Ļaudis maņ meilī

Великий пост

Ļaudis maņ meilī

Ļaudis maņ meilī, kū jums nūdareju?
Vai es kū ļaumu jums kod izdareju?
Gribēju dōvōd visim debess prīcu;
ceļu jyus rōdot maņ uz nōves vītu.
Ļaudis maņ meilī, kū jums nūdareju?
Vai kaidu sōpi es jums izdareju?
Jyusus es cēļu vysom tautom pōri;
tagad uz munu nōvi visi kōri.

Ļaudis maņ meilī, kū jums nūdareju?
Vai Dīva spāku jums es narōdeju?
Varējot pōrīt sausom kōjom jyuru;
vīneigi naidu tagad apkōrt jyutu.
Ļaudis maņ meilī, kū jums nūdareju?
Vai jyusu sūļus vīnmār nasvētēju?
Barōju jyusus tuksnesī ik dīnas;
yudiņa lasi nav kas maņ te pīnas.

Ļaudis maņ meilī, kū jums nūdareju?
Vai es uz lobu jyusus navadeju?
Sorgōju jyusus es nu īnaidnīkim;
mani jyus stōdat blokus nūzīdznīkim.
Ļaudis maņ meilī, kū jums nūdareju?
Vai keidreiz jyusus aizmērsis es beju?
Yudini slōpēs jums nu klints es devu,
pošam man snīdzat etiķi lai dzeru.

Ļaudis maņ meilī, kū jums nūdareju?
Vai jyusu lobā vysu nadareju?
Īvežu jyusus zemē Apsūleitā;
man līkat nūmērt vītā nasvēteitā.
Ļaudis maņ meilī, kū jums nūdareju?
Vai lobu sirdi es jums narōdeju?
Audzēju jyusus es kai veina kūku;
napasnīdz tagad maņ nivīns pat rūku.

Ļaudis maņ meilī, kū jums nūdareju?
Vai lobu dareit jyusus namōcēju?
Trejs godi es jums kai Dīvs paleidzēju;
dzeiveibu tagad par jums upureju.
Ļaudis maņ meilī, kas vēļ byutu dorams?
Syuteibu sovu piļdeju cik varams.
Vyslobais Jezu, mes pi Tevis ejam,
pi Tovom kōjom osoras mes lejam.

Dīvs Kungs, mes Tevi lyudzam pazemeigi,
atzeistam vainas sovas vaļsirdeigi.
Pīdūd mums, Jezu, myusu vysus grākus,
Styprynoj sovu ļaužu vōjūs spākus.
Dūd, lai mes Tevi stipri īmīļōtu
un sovas dīnas svāti nūdzeivōtu!
Atļauņ pēc nōves īraudziet mums Tevi,
svātlaimi baudeit, kū mums nūpeļnēji! Amen.

Teicit Kungu. Reiga, 1990. lpp. 409-411.