господь поется, глаголем: Слава, тропарь дне, праздника или святаго.

И ныне, богородичен:

Яко не имамы дерзновения за премногия грехи нашя: ты иже от тебе родшагося моли, Богородице дево: много бо может моление матернее ко благосердию Владыки. Не презри грешных мольбы, всечистая, яко милостив есть и спасти могий, иже и страдати о нас изволивый.

Аще же Аллилуиа, глаголем настоящий тропарь, во глас 2:

Иже в шестый день же и час, на кресте пригвождей, в раи дерзновенный адамов грех, и согрешений наших рукописание раздери, Христе Боже, и спаси нас.
Стих 1: Внуши, Боже, молитву мою, и не презри моления моего.
Стих 2: Аз к Богу воззвах, и Господь услыша мя.

К сим же стихом припеваем: Иже в шестый день: весь до конца, и покланяемся по единожды.

Слава, и ныне, богородичен: Яко не имамы дерзновения:

Аще есть четыредесятница, зде читается тропарь пророчества, прокимен и паремия.

Скоро да предварят на щедроты Твоя, Господи, яко обнищахом зело. Помози нам, Боже Спасе наш, славы ради имене Твоего, Господи, избави нас, и очисти грехи нашя, имене ради Твоего.

Трисвятое. Пресвятая Троице: По Отче наш:
Иерей: Яко Твое есть царство:

Кондак дне, или праздника, или святаго.

Аще же пост, или несть кондака, глаголем сия тропари, глас 2:

Спасение соделал еси посреде земли, Христе Боже, на кресте пречистеи руце Твои простерл еси, собирая вся языки, зовущыя: Господи, слава Тебе.

Слава: Пречистому образу Твоему покланяемся, благий, просяще прощения прегрешений наших, Христе Боже: волею бо благословил еси плотию взыти на крест, да избавиши, яже создал еси от работы вражия. Тем благодарственно вопием Ти: радости исполнил еси вся, Спасе наш, пришедый спасти мир.

И ныне: Милосердия сущи источник, милости сподоби нас, Богородице, призри на люди согрешившия, яви яко присно силу твою: на тя бо уповающе, радуйся, вопием ти, якоже иногда Гавриил, безплотных архистратиг.

Сей глаголется в понедельник, во вторник и в четверток.
В среду же и пяток, вместо:
Милосердия сущи: глаголется:

Крестобогородичен, глас 2:

Препрославлена еси, Богородице дево, поем тя: крестом бо сына твоего низложися ад, и смерть умертвися, умерщвленнии востахом и живота сподобихомся, рай восприяхом, древнее наслаждение. Тем благодаряще славословим, яко державнаго Христа Бога нашего, и единаго многомилостиваго.

Господи, помилуй (40).

Иже на всякое время и на всякий час, на небеси и на земли поклоняемый и славимый, Христе Боже, долготерпеливе, многомилостиве, многоблагоутробне, Иже праведныя любяй и грешныя милуяй, Иже вся зовый ко спасению, обещания ради будущих благ: Сам, Господи, приими и наша в час сей молитвы и исправи живот наш к заповедем Твоим, души наша освяти, телеса очисти, помышления исправи, мысли очисти: и избави нас от всякия скорби, зол и болезней: огради нас святыми Твоими Ангелы, да ополчением их соблюдаеми и наставляеми достигнем в соединение веры и в разум неприступныя Твоея славы: яко благословен еси во веки веков. Аминь.
Господи, помилуй,
трижды.

Слава, и ныне:

Честнейшую Херувим, и славнейшую без сравнения серафим, без истления Бога Слова рождшую, сущую Богородицу тя величаем.
Именем господним благослови, отче.

Иерей: Боже, ущедри ны, и благослови ны, просвети лице Твое на ны, и помилуй ны.

И аще есть пост, и Аллилуиа пето, творим три великия поклоны, глаголюще молитву:

Господи и Владыко живота моего, дух праздности, уныния, любоначалия и празднословия не даждь ми. Поклон.
Дух же целомудрия, смиренномудрия, терпения и любве, даруй ми рабу Твоему.
Поклон.
Ей, Господи Царю, даждь ми зрети моя согрешения, и не осуждати брата моего, яко благословен еси во веки веков. Аминь.
Поклон.

Таже малых 12, глаголюще на кийждо поклон: Боже, очисти мя грешнаго.

И паки последи молитву сию: Господи и Владыко живота моего: до конца: во веки веков. Аминь. И поклон един великий.

Таже, Трисвятое. Пресвятая Троице: Отче наш: Господи, помилуй, 12.

Посем молитву:

Боже и Господи сил, и всея твари содетелю, иже за милосердие безприкладныя милости Твоея, единороднаго Сына Твоего, Господа нашего Иисуса Христа, низпославый на спасение рода нашего, и честным его крестом рукописание грех наших растерзавый, и победивый тем начала и власти тьмы: сам, Владыко человеколюбче, приими и нас грешных благодарственныя сия и молебныя молитвы, и избави нас от всякаго всегубительнаго и мрачнаго прегрешения, и всех озлобити нас ищущих видимых и невидимых враг: пригвозди страх Твоему плоти нашя, и не уклони сердец наших во словеса, или помышление лукавствия, но любовию Твоею уязви душы нашя: Да к Тебе всегда взирающе, и еже о Тебе светом наставляеми, Тебе непреступнаго и присносущнаго зряще света, непрестанное Тебе исповедание и благодарение возсылаем, безначальному Отцу, со единородным Твоим Сыном, и всесвятым и благим и животворящим Твоим Духом, ныне и присно, и во веки веков, аминь.

И аще убо Бог Господь: пето есть, изобразительная глаголем зде.

Аще же Аллилуиа, глаголи я по девятом часе.

А девятый час по шестом начинается сице: Святый Боже: по Отче наш: Господи, помилуй, 12. Слава, и ныне: Приидите, поклонимся: трижды. И псалмы, и прочая.

 

ЧАС ДЕВЯТЫЙ

По Благословен Бог наш:

Слава Тебе, Боже наш, слава Тебе. Царю небесный: Трисвятое. Пресвятая Троице: Отче наш:
Иерей: Яко Твое есть царство: Господи, помилуй (12).

Слава, и ныне:

Приидите, поклонимся: трижды.

Таже псалмы:

Псалом 83

Коль возлюбленна селения твоя, Господи сил. Желает и скончавается душа моя во дворы господни: сердце мое и плоть моя возрадовастася о Бозе живе. Ибо птица обрете себе храмину, и горлица гнездо себе, идеже положит птенцы своя: отлари твоя, Господи сил, царю мой и Боже мой. Блажени живущии в дому твоем: в веки веков восхвалят тя. Блажен муж, ему же есть заступление его у тебе, восхождения в сердце своем своем положи. Во юдоль плачевную, в место еже положи: ибо благосовение дасть законополагаяй. Пойдут от силы в силу: явится Бог богов в Сионе. Господи Боже сил, услыши молитву мою: внуши, Боже иаковль. Защитниче наш, виждь, Боже, и призри на лице христа твоего. Яко лучше день един во дворех твоих паче тысящ: изволих приметатися в дому Бога моего паче, неже жити ми в селениих грешничих. Яко милость и истину любит Господь, Бог благодать и славу дасть: Господь не лищит благих, ходящих незлобием. Господи Боже сил, блажен человек уповаяй на тя.

Псалом 84

Благоволил еси, Господи, землю твою, возвратил еси плен иаковль. Оставил еси беззакония людей твоих, покрыл еси вся грехи их. Укротил еси весь гнев твой, возвратился еси от гнева ярости твоея. Возврати нас, Боже спасений наших, и отврати ярость твою от нас. Еда во веки прогневаешися на ны; или простреши гнев твой от рода в род; Боже, ты обращься оживиши ны, и людие твои возвеселятся о тебе. Яви нам, Господи, милость твою, и спасение твое даждь нам. Услышу, что речет о мне Господь Бог: яко речет мир на люди своя, и на преподобныя своя, и на обращающыя сердца к нему. Обаче близ боящихся его спасение его, вселити славу в землю нашу. Милость и истина сретостеся, правда и мир облобызастася. Истина от земли возсия, и правда с небесе приниче. Ибо Господь дасть благость, и земля наша дасть плод свой. Правда пред ним предъидет, и положит в путь стопы своя.

Псалом 85

Приклони, Господи, ухо твое, и услыши мя, яко нищь и убог есмь аз. Сохрани душу мою, яко преподобен есмь: спаси раба твоего, Боже мой, уповающаго на тя. Помилуй мя, Господи яко к тебе воззову весь день. Возвесели душу раба твоего, яко к тебе взях духу мою. Яко Ты, Господи, благ и кроток, и многомилостив всем призывающым тя. Внуши, Господи, молитву мою, и вонми гласу моления моего. В день скорби моея воззвах к тебе, яко услышал мя еси. Несть подобен тебе в бозех, Господи, и несть по делом твоим. Вси языцы, елики сотворил еси, приидут, и поклонятся пред тобою, Господи, и прославят имя твое: Яко велий еси ты, и творяй чудеса, ты еси Бог един. Настави мя, Господи, на путь твой, и пойду во истине твоей: да возвеселится сердце мое, боятися имене твоего. Исповемся тебе, Господи Боже мой, всем сердцем моим, и прославлю имя твое в век: Яко милость твоя велия на мне, и избавил еси душу мою от ада преисподнейшаго. Боже, законопреступницы восташа на мя, и сонм державных взыскша душу мою, и не предложиша тебе пред собою. И ты, Господи Боже мой, щедрый и милостивый, долготерпеливый и многомилостивый, и истинный: Призри на мя, и помилуй мя: даждь державу твою отроку твоему, и спаси сына рабы твоея. Сотвори со мною знамение во благо: и да видят ненавидящии мя, и постыдятся, яко ты, Господи, помогл ми, и утешил мя еси.

И паки:

Сотвори со мною знамение во благо: и да видят ненавидящии мя, и постыдятся, яко ты, Господи, помогл ми, и утешил мя еси.

Слава, и ныне:

Аллилуиа, аллилуиа, аллилуиа, слава Тебе, Боже. Трижды. Поклоны 3.
Господи, помилуй,
трижды.

И аще убо Бог Господь поется, глаголем Слава, тропарь дне, праздника или святаго.

И ныне, богородичен:

Иже нас ради родшейся от девы, и распятие претерпев, благий, испровергий смертию смерть, и воскресение явлей яко Бог, не презри, яже создал еси рукою Твоею: яви человеколюбие Твое, милостиве, приими рождшую Тя Богородицу молящуюся за ны, и спаси, Спасе наш, люди отчаянныя.

Аще же Аллилуиа, настоящий, во глас 8:

Иже в девятый час нас ради плотию смерть вкусивый, умертви плоти нашея мудрование, Христе Боже, и спаси нас.

Стих 1: Да приближится молитва моя пред Тя, Господи, по словеси Твоему вразуми мя.
Стих 2: Да внидет прошение мое пред Тя, Господи, по словеси Твоему избави мя.

К сим же стихом припеваем: Иже в девятый час: весь до конца, и покланяемся по единожды.

Слава, и ныне, богородичен: Иже нас ради:

Не предаждь нас до конца, имене Твоего ради, и не разори завета Твоего, и не остави милости Твоея от нас. Авраама ради возлюбленнаго от Тебе, и за Исаака раба Твоего, и Исраиля святаго Твоего.

Трисвятое. Пресвятая Троице: По Отче наш: кондак дне, праздника, или святаго.

Аще же пост, глаголем сия, глас 8:
Видя разбойник начальника жизни на кресте висяща, глаголюще: аще не бы Бог был воплощься, иже с нами распныйся, не бы солнце лучы своя потаило, ниже бы земля трепещущи тряслася: но вся терпяй, помяни мя, Господи, во царствии Твоем.

Слава: Посреде двою разбойнику мерило праведное обретеся крест Твой: овому убо низводиму во ад тягостию хуления: другому же легчащуся от прегрешений в познанию богословия, Христе Боже, слава Тебе.

И ныне: Агнца и пастыря, и спаса мира, на кресте зрящи рождшая тя, глаголаше слезящи: мир убо радуется, приемля избавление, утроба же моя горит, зрящи твое распятие, еже за всех терпиши, сыне и Боже мой.

Господи, помилуй. (40)

Иже на всякое время и на всякий час, на небеси и на земли поклоняемый и славимый, Христе Боже, долготерпеливе, многомилостиве, многоблагоутробне, Иже праведныя любяй и грешныя милуяй, Иже вся зовый ко спасению, обещания ради будущих благ: Сам, Господи, приими и наша в час сей молитвы и исправи живот наш к заповедем Твоим, души наша освяти, телеса очисти, помышления исправи, мысли очисти: и избави нас от всякия скорби, зол и болезней: огради нас святыми Твоими Ангелы, да ополчением их соблюдаеми и наставляеми достигнем в соединение веры и в разум неприступныя Твоея славы: яко благословен еси во веки веков. Аминь.
Господи, помилуй,
трижды.

Слава, и ныне:

Честнейшую Херувим, и славнейшую без сравнения серафим, без истления Бога Слова рождшую, сущую Богородицу тя величаем.
Именем господним благослови, отче.

Иерей: Боже, ущедри ны, и благослови ны, просвети лице Твое на ны, и помилуй ны.

И аще есть пост, и Аллилуиа пето, творим три великия поклоны, глаголюще молитву:

Господи и Владыко живота моего, дух праздности, уныния, любоначалия и празднословия не даждь ми. Поклон.
Дух же целомудрия, смиренномудрия, терпения и любве, даруй ми рабу Твоему.
Поклон.
Ей, Господи Царю, даждь ми зрети моя согрешения, и не осуждати брата моего, яко благословен еси во веки веков. Аминь.
Поклон.

Таже малых 12, глаголюще на кийждо поклон: Боже, очисти мя грешнаго.

И паки последи молитву сию: Господи и Владыко живота моего: до конца: во веки веков. Аминь. И поклон един великий.

Таже, Трисвятое. Пресвятая Троице: Отче наш: Господи, помилуй, 12.

Посем молитву сию, святаго Василия великаго:

Владыко Господи Иисусе Христе Боже наш, долготерпевый о наших согрешениих, и даже до нынешняго часа приведый нас, воньже на животворящем древе вися, благоразумному разбойнику, иже в рай путесотворил еси вход, и смертию смерть разрушил еси, очисти нас грешных и недостойных раб Твоих: согрешихом бо и беззаконновахом, и несмы достойни возвести очеса наша, и воззрети на высоту небесную, зане оставихом путь правды Твоея, и ходихом в волях сердец наших. Но молим Твою безмерную благость: пощади нас, Господи, по множеству милости Твоея, и спаси нас имене Твоего ради святаго, яко исчезоша в суете дние наши. Изми нас из руки сопротивнаго, и остави нам грехи нашя, и умертви плотское наше мудрование, да ветхаго отложивше человека, в новаго облецемся, и Тебе поживем нашему владыце и благодетелю: и тако Твоим последующе повелением, в вечный покой достигнем, идеже есть всех веселящихся жилище. Ты бо еси воистину истинное веселие, и радость любящих Тя, Христе Боже наш, и Тебе славу возсылаем, со безначальным Твоим Отцем, и пресвятым и благим и животворящим Твоим Духом, ныне и присно, и во веки веков, аминь.

Слава, и ныне: Господи, помилуй, трижды. Благослови. И отпуст.

 

ПОСЛЕДОВАНИЕ ИЗОБРАЗИТЕЛЬНЫХ

Глаголи сице:

Благослови, душе моя, Господа. Благословен еси, Господи.

Псалом 102

Благослови, душе моя, Господа, и вся внутренняя моя имя святое Его. Благослови, душе моя, Господа и не забывай всех воздаяний Его: Очищающаго вся беззакония твоя, исцеляющаго вся недуги твоя: Избавляющаго от истления живот твой, венчающаго тя милостию и щедротами: Исполняющаго во благих желание твое: обновится яко орля юность твоя. Творяй милостыни Господь, и судьбу всем обидимым. Сказа пути своя Моисеови, сыновом исраилевым хотения своя. Щедр и милостив Господь, долготерпелив и многомилостив. Не до конца прогневается, ниже в век враждует: Не по беззакониям нашым сотворил есть нам, ниже по грехом нашым воздал есть нам. Яко по высоте небесней от земли, утвердил есть Господь милость Свою на боящихся его. Елико отстоят востоцы от запад, удалил есть от нас беззакония наша. Яко же щедрит отец сыны, ущедри Господь боящихся Его. Яко Той позна создание наше, помяну яко персть есмы: Человек, яко трава, дние его, яко цвет сельный, тако оцветет; яко дух пройде в нем, и не будет и не познает ктому места своего. Милость же Господня от века и до века на боящихся Его, и правда Его на сынех сынов, хранящих завет Его, и помнящих заповеди Его, творити я. Господь на небеси уготова престол свой, и Царство Его всеми обладает. Благословите Господа вси ангели Его, сильнии крепостию, творящии слово Его, услышати глас словес Его. Благословите Господа вся силы Его, слуги Его, творящии волю Его. Благословите Господа вся дела Его, на всяком месте владычества Его.

Слава, и ныне: Благослови, душе моя, Господа, и вся внутренняя моя, имя святое его. Благословен еси, Господи.

Слава:

Псалом 145

Хвали, душе моя, Господа. Восхвалю Господа в животе моем, пою Богу моему, дондеже есмь. Не надейтеся на князи, на сыны человеческия, в нихже несть спасения. Изыдет дух его, и возвратится в землю свою: в той день погибнут вся помышления его. Блажен, емуже Бог иаковль помощник его, упование его на Господа Бога своего: Сотворшаго небо и землю, море, и вся яже в них: Хранящаго истину в век, творящаго суд обидимым, дающаго ищу алчущым. Господь решит окованныя, Господь умудряет слепцы, Господь возводит низверженыя, Господь любит праведники. Господь хранит пришельцы, сира и вдову приимет, и путь грешных погубит. Воцарится Господь во век, Бг твой, Сионе, в род и род.

И ныне:

Единородный Сыне и Слове божий, безсмертен сый, и изволивый спасения нашего ради воплотится от святыя Богородицы и приснодевы Марии, непреложно вочеловечивыйся: распныйся же, Христе Боже, смертию смерть поправый, един сый святыя Троицы, спрославляемый Отцу и святому Духу, спаси нас.

Подобает ведати, яко в великую четыредесятницу не глаголем изобразительных псалмов, но по молитве девятаго часа: Владыко Господи Иисусе Христе, Боже наш, долготерпеливый о наших согрешениих: поем абие:

Помяни нас, Господи, егда приидеши во царствии Твоем. И: Блажении нищии духом:

И также по Слава: и по И ныне: творяще поклон един коемуждо Помяни.

По конце же стихов, соединяемым две ликом, со сладкопением поют: Помяни нас, Господи: возгласно.

Во царствии Твоем помяни нас, Господи, егда приидеши во царствии Твоем.
Блажени нищии духом, яко тех есть царство небесное.
Блажени плачущии, яко тии утешатся.
Блажени кротцыи, яко тии наследять землю.
Блажени алчущии и жаждущии правды, яко тии насытятся.
Блажени милостивии, яко тии помилованы будут.
Блажени чистии сердцем, яко тии Бога узрят.
Блажени миротворцы, яко тии сынове божии нарекутся.
Блажени изгнани правды ради, яко тех есть царство небесное.
Блажени есте, егда поносят вам, и изженут, и рекут всяк зол глагол, на вы лжуще, мене ради.
Радуйтеся и веселитеся, яко мзда ваша многа на небесех.

На блаженнах стихи по вся дни,
глас 6:

Помяни мя, Боже Спасе мой, егда приидеши во царствии Твоем: и спаси мя, яко един человеколюбец.
Петров плачь приемый, приими и мое, Христе, покаяние, и даруй ми согрешений прощение.
Проповедавый покаяние человеком, господень крестителю и предтече, моля тя, покаятися мне от души сподоби.
Треволнения подъемше страстей, святии, сущыя в бури болезней присно избавляете: темже блажими есте.

Слава: Пророки прославляемый, Спасе мой, в Троице, просто и несмесно, предтечи молитвами спаси мя.

И ныне: Заступнице крепкая сущым в скорбех, заступи от житейских страстей прилога, и спаси мя, Владычице.

Апостол к Колоссаем, зач. 258:

Братие, облецытеся убо якоже избраннии божии, святи и возлюбленни, во утробы щедрот, благость, смиренномудрие, кротость и долготерпение: Приемлюще друг друга и прощающе себе, аще кто на кого имать поречение: якоже и Христос простил есть вам, тако и вы. Над всеми же сими стяжите любовь, яже есть соуз совершенства. И мир божий да водворяется в сердцах ваших, в оньже и звани бысте в едином теле: и благодарни бывайте. Слово христово да вселяется в вас богатно, во всякой премудрости, учаще и вразумляюще себе самех во псалмех, и пениих и песнех духовных, в благодати поюще в сердцах ваших Господеви.

Евангелие от Марка, зач. 37:

Рече Господь: иже хощет по мне ити, да отвержется себе, и возъмет крест свой, и по мне грядет. Иже бо аще хощет душу свою спасти, погубит ю: а иже погубит душу свою мене ради и евангелиа, той спасет ю. Кая бо польза человеку, аще приобрящет мир весь, и отщетит душу свою; Или что дест человек измену на души своей; Иже бо аще постыдится мне, и моих словес в роде сем прелюбодейнем и грешнем, и сын человеческий постыдится его, егда приидет во славе Отца своего со ангелы святыми. И глаголаше им: аминь глаголю вам: яко суть нецыи от зде стоящих, иже не имут вкусити смерти, дондеже видят царствие божие пришедшее в силе.

И аще убо есть четыредесятница, соединяема оба лика поют со сладкопением: Помяни нас, Господи: И поклон един на кийждо. Аще же ни, скоро.

Слава, и ныне:

Помяни нас, Господи, егда приидеши во царствии Твоем.
Помяни нас, Владыко, егда приидеши во царствии Твоем.
Помяни нас, святый, егда приидеши во царствии Твоем.
Лик небесный поет Тя, и глаголет: свят, свят, свят Господь саваоф, исполнь небо и земля славы Твоея.
Стих: Приступите к нему и просетитеся, и лица ваша не постыдятся.
Лик небесный поет Тя, и глаголет: свят, свят, свят Господь саваоф, исполнь небо и земля славы Твоея.

Слава:

Лик святых ангел и архангел, со всеми небесными силами поет Тя, и глаголет: свят, свят, свят Господь саваоф, исполнь небо и земля славы Твоея.

И ныне:

Аще есть Литургиа, абие: Ослаби, остави:

Верую во единаго Бога Отца, вседержителя, творца небу и земли, видимым же всем и невидимым. И во единаго Господа Иисуса Христа, Сына божия, единороднаго, иже от Отца рожденнаго прежде всех век. Света от света, Бога истинна от Бога истинна, рожденна, несотворенна, единосущна Отцу, имже вся быша. Нас ради человек и нашего ради спасения, сшедшаго с небес, и воплотившагося от Духа свята и Марии девы, и вочеловечшася. Распятаго же за ны при Понтийстем Пилате, и страдавша, и погребенна. И воскресшаго в третий день, по писанием. И возшедшаго на небеса, и седящаго одесную Отца. И паки грядущаго со славою, судити живым и мертвым, егоже царствию не будет конца. И в Духа Святаго, Господа, животворящаго, иже от Отца исходящаго, иже со Отцем и Сыном спокланяема и сславима, глаголавшаго пророки. Во едину, святую, соборную и апостольскую Церковь. Исповедую едино крещение во оставление грехов. Чаю воскресения мертвых: И жизни будущаго века. Аминь.

Таже:

Ослаби, остави, прости, Боже, прегрешения наша, вольная и невольная, яже в слове и в деле, яже в ведении и не в ведении, яже во дни и в нощи, яже во уме и в помышлении, вся нам прости, яко благ и человеколюбец.

Отче наш:

И аще убо есть владычный праздник, глаголем его кондак.

Аще же прилучится и святаго празднуемаго в нем, глаголется первее святаго. Слава: и ныне: праздника.

Аще же Аллилуиа пето, или несть владычный праздник, ниже святаго празднуемаго, глаголи первее преображения, таже дне и храма.

Аще же есть храм господский, глаголи первее храма, таже дне и святаго рядоваго.

Слава: Со святыми упокой, Христе:

И ныне: Предстательство христиан: или храма Богородицы.

В понедельник: безплотных, такожде во вторник: предтечи, и по ряду.

Преображения: На горе преобразился еси, и якоже вмещаху ученицы Твои славу Твою, Христе Боже, видеша: да егда Тя узрят распинаема, страдание убо уразумеют вольное, мирови же проповедят: яко Ты еси воистинну отчее сияние.

В понедельник: кондак безплотных, глас 2: Архистратизи божии, служителе божественныя славы, ангелов начальницы и человеков настаницы, полезное нам просите и велию милость, яко безплотных архистратизи.

Во вторник, предтечи кондак, глас 2 (подобен: Вышних ища:): Пророче божий, и предтече благодати, главу твою, яко шипок священнейший от земли обретше, исцеления всегда приемлем: ибо паки якоже прежде в мире проповедуеши покаяние.

В среду и в пяток сие, глас 4: Вознесыйся на крест волею, тезоименитому Твоему новому жительству щедроты Твоя даруй, Христе Боже: возвесели силою Твоею благоверных царей, победы дая на супостаты, пособие имущым Твое оружие мира, непобедимую победу.

В четверток: святых апостолов, глас 2: Твердыя и боговещанныя проповедатели, верх ученик Твоих, Господи, приял еси в наслаждение благих Твоих и покой: болезни бо онех, и смерть приял еси паче всякаго всеплодия, едине сведый сердечная.

В тойже день: святаго Николаа, глас 3 (Подобен: Дева днесь:): Во Мирех, святе, священнодействитель показался еси: христово бо, преподобне, еавнгелие исполнив, положил еси душу твою о людех твоих, и спасл еси неповинныя от смерти. Сего ради освятился еси, яко великий таинник божия благодати.

В субботу, егда глаголем: Слава: Со святыми упокой, Христе, душы рад Твоих, идеже несть болезнь, ни печаль, ни воздыхание, но жизнь безконечная.

И ныне: настоящий мученичен, глас 8: Яко начатки естества насадителю твари, вселенная приносит Ти, Господи, богоносныя мученики: тех молитвами в мире глубоце церковь Твою, жительство Твое, Богородицею соблюди, многомилостиве.

Сие же глаголется на кийждо день кроме субботы: Предстательство христиан непостыдное, ходатайство ко творцу непреложное, не презри грешных молений гласы, но предвари, яко благая, на помощь нас, верно вопиющих ти: ускори на молитву, и потщися на умоление, предстательствующи присно, Богородице, чтущих тя.

И аще есть четыредесятница: Господи, помилуй. (40)

Слава, и ныне:

Честнейшую херувим и славнейшую без сравнения серафим, без истления Бога Слова рождшую, сущую Богородицу тя величаем.
Именем господним благослови, отче.

Иерей: Боже, ущедри ны, и благослови ны, просети лице Твое на ны, и помилуй ны.

И изображенныя поклоны 16, с молитвою святаго Ефрема: И по сих начинаем вечерню: Приидите, поклонимся: трижды. И предначинательный псалом.

В конце вечерни, аще несть преждеосвященная, по молитве Небесный царю: глаголем молитву святаго Ефрема. Таже Трисвятое, Отче наш: Господи, помилуй, 12, и потом молитву сию:

Всесвятая Троице, единосущная державо:

Таже: Буди имя господне благословенно: трижды, с 3 поклоны. Слава, и ныне: И псалом 33: Благословлю Господа на всякое время: и прочее, и бывает отпуст.

Аще преждеосвященная, по Ущедри ны: и по молитве Ефрема, абие Трисвятое, Пресвятая Троице: Отче наш: Яко Твое есть царство: Господи, помилуй (12), молитва Всесвятая Троице: Посем Премудрость. Лик: Достойно есть: Иерей: Пресвятая Богородице, спаси нас. Лик: Честнейшую херувим: Иерей: Слава Тебе, Христе Боже, упование наше слава Тебе. Лик: Слава, и ныне: Господи, помилуй (трижды). Благослови, и иерей творит отпуст.

Аще есть Божественная Литургиа, по Всесвятая Троице: абие Достойно, и отпуст. А Буди имя господне: и Благословлю Господа: глаголем на Литургии по заамвонной молитве.

Аще же несть Литургии, по Всествятая Троице: глаголем: Буди имя господне: трижды. Слава, и ныне. Благословлю Господа: Таже, Достойно есть, и отпуст.

Аще же несть 40-ца, по кондаках:
Господи, помилуй
(12). И молитву:

Всесвятая Троице, единосущная державо, неразделимое царство, всех благих вина, благоволи же и о мне грешнем, утверди, вразуми сердце мое, и всю мою отъими скверну, просвети мою мысль, да выну славлю, пою, и покланяюся, и глаголю: един свят, един Господь, Иисус Христос, во славу Бога Отца, аминь.
Буди имя господне благословенно от ныне и до века.
Трижды.

Слава, и ныне: и псалом 33.

Благословлю Господа на всякое время, выну хвала Его во устех моих. О Господе похвалится душа моя, да услышат кротцыи, и возвеселятся. Возвеличите Господа со мною, и вознесем имя его вкупе. Взысках Господа, и услыша мя, и от всех скорбей моих избави мя. Приступите к нему и просветитеся, и лица ваша не постыдятся. Сей нищий воззва, и Господь услыша и, и от всех скорбей его спасе и. Ополчится ангел господень окрест боящихся его, и избавит их. Вкусите и видите, яко благ Господь: блажен муж, иже уповает нань. Бойтеся Господа вси святии его, яко несть лишения боящымся его. Богатии обнищаша и взалкаша: взыскающии же Господа, не лишатся всякаго блага. Приидите, чада, послушайте мене, страху господню научу вас. Кто есть человек хотяй живот, любяй дни видети благи; Удержи язык твой от зла, и сотвори благо: взыщи мира, и пожени и. Очи господни на праведныя, и уши его в молитву их. Лице же господне на творящыя злая, еже потребити от земли память их. Воззваша праведнии, и Господь услыша их, и от всех скорбей избави их. Близ Господь сокрушенных сердцем, и смиренныя духом спасет. Многи скорби праведным, и от всех их избавит я Господь. Хранит Господь вся кости их, ни едина от них сокрушится. Есмерть грешников люта, и ненавидящии праведнаго прегрешат. Избавит Господь души раб своих, и не прегрешат вси уповающии на него.

Слава, и ныне: и бывает отпуст.

Последование часов

Последование часов. Час первый, третий, шестой и девятый. Для католиков славяно-византийского обряда. По кн. "Иерейский молитвослов" (Рим, 1950).